RATION CARD ENG LEH PAWL NEITE HAMṬHATNA (Mi tin thleng phâk Supply Department)

Food, Civil Supplies & Consumer Affairs (FCSCA) Minister chuan, Mizoramah ration card nei chhungkua 2,94,008 an awm thu a sawi. Ration card-a chuang mihring awm zat mi 11,74,628 an ni.

"Ration card eng (yellow) leh pâwl (blue) neite chuan an awmna khua/veng an sawnin, an insawnna hmunah an ration card neih sa dinhmun (status) ang an chhawm thei tawh," (Vanglaini 22.08.2026) tia Pu B. Lalchhanzova, Supply Minister sawi hi tun hnai thil ni tawh lo mah se, chanchin lawmawm leh kalphung thar a ni.

Hun hmasa lama harsatna

Hun hmasa lamah chuan chhungkua an insawn/pêmin ration card an sawn (tranfer) thei lo a, harsatna lian tak a tling. Card eng/ pâwl neite khan an card nihna ngaia kha an chhawm thei lo a, man to tak zawkin chhungkaw harsate’n ration buhfai an lâk a ngai ta fô. Hetiang pêmte hi DCSO emaw khan card eng/pâwlah an leng tawh lo, quota a awm tawh lo tiin, card eng/pâwl ni tawh sa kha card var (white)-ah te an insawn a ngaih phah ṭhin.

Sorkar hriattirna

"Nikum September khan hriattirna kan tichhuak a, mahse, harsatna tâwk an la awm fo. Awmna khua/veng sawn avangin mirethei kha a hausa thut lo a, chuvang chuan, card eng leh pâwla awmte chuan an awmna an sawnna hmunah an awmna hluia an ration card an chhawm thei tawh," tia Supply Minister-in a sawi hi a thlamuanthlak hlê. Card eng leh pâwl neite an pêm a, an card ngai an chhawm theih tâkah chuan he sorkar hian chhungkaw tin leh mi tin tan malsawmna a thlen phâk tihna a ni awm asin!

Card eng leh pâwl neite an pêm a, an awmna tharah an card neih sa ang an neih leh khan quota a pungin a kiam phah lo. Card eng leh pâwl neite hi an pèmnaah card varah thun tur a ni lo a, anmahniin an duha an hriattir a nih chuan card sen/var-ah an awm thei chauh a ni.

Ration card chi 5 kan neihte

Mizorama ration card chi nga (5) kan hman mêkte hi sawifiah loh chuan a bo theih khawp mai a. National Food Security Act (NFSA) tih te hi sawi liam puat, lo ngaihthlak liam puat a awl a; a nihna hriat a pawimawh.

NFSA hnuaiah hian card eng leh pâwl a awm a, hamṭhatna eng emaw zat an dawng a. A thlawna buhfai dawn leh man tlâwm zawka lei theihna a ni. Non-NFSA hnuaia awmte card sen leh var erawh chhungkaw khawsak pangngai, BPL chunga awmte a ni a, a thlawna dawn a awm lo. Card sen hian a tlâwmin (state 'subsidy') buhfai an la thei a, card var chuan sorkar rate pangngaiin an khulh thung. NER card erawh ration lâkna a ni lo a, document pawimawh, identity proof atana siam a ni.

NSFA

1. CARD ENG (Yellow)–AAY, mirethei berte tana duan a ni a; chhungkaw 1-ah buhfai kg. 35 a thlawnin thla tin an la (Mizorama card eng awm zat 24,824–mihring 62,977).

2. CARD PAWL (Blue)–PHH, mi tam ber neih a ni a, mi 1 zêlin kg. 5 a thlawnin thla tin an la thei. An duh chuan kg. 1 Rs 15-in kg 3 thla tin lei belh theih a ni. Card pawl nei thei hi kum khata chhungkaw lâk luh bitliah zat–khawpuiah nuai 4 chin, thingtlangah nuai 2.5 aia tam lo a ni (Card pâwl zat 1,54,075 – mi 6,41,032).

Non-NSFA

1. CARD SEN (Red)–Chhungkaw harsa zual, NFSA-a tel si lote tân Mizoram State Special Ration Package (MSSRP) kaltlangin card sen state sorkarin a siam a. Card sen hi thla tin mi pakhatin kg. 8 lain, kg. khat zelah subsidy-in Rs.20-in an la ṭhin (Card sen awm zat 31,163 – mi 1,28,969).

2. CARD VAR (White)–VIP, Group A officer, pension hlawh sang la, sumdawng lian, kum khata cheng nuai 4 chung lam la lut (khawpui) leh nuai 2.5 chung lam lalut (thingtlang) ten thla tin buhfai kg. 8 an la thei a, kg. khat Rs 30-in an la a ni (Card var awm zat 72,293–mihring 3,12,989).

3. NER CARD–VIP, officer lian leh sumdawngte pawh an awm ṭhin a, Not-Entitled Ration (NER) an nih angin ration buhfai an la thei lo. NER Card hi identity proof' atan an hmang thung (NER card awm zat 11,653 – mi 28,661).

Tlipna

Tun dinhmunah NFSA hnuaia quota nei thei Mizoramin mi 7,06,296 kan neih aṭanga 7,04,009 hnawhkhah a ni a, mi 2,287 tan quota a la awm. Quota âwl a awm chhan hi mitthi tawh te, card eng leh pâwl card vara awm turte siamrem vang a ni a. Mizoramah card var tihtlêm tum a ni a, card sen hi tihpun zêl tum a ni.

Card var nei card pâwla awm theite leh NER card nei duh te chuan FCSCA Dept. lamah form lâk a ngai a, bialtu DCSO hnênah dil tur a ni ang. Hetah hian Village Council/Local Council hriatpuinate leh DC aṭangin income certificate lâk a ngai.

(Ration card kaihhnawiha harsatna nei tan tollfree number 1967-ah biak theih a ni)

~ Zoa Tlau, Buannel Cabin