Russell’s Teapot

Kum 1700–1800 lai vel kha khawvelah thiamna leh finnain hma a sawn nasat em em lai leh mihring finna an chawisan nasat hun lai, fiinna ril–philosophy hmanga Bible leh kohhran an beih hun lai, mihring finna chauh hi a ni kan innghahna tur tia zirtirna lo irh chhuah hun lai–Enlightenment–a ni tiin mithiamte chuan an sawi ṭhin a. Hemi hma lam leh a hnu lam, vawiin thleng pawhin philosophy leh science thiamna hmanga nun kaihruaia Pathian thu leh thlarau lam thilte reng reng chu belhchian dawl lo leh thutak a ni lo e tia ringhlel leh ring lo hi kan la awm ta zel a nih hi.

Eng nge Russel's Teapot chu?

He tehkhin thu hi Birtish philosopher lar tak Bertrand Russell (1872-1970), Pathian awm ring lo chuan kum 1952-a a ziah 'Is there a God?' tih aṭanga lak a ni a. Hetiang deuh hi Russel-a thil sawi dan chu a ni: "Khawvel leh Sikeisena (Mars) inkarah hian thingpui bêl (teapot) te tak te, mihring mit leh enhlatna (telescope) a hmuh theih loh a awm a, chu chu a vir vel reng a ni tih sawi ta ila. Chu ka thu sawi chu mi tu mahin a dik lo tih an finfiah theih loh avangin an awih tur a ni em ni?"

He zawhna a siam chhan leh a thusawi awmzia chu:

1. Ka thil sawi chu i hmu thei lo, i khawih thei lo a, i fiah thei lo.

2. Chu ka thusawi chu dâwt a ni a, finfiahna a awm lo tia min hnial a nih chuan, "A awm lo tih finfiah rawh" tiin ka chhang ang che.

3. I finfiah theih loh avangin ka thingpui bêl (teapot) sawi chu a awm tak tak tihna a ni lo.

Burden of Proof

A tira kan sawi tak ang khan, Bertrand Russell hi mi thiam leh ril, philosopher turu tak mai a ni a. Kristiante hian Pathian hi a awm a ni kan ti a, a ring lo chuan a awm lo an ti a. Pathian chu a awm a ni tih ringtu chuan a finfiah tur a ni a, a awm ring lo tan finfiahna a ngai ve lo, a tihna a ni. Thil hi a awm tih sawitu mawhphurhna a ni a, thil a awm lo tih sawitu hian finfiah turin mawhphurhna a nei lo tihna a nih chu. Chuvangin, Pathian a awm ringtute a hnialna ṭanfung ṭha elkhên a ni a, vawiin thleng pawhin Russell-a tehkhin thu khi kan la sawiin kan la zir ta zel a ni hi.

Pathian thu – theology aṭangin

Pathian ringtute chuan "Pathian hi a awm" kan ti a, a ring lote chuan "A awm tih finfiah rawh" tiin an bei let ṭhin a, Pathian thu hria leh sawifiah thiam tak kan nih loh phei chuan kan chhanna hi a chak tâwk lo fo ṭhin a nih hi. Tin, Russell-a chuan, "Pathian a awm tih sawitu zawk khan finfiahna a nei tur a ni, a awm lo titu zawk khan a ni lo," a tiin a sawi a, chu chu vawiin thlenga Pathian awm ring lote ṭanchhan a la ni ta zel bawk.

Irish Pathian thu thiam Alister McGrath chuan Russell-a tehkhin thu hnial khân hi a lehkhabu 'Why God Won't Go Away' tihah khan hetiang deuh hian a chhang let a. Thingpui bêl (Teapot) chu thil ho mai mai leh awmzia nei lo a ni a, Pathian erawh chu khawvel awm chhan, ṭha leh dikna bulpui, mihring thinlunga beiseina zawng zawng chhanna a ni. Teapot hi a awm leh awm loh pawhin khawvelah nghawng a nei lo, Pathian erawh chuan a nei lian hle tiin a lo sawi tawh a nih kha. Tin, Russell-a Teapot chu tu man an hmu ngai lo, a chanchin a sawi ngai lo. Pathian erawh chu mi maktaduai telin an tawng tawh tih an sawi a, thil thleng tawh–history-ah a inpuanna a awm a, Bible te, thilsiam ropui zia te hian finfiahna a pe a ni.

Kristian philosopher Alvin Plantinga chuan, "Pathian ringtu tan chuan Pathian awm rin hi thil âtthlâk a ni lo a, finna pangngai a ni," tiin a lehkhabu 'Warranted Christian Belief', kum 2000-a a tihchhuahah a lo sawi tawh a. A sawi dan chuan, thil ṭhenkhat chu finfiah kher ngai loin kan ring mai ṭhin a. Entir nan, nimin khan khawvel hi a awm tawh tih te, kan ṭhiante leh min hmangaihtute chuan dâwt min hrilh lo tih te hi entirna atan a hmang a ni.

Teapot hi awm chhan leh tum a nei lo a, Pathian erawh chuan a nei. Teapot ringtu chuan finfiahna (evidence) pakhatmah a nei lo a, keini chuan Pathian kan rinnaah hian finfiahna kan nei a ni.

1. Thilsiam aṭangin: Big Bang–bul a nei. Bul nei chuan bul ṭanna a mamawh. Rom 1:20 "A thil hmuh theih loh (a chatuan thiltihtheihna leh a Pathianzia) chu khawvêl siam tirh ata fiah taka hmuhin a awm a, thil siamah chuan a lang a ni; chu vâng chuan, chhuanlam tûr an nei lo."

2. Mihring chhungril hriatna aṭangin: Mi zawng zawngin dik leh dik lo hriatna kan nei. Chu chu dan a ni a, dan siamtu awm lo chuan dan a awm thei lo.

3. Chanchin/history aṭangin: Isua Krista lo kal thu te, a thih–thawhleh thu te hi history-ah kan hmu a, Teapot erawh chuan chutiang chanchin chu a nei ve lo.

4. Tawnhriat aṭangin: Khawvela mihring makta-duai tam takin Pathian hi an tawngin an hria a, an nunpuiin an thihpui ṭeuh tawh bawk a, chutiang chu a la ni zel bawk ang–chatuan thlengin.

- Rinfela Zadeng