Fûr khawchhia leh thlasik mau puah!
Hachhek bialtu MLA Pu (Royte) Robert Romawia'n fûr khawchhiat vâwrtâwp laia Chief Minister Pu Lalduhoma hnena DO letter a thawn chungchang hi ngaihtuah zui tham a tling hle mai. Mipui titi-ah leh social media-ah pawh he thil hian sawi zui a hlawh chho a. A hun bi (timing), MLA mawhphurhna leh politics thlir thiamna (political foresight) chungchangah zawhna pawimawh tak a rawn chhawp chhuak a ni.
Mipui tam tak rilrua zawhna lo lut hmasa ber chu — fûrpui kan luh hma, khawṭhat lai leh kawng siam remchan lai zawng khan engati nge chutiang ngenna thâwm rîvâ chu a awm miah loh, tih hi a ni. Kha hun remchang leh hmalakna awlsam zawk lai khan awmze neiin hmalak a ni lo va, fûr khawchhiat leh harsatna a thlen ruala chet lak thar tak thut hi bial mipuite lainatna tak tak nge, politics-a lâr khelhna (populism) zawk ni ang? A DO letter-a a tarlan kawng leh lei (bridge) te hi thlir chiang ila.
Bairabi to Zamuang Road: Hnathawh a chhiain a muang êm êm a, 10% pawh thawh zawh a la ni lo hial a hriat a ni.
Darlak leh Tuidam inkar (short-cut kawng): A chhiain a hlauhawm hle. Nikum (2025) khan One Time Improvement (MoRTH) Project aṭangin sum sanction tawh anga puan ni mah se, tun thlengin a la chhia a, a la hlauhawm reng a ni.
Kanhmun to Damcherra lei: He lei hi a taka motor zawh theih a nih hmain kumin May 22, 2026 khan PWD Minister-in a lo hawng tawh a; mahse, July 2026 thleng pawh khan a taka motor zawh theih a la ni chuang lo.
Zawhna awm ta chu, heng kawng leh lei (bridge)-te hi ZPM sorkar chhung hian a chhe ta thut nge, a hma zawng khan enkawl a lo hlawh lo zawk tih hi zawhna lian tak a ni ve tlat. Ngaihsak deuh ni se, hetiang dinhmun êm hi a thleng dawn em ni? Mi dang kâwk tur khawpin sorkar hmasa lam khan chapopui tur hnutchhiah an nei rêng em?
Thil dang leh deuh, mipuite ngaihtuahna a lo lang zawk erawh chu, Aizawl Municipal Corporation (AMC) inthlana MNF-in hnehna an chan zawh loh hnu khan Hachhek bialtu MLA hi mipui hmaah a inlâr khát hle mai a; a chanchin leh a hnuhma pawh hriat zui tur a tam viau lo. Economics & Statistics building chungchang te kha chu thuhranah dah ta ila! Ani ang MNF-AMC Star Campaigner kha chu inthlana an tlin loh avang ngawta bibo mai mai chi mizia nei a nih ka ring chiah lo bawk.
Tunah erawh bial mipuite leh party chhung boruak a dam deuh tawh avangin a rawn inlâr leh hluai a. Pawi ta ber erawh chu, politics ze chhe ngai bawk kan hmu leh ta hi a ni. Hetiang mizia hi politics-a boruak remchang chuh thiam bik (opportunistic politician) kan tih fo hi a ni thei mai ang em, tih ngaihdan hi mipuite zingah a piang lo thei lo a ni.
Nia, a rawn inlâr lehna hmanrua atana fûr laia DO letter a rawn chhawp chhuak mauh mai erawh hi chu a hun a rem lo (ill-timed) deuh a ni. Mipuite tana ṭangkaina tak tak chhawp chhuah a duh a nih chuan fûr kan luh hma khan tih daih tawh tur a ni zawk. MNYF President aṭanga àwltir a ni a, senior zawka promotion a hmuh thu erawh Hnam Rûnin an la chhuah bawk si lo. Pa ṭha, pa puitling, fak dawn ila a chanchin ka fak nin theih loh tur chi hi a ni lawi a; mahse, fak thei tur pawla ka la awm thei lo hi ka van a duai chuang te pawh ni fahmiang!
Mipuite hian thil an theihnghilh nghal ngawt lo. MNF sorkar hun lai khan Hachhek tlangdung hi hmasawnna lamah a hnufual deuh reng a. Chutih hun lai chuan ram pum huap kuhva chingtute harsatna thlen thei kuhva smuggling pawh uluk taka mit siai a ni bawk!
ZPM sorkar hnuaiah erawh Hachhek tlangdungah thil tam tak a danglam ta. Kuhva lei leh hralhna kawng a inhawn ṭhat tawh avangin, bial mipui tam takin sum lak luhna thar an nei a, chhungkaw dinhmun pawh a ṭha chho hem hem ta hle mai. Chutiang hmasawnna a awm mek lai chuan bialtu MNF MLA-in a bial mipuite tana hna thawh tak tak aiin, a hnu lama Kuhva Kût lo thleng leh tura fatu leader anga lan a tum leh si hi mipuite'n pawm harsa an ti maithei a ni (Nuai 10 a phal, in tia law!) MNF ruhkawl ho erawh a lungrualpui theih (a bum theih ka ti kher lo) an awm nual turah ngai chhin ta ila.
DO letter hmanga ngenna leh phûtna hi a dik lo ka ti hran lo, a hun leh a timing hi mipuite'n pawm harsa kan tih ber zawk chu a ni. Chutiang khawpa ngenna zahawm, bial hmangaihna vawrtawp aṭanga lo irh chhuak ta chu, fûr a kan luh hma, hmalak theih a nih lai khan lo ti tawh ni se a ṭangkai zawk ang a, mipuite pawhin bial tana a rinawmna leh mawhphurhna tak tak an hmu thei zawk awm asin! 'Better late than never' tih hi BRTF ho hman ṭangkai tur chauha duan a lo ni lo tawp mai, tih ka hre chhuak hnuhnawh!
Mipuite hian MNF hun laia harsatna leh ZPM sorkar hnuaia hmasawnna lo awm tawh hi an thliar hrang thiam tawh a. Thlasik mau puah phawng phawng ho kha kan pi leh pute khan eng ngaihin nge an ngaih ṭhin kha? A hun laia reh tlat a, harsatna remchanga hmang thiam tlat ṭhin politician ang chi hi mipuite hian kan pawmzam thei lo ang! Engpawhnise, 2028-ah chuan Hachhek tlangdung thinlung taka vei a, hmangaihtu kan pho chhuak ngei tawh turah ngai ila, i thlir liam leh ta poh phawt mai teh ang.
- Thangtea Thawmte