Ruling party hnena kumthar thuchah

Krismas leh kum­thar vuakveta zu an khuahkhirh avangin sawrkar hnenah lawm­thu ka sawi e. Chutih rualin Ruling Party mite hnena Kum­thar Thuchah tâwi­te ka'n nei leh teh ang. 

Ruling Party ni mekte u, sawrkar kal tawh zawng zawnga ruling party-te chin dan ṭhin ang lo takin, Opposition Party in nih laia in tih dan ṭhin leh in taihmak em emna ‘lehkha chhiar’ hi bansan lo ula, Ministers, MLA leh party member zawng zawng te, ni tin chanchinbu chhiar leh ziah hi taima chhunzawm zel turin ka ngen a che u. 

Sawrkar hian eng nge a tih fuh loh, eng nge a dik zawk, mipui duh dan leh ngaihdan eng nge, eng nge tuna kan ram mamawh leh issue pawimawh tih lam; ruling party nih tum em ema in beih laia in ngaihven hle ṭhin ang kha tunah pawh chhunzawm zel ang che u. Sawrkar tih dik loh lai leh tih nachang an hriat loh in dap kual chet chet peih ṭhin ang leh, a dik zawk leh ṭha zawk in hriat theih viau zel ang kha bansan lo turin ka ngen a che u. 

ṭha zawk, ngaihdan dik leh fel zawk leh mawi zawk in hriat zel theih nan leh, ngaihsanawma in awm reng theih nan te, nunphung dik leh mawi in hloh loh va, in zahawmna in humhim reng theih nan ni tin Pathian rawn chungin mahni ṭheuh i inenfiah ṭhin ang u. MLA term khat ringawt ni lo, kan dam chhung leh thih hnu, nakin hi i dâwn pha ṭhin ang u. 

“Nimahsela, demna che ka nei a ni, i hmangaihna hmasa ber kha i bân tâk avangin. Chutichuan, i tlûksan tâk chu hre reng la, simin, a tira i thil tihte kha ti leh rawh,” kan Lal Isua’n a tih ang kha kan lo ni hlauh dah ang e. Thupuan 2:4, 5. Laodikei kohhran pawh kha i hre reng ṭhin ang u. 

Tun kum thar hi ‘lehkha chhiar tam kum, chanchinbu chhiar peih lehzual kum’-a puang vek turin Mizo mipui zawng zawngte ka sawm a che u. Kuminah hian Pathian malsawm tlakin i nung ṭheuh ang u.