FAVANG HUN MAWI LEH DUHAWM

Favang zing khawvar êng nuam tak maiah Lalpa hmaa thiamthu sawi tur nei miah lo hi boruak thianghlim tak mai hîp theia kaihthawha ka'n awm ve leh ṭhin hi lawmawm ka va ti ṭhin em!

Mizoram mawi tak leh nuam em em, duhawmna tinrenga chei, chhêmdam thlifim thaw heuh heuh karah han hawi vel ila, luipui dungte chu ṭiau chhûm vár hluk maiin a lo bawh vár vo mai a. Tlang tin leh mual tin te lah chu siam zawh hlim ang maiin an hring no nghulh mai bawk si. Zan boruak thiang tak maiah chung lam han thlir ila, chung chhawrtlapui leh siar êng pe un maite chu, "Aw, enchim loh, thlir ninawm loh," tih loh rual a ni lo. Heng zawng zawng hmu ve theia ka awm hi ka lawm em em a ni.

Khawvela ri mawi ber mai, nungchate hlim thâwmthang rî ka'n hriatte hian, he khawvel harsatna, retheihna leh pachhiatna te ka theihnghilh ṭhak ṭhin. Favang hun duhawm tak hi em ni ang le Rokunga'n "Aw, lei mawina thinlai tihlimtu, zantiang chhawrtla leh siar eng mawi, aw, zing eng mawi leh tlaitla eng mawi, damlai khuavel nunkhua tinuama'n lo vul rawh," a lo tih lawm lawm kha.

Mizorama favang hun mawi leh duhawm tak hi khawvel hnam dangte hian han hmu ve se, a mawizia engtin tak sawi ve ang maw? Siamtuin Mizorama favang hun hlimawm tak leh mawi tak a siam hi thil siam zinga hlu ber, mihringte kan vanglai hmel nen pawh khaikhin ila a sual awm lo asin.

Pathianin nulate hi mawi leh duhawm, îtawm takin a siam a, nulate mawina hi eng mawina mah hian a khûm awm lo e. Chutiang bawkin he favang hun duhawm tak mai lan dan hi nula hmelṭha leh pian nalh tak ang maiin kum khatah vawi khat a rawn inlar ve a nih hi. Favang hun mawi leh nuam tak mai hi nula mawina nen i’n hmehbel teh ang hmiang.

Favang hun nuam tak mai hian ṭo haw tur ang maia khaw dur, mihringte thinrim hmel dur leh fûr khaw hnawm laia chhûm zing, mihringte lungngaihna hmel ang kha a pu lo va, hmel hlim leh zaidam tak hmel a pu zawk a ni. Nula hmelṭha tak inbual zo hlim ang maiin, favang ni eng mawi tak chu fûr ruah tuiin boruak bawlhhlawh tinreng a lên fai duak ang hian, favang boruak hi a thinghlim em em a, nipui sensa, mi chapo meng sen ûl ang mai hmel kha a pu bawk hek lo.

He favang ni hian chapo hmel rêng pu lovin, zaidam hmel dam thlap a pu zawk a nih hi. A hmel lan dan hrim hrimah pawh hian rilru hah hmel a pu miah lo a, lawm taka mi dawngsawng duh hmel a pu zawk a nih hi. Chuvangin, favang ni eng mawi tak hian nula zaidam leh duhawm, mawina tinrenga inbel ang mai a ni. A mawiin a va duhawm tak em.

Hla phuahtuin ‘Vulmawi hmelṭha, vulmawi hmelṭha, laitual mawii, Bahsamseihniangi’ a tih ang maiin, kum khat chhungin Zoramah hian favang hi a rawn inlan ve a; nula sam sei takin a sam a thlah ziar ang maiin, kan rama mau leh hrui zâmte chu favang khawvelah hian a rawn inlan ve a nih hi. Hei hian Pathian kutchhuak mawizia a pho lang chiang hle awm e. Rilru tluang tak pu nula nuih inpeih sa reng angin favang ní hian thil siam tinrengte hi hlim hmel pu sarin min lo lawm a. Eng ang nungchang pu pawh ni ila, favang hun nuam leh duhawm tak hian a ángchhungah tlangnêl taka awm turin min duh a ni. Zoram favang nuam takah hian hlim leh lawm takin i lêng ang u.

- Hausanga Hauzel