WHAT THE BIBLE SAYS!
"Ka Pa vana mi duhzawng titu erawh chu van lalramah an lût ang," tiin Lal Isuan A sawi a (Matt 7:21). Keini zinga tam tak hi chuan thil ṭha tiha chhandamna A sawi niin kan ngaih mai a hlauhawm hle. Hetiang vang hi em ni ang aw, "Lal Isua ringa thil ṭha titute chu vanramah an kai ang," kan tihna chhan hi hi?
Thil ṭha tih leh rinna hi Paula chhandamna zirtirnaah chuan thil hrang an ni. Ephesi-ah khan, "Rinna avanga khawngaihnaa chhandam," kan nih thu a ziak a (Eph 2:8). A hnu chang 10-ah chuan, "Thil ṭha ti atan Krista Isuaah chuan siam," kan nih thu a ziak leh ta chauh a nih kha (Eph 2:10). A mi zirtir tum chu chhandamna chang tur hian thil ṭha tih hi a tel hauh lo va. Chhandam fate erawh chu thil ṭha tia nung leh khawsa tur chu kan ni si tihna a ni. Rinna hi thil ṭha tihin a pawlh tur a ni lo va, a zuiin a zui tur a ni zawk a ni tih a tilang a ni.
Rinna hi hriatthiamna mai a ni lo va, Lal Isuaa inpumpekna a ni tih kan hriat a ṭûl. He lai tak hi tun lai piantharna tam berin a phâk tâk loh chu a ni. Chhandamna hla, sual, Lal Isua'n kan ai A awhna zawng zawngte kan hrethiam, pianthar chu kan duh ve thawkhat, mahse fapa tlan boin a pa ina hâwn a duhna zât khan kan duh pha si lo. Fapa tlan bo kha chuan a pa chaw va ei ve theihna position hniam thei ber – inhlawhfa – mi zawng zawnga hnuaihnung ber nih kha a peih zân mai, eng vang nge ni? Chaw a ei loh chuan a thi mai dâwn! Kei lah chu rilṭamin ka thi dâwn si a ti tawh a ni. Kan tun lai piantharna tam ber hi chu simna (repentance) lamah hian a duar dâ lutuk a, chhandamna duh ve, hremhmun pumpelh chu duh ve, mahse a hnuaihnung bera awm chu kan duh hauh lo!
Lal Isua'n misual sim awm dân tûr a zirtirna hi kan Speaker-te hian rût ngun se a va ṭûl em! He fapa tlan bo dinhmun atang lo hi chuan tumah Lal Isua kutah an inpumpek dawn lo. Fapa tlan bo anga thih mai hmabak ni a inngaite tan erawh chuan Lal Isua hnena inpumpek hi a har hlawl lo. Gospel Singer ropui Sanglianthanga hla-in "Amah chauh chu ka ring lo thei si lo" a tih ang kha a ni. Kan ringa A kutah kan pumin kan inpe lo thei tawh lo a ni!
Chutiang mite chuan thil ṭha tih kha nunphungah an lo nei ta thin a. Thil ṭha ti turin Kristaah chuan siam an ni tih a lo lang ta (Eph 2:10). Chu chu "Ka Pa vana mi duhzawng titu" tih kha a ni. Heta "titu" tih hi present participle (ppt) a ni a,"continuous and repeated action" sawina a ni. Chuvangin mi piangtharte hi chu thil ṭha ti thin, tlang chunga khaw awm anga langsar (Matt 5:14), leh hmuh awlsam te an lo ni ta!
- F.Lal Thanzuala, Ph : 9436141242