Khawvel fur rei ber Mizoramin a tawng

Kum 2008 ah Mizoramah kan inthlang a, Congress-in hneh takin sorkarna a siam a. Kum 2013 ah kan inthlang leh a, Congress bawkin sorkarna hneh takin a chang leh a. 

Kum 10 an sor­kar chhung khan Mizoram pumpui kawng chhe em em a, ram tinah vantlang an hnatlang a, Truck Owner an nuar a. Mizoram pumpui kha kawng chhiat avangin kan vaiin kan tlangau a ni ber. Kum 10 chhung khan kawng an siam ṭha hman lo a ni ber. Chuta sorkarin a chhuanlam ber chu ruahtui a tam lutuk a, kawng siamna hun a awmin a awm lo tih a ni. Mizoram khan furpui kum 10 chhung hna thawh theih miah lovin kan lo tuar a ni reng a nih chu! 

MNF an han sor­kar a Congress pawi­sa hman bang mai maiin kum chanve pawh tling loah kawng Mizoram pumpui an siam ṭha hman. Mizoramin kawng chhia a nei ta lo nge, tlangau aw leh hnatlan thawm hriat tur a awm ta lo. 

Khatla kawng chung lei tla bal chu thir leia dawh a ni a, 100 mtrs. pawh tling lo tur chu kum 6 (ruk) velah an zo ṭawk a, a chhan nia lang ta ber chu kum tin thil man a lo sang zel a, an dawh rei poh leh a enkawltu leh tute emaw kha an lo hlawk dawn a lo ni! 

Hmanah Janata Sorkar laiin Kris­tiante kan mangang a, Pathian hnenah kan ṭawngṭai a, avang lai takin a let tawp tawh a, a ni pawh dingchhuak tur a awm tawh lo. Tunah pawh hian kan ram zawlneite thu sawi vangin Congress hi term 4 a pe, ram tungding tur Phir Fapa pahnih a pe a. Tun term hi Congress term liau liau tur a la ni. Amaherawhchu, hruaituten anmahni siamtu an hre lo a, an rawngbawlsak mipuite an hmusit a, Lal Isua aiin kan ropui zawk, Ani chuan amah ringtute chauh a chhandam a, keini chuan min ring lotute pawh NLUP kan pe a ni te an ti a. Pathian an chhaih kawlh a, mualpho takin an tlu ta a ni. Jeremia 18 : 9 &10 chhiar la. 

Kohhran te kan hmusit a, kohhran lu chu Isua a ni si. Tunah pawh hian Congress hi Central lamah leh Mizoram lamah pawh an dinchhuah lehna tur a kaw tawh lo, Pathian nung kuta tlu an dingchhuak leh tawh ngai lo. Zoram mipuite leh kan Party hruaitute pawhin kan Pathian hi zahna leh ṭih na­chang i hria ang u. Tuk zana, a hnena kan ṭawngṭai ṭhinna lei leh vana thuneihna zawng zawng neitu aia ropui zawk hruai­tu kan neih leh lek phei chu a simin i sim ang u. Kan ram hian Lal Isua aia lal neih hi amamawh lo. Kan Pathian rilru kan tina lutuk palh ang e. 

- RC Khiangte