INENFIAH NAN HMANG ILA

Sawi a nuam lo viau nâin, kan side B lam thil a nia, sawi ve leh mai ang. Tunlaia kan hriat lar pakhat lo awm veleh ta chu Family Pension, a la tur ni tawh lote’n kan lo la lak ṭhin thu hi a ni. Sawrkarin hma a la a, thil a kal fel zel turah ngai ila. Hetiang thil kan ram, zaa za Kristian nia chhàl ngam ramah a lo awm hi a hrilhhaithlak tak zet a ni.

Hetiang lam deuh hi hun kal tawhah khan kan lo hre tawh a, min la kiansan thei lo hi a pawi a; tun aṭang chuan hetiang chi hi hriat tur a awm tawh loh beisei ang. Hetianga pension la thei tawh lo tur chite’n an lo la la hi thil ṭha lo, serious tak a nih ngaihtuah chang lova lo la zawm zel an ni-ah ngai ila; han ngaihtuah chiang deuh se la, an duh hauh loh tur kha an ti laklawh, ti ta zel an ni maiah ngaihsak ang.

Hmanah, ti ngawt teh ang, 'Thlarau zirtirtu' an tih mai kha kan lo nei tawh a nih kha. Mitthi tawh, anmahni awm hauh si lo, zirtirtu kha an lo awm a, thla tin hlawh la si kha; “Thlarau kha zirtirtu ni se, Krista thilte min zirtir se," tih hla ang ni si lo kha. Kha thil kha a lo tawp ta a, sawrkar tan pawh a zia hle ang.

Hun a kal zel a, Kelkang harhnain Zo fate nasa taka min chîm kha kan la hre reng ang. Kha harhna kha Zoram hmun tin aṭangin a za têl tehmeuhin kan chhim a, Zoram pawn–Assam, Tripura, Manipur, etc aṭang pawhin an rawn kal nasa a nih kha. Kelkang harhna vanglai kha Congress sawrkar lai kha a ni a, sawrkar khan sum harsatna a nei ru viau a ni mai thei. Khatihlaia kan Finance Minister Pu Lalsawta khan Thlarau MR (Thlarau Muster Roll) kha a han hai chhuak ta a nih kha. Kan lâm nasat tehreng nen, Kelkang harhna hrin chhuah ni lo, Pu Sawta felna avang zawka Thlarau MR hriat chhuah ni ta kha Mizo Kristiante tan a tlàwmthlak hlein ka hria.

Zo fate tluka inkhawm uar leh lâm nasa, harhna chang nasa ram hi an awm lo maithei. Chutihlaiin, kan camping, kan crusade, kan hlim leh lâmna te hian kan chhungril nun hi a thleng si lo em ni tih hi kohhran hote pawh kan inzawh a hun ta hle a ni.

Heng kan sawi ang ni lo, kan rama thihna leh thil ṭhalo tak tak lo thleng leh hriat tur awm ṭhinte hi a tam tawh khawp mai. Hriat reng tlak loh, kumkhua atana theihnghilh tlak zawk ni mah se la, thlir kirin ngaihtuah thar leh ila; kohhran hruaitute tan pawh kan hlawhchhamzia tarlanna a ni em, tih te chhût ila. Heng thil ṭha lo kan rama thleng ṭhinte hi Zo fa, Pathian ringtute hian inenfiah nan hmang ila, insiam ṭhat nan hman i tum ang u.

- Rev Lalbiaksanga Chinzah