ZPM chhûngmû a keh ta!

Kum 2007 khan Youth Movement for Mizoram (YMM) din a ni a, kei pawh ka tel ve a, 2008 MLA inthlanpui kumah phei chuan kan kal vung viau. YMM chu ṭhalai zinga ram vei, ram siamṭhat duhtu, politics kalphung siamṭhat duhtu kan ni a, a taka politics luhchilh erawh a tum lem lo.

Khatihlai tho khan Mipui Ṭangrual Pawl (MṬP) tih a awm bawk a, patling, kum lama tlema upa deuh tawhte an ni. YMM leh MṬP te kha tum thuhmun, duh thuhmun kan ni a, pawl thuhmun chu ni lo mahse YMM kha MṬP ṭhalai pawl (youth wing) ang deuh a nihna lai a awm âwm e.

2008 MLA inthlanah Congress an sawrkar a, YMM lam pawh kan zûzî chho ta ringawt mai a. YMM-a ka telpui zinga pathum lai chu tun sawrkarah hian minister an ni a, ka lawmpui tak zet. Kei erawh chu YMM kan zûzî takah chuan politics-a lut ve lovin, ka sumdawnna lam chauh ka buaipui zui ta a. Tun thlengin politics hi la ngaihven viau mah ila, a takin ka luhchilh ve ta lo a ni.

Hun a kal zel a, YMM leh MṬP lama mi pawimawh tak takte khan Zoram Exodus Movement (ZEM) an din chho leh ta a. ZEM a din theihna tura pawimawi ber chu tuna kan Home Minister Pu Sapa hi a niin ka hria, 'ZEM dintu' ti pawhin sawi theih a ni hial ang.

ZEM hotute chuan party leh pawl dangte sawm khawm zelin, kum 2017-ah chuan ZPM hi an lo din ta a. ZPM a din theihna atan hian mi pawimawh tak tak an awm a, ZPM-a tel party tin hruaitute an pawimawh vek a, mahse, chung zawng zawng karah chuan Pu Sapdanga hi a pawimawh ber lawr lak âwm e. Pu Sapa hi awm lo se ZPM hi a ding hauh lo ang.

YMM hun laia politics kalphung siamṭhatna tura kan ngaih pawimawh em em chu 'mi pakhatin party President leh Chief Minister nih kawp loh' tih a ni. Chu tho chu ka tel ve tâk lohna ZEM ho pawhin an ngaih pawimawh a ni a. ZEM bul ṭanna aṭanga lo ding chho ta ZPM pawhin 'Party President leh Chief Minister nih kawp loh' tih chu thupuiah an nei chho ta zel a, an Danpuiah hial an dah a. Hei hi mipui pawhin ṭha an ti em em a, mi tam takin ZPM an duh chhan pawh a ni.

Mahse e, ZPM laimu pawimawh ber pakhat, 'Party President leh Chief Minister nih kawp loh' tih chu tunah chuan ṭhiah a lo ni ta a, ZPM chhûngmû a keh ta! Awi maw, a pawi em mai!! Kum tam pawh a ral hmain ZPM Kalphung Thara a kalphung thar lai tak, langsar ber mai chu kan kan phûm bo dawn ta.

ZPM President atana Chief Minister dah a nih theihna tura an party danpui tihdanglamna tura an Executive Committee Meeting-ah ZEM dintu leh ZPM dintu tih ngam bawk, Pu Sapa'n thu sawi hmasa ber a, an party President atan Chief Minister a awm a ṭul thu a sawi phei kha chu, ka lo tliak ve hnâwp a ni ber mai. A mak ka ti tak zet! A chhan chu Pu Sapa hi a tîr tê aṭanga 'Party President leh Chief Minister nih kawp loh' thupuia neitu a nia ka hriat vang a ni.

Hetiang a lo nih tak si-ah chuan, ZPM hian party dangte lakah eng 'Kalphung Thar' nge an neih tak bik chuan le? Mi pakhat ZPM President-ah dah tum vang ngawr ngawra ZPM Danpui an tidanglam ta hi kei chu, a pawi ka ti vawng vawng!

- Lalchhandama