Zin kawnga incheina/inthuamna

Hnam tin hian hnam dangte laka danglamna an nei vek ang a. Mizote pawhin danglamna tam tak kan nei ang. Mizote danglamna hi kan chhehvela hnam dangte danglamna angin a danglam bik mai thei bawk! Hnam dang laka Mizote kan danglamna pakhat nia ka hriat chu, zinna, zin kawnga thawmhnaw kan hâk duh dan hi a ni–a bikin ṭhalaite.

Mizoram pawn lamah hian ka zin ve ta fo mai a, mahse, India ram erawh ka pêl lo tlangpui–Mizoram pêl chu vawi khat chiah! Chung ka zinnaa Mizo ṭhalaite zinga ka 'notice' langsar tak pakhat chu–zin kawnga incheina/inthuamna a ni. Hnam dang zingah aiin Mizo zingah, a bikin ṭhalaite zingah holam leh duhdah taka inchei, inthuam kan tam bik niin ka hmu.

Hman ni phei chu, tlangval pakhat thawmhnaw hâk hi a holam lutuk mah mah hian ka hria; mut thawmhnaw ang mai tak tak a ni a hâk ni. A zing muhil tho hlawl, insiam hman lovin a rawn tek chhuak ta mai em maw ni chu aw, ka ti rilru rum rum a! Mahse, mu tho hlawl chu a nih ka ring si lo. A holam lutuk leh a inchei duhdah mah mah kha, a mawi lo ve chuan ka hria.

Mizoram pawna han zin châng hian, airport-ah thlawhnaa chuang tur mi tam tak an zi mur mur a, an kal zut zut a, an ṭhu ṭhêp ṭhuap a. India ram airport-ah hian thawmhnaw holam leh tawngchham tak hâk hi Mizote hian kan ching deuh ber em aw, ka ti deuh a ni. Mizote chauhin kan ching tihna a ni lo va, hnam dang zingah pawh an awm ve tho. Mahse, Mizote hian kan ching deuh ber, kan tam deuh berin ka hre ve tlat a nih chu. Changkang riauin kan hria nge maw ni dawn ni?

Kan zah loh avang hian kan zah loh dan ang anga mi zinga awm tur tihna a ni lo. 'Khawlaiah saruaka kal ka zak lo' tih avanga kal ngawt chi a ni miah lo. Motor tlan zut zutna kawngpui sirah saruak deuhthawa inbual ka zah loh avang ngawtin inbual chi a ni lo–hnam anga thil zahthlak a ni thei. Vantlang hmun, mi awm noh nohna hmuhah zah loh avanga inhlîm tûng tûng chi a ni hek lo.

Puipunna hmunah emaw, khawlaiah leh mi zingah kan awm dawn a nih chuan kan incheina leh inthuam danah a mawi tâwk a awm ve tih hriat a ṭha khawp mai. Chutiang bawkin, airport-ah te, thlawhtheihna leh bus-a chuannaah te pawh, kan inchei danah mi hmuh atan mawi tâwk a awm ve a ni. Thawmhnaw ṭha leh mawi tak, changkang tak inbel tur tihna lam a ni lo a, biak ina inkhaw dress nen zinnaah pawh inthuam a mawi, tihna lam a ni lo.

Ka sawi tum ber chu–zinnaah hian, zin kawngah hian inchei vût emaw, thawmhnaw ṭha leh changkang tak hâk a ṭha ka tihna ni lo va; ina kan awmhmun râwt thawmhnaw êm hi chu ha chhuak lo ila, mi dang hmuh atana a mawi tâwk hi i ha ṭhin teh ang u, ka ti a ni ber e!

- R Lalhlanpuia