Kohhran upate’n dawt dum an sawi em ni?

Mizorama political party-te dâwt heh lutuk leh dâwt vãr leh dâwt dum an sawi pawlh nuai ṭhin hi a khamawm takzet ta.

“Dawt var” leh “Dawt dum” tih hi khawvel pumah a lâr a, Mizoramah pawh kan hmang uar hle. Dâwt var hi mi rilru tihnat loh nan, thil pawi êm êm lo tura dâwt sawi a ni. Entirnan: mi pakhatin kawr thar mawi lo tak a ha a, a rilru tihnat hlauh vangin “A mawi lutuk,” tihsak ta ila dâwt ni mah se, dâwt pawi lo a ni thei. Dâwt dum chu mahni hlawkna tur, mi bum, duh vang renga dâwt sawi a ni. Entirnan: Mi pawisa puk a, rulh leh tum si lova, “Naktukah ka rul ang che,” ti ta se, chu chu dâwt dum a ni. Bumna, scam, thu dik lo thehdarh, mi tichhe tura dâwt phuah chawp. Mahni hamṭhatna, mi tihchhiat, thudik thupnate thlengin a huam. Dâwt Paw dal / A var chiah lo, a dum chiah bawk si lo. Entirnan: Office chhuahsan tura hotute dil turin a chhan tak, mahni tih tur tak sawi ngam lovin “Chhungkaw lamah buaina a awm,” ti ta se, mahni invenhim nana dâwt sawi a ni. Mahse, mi pawi khawih lutuk lem lo a ni.

Heng dâwt chi hrang pathumte hi Bible/Sakhaw mit aṭanga thlir chuan dâwt chu “Dâwt” a ni mai a, “dik” chu dik a ni mai. A vár leh dum a thliar hran lo. [Thup 21:8] “Dâwt sawi hmangte chanvo tur chu meidil a ni ang,” a ti. Mahse, Rahabi-i’n Israel enthlatute a huma dâwt a sawi kha Hebrai 11-ah rinna thila chhiar tel a ni tho.

Mi puih, venhim, mahni hlawkna, mi tihchhiat rah chhuah, thil pawi lutuk lo, a ṭhat phah zawk pawh a awm thei; Inbumna, inhuatna, Surprise party thup nan dáwt sawi; rukruin, “Keimah ka ni lo,” tih te, dâwt vâr leh dum chu a awm alawm. Mahse, a vár pawh ni se, dâwt a ni tho va, ngaihtuah fe a ngai. Mi ṭhenkhat chuan, “Dawt ṭha a awm thei lo, thudik tluang tak a ṭha ber,” an ti. Mi ṭhenkhat dang leh chuan, “Mi nunna chhanhim nan chuan dâwt vâr chu a pawi lo,” an ti thung.

Tun hnaiah Assembly House-a Leader of Opposition, Synod Kohhran Upa ni mek bawk chuan Mizoram MP [RS] thlan tur chungchangah Social Media platform hrang hrang kal tlangin lang lehnghal mai tur, “Dâwt dum” a sawi nia hriat a ni. Leader of Opposition Upa Lalchhandama Ralte hian, “ZPM chhungah inrem lohna a awm a, chuvangin, ZPM vote MNF lamah a kal nual thei a, MNF might get a vote from the ruling party,” tiin beiseina neiin, "There was a rift within the ruling ZPM," tiin a puh niin a lang.

June 18, 2026 khan Mizoram Rajya Sabha seat 1 thlannaah ZPM candidate K. Laltluangkima a tling. Cross-voting a awm ta lo. House Leader CM Upa Lalduhawma ngei pawhin, "Cross-vote a awm dawn lo, kan MLA-te an inpumkhat," a ti lawk. Vote chhiar zawhah pawh “cross-voting” a awm lo tih finfiah a ni. LOP hian “Dâwt dum” a sawi chiah em? Result dik tak thlir teh ang.

ZPM MLA 27 an awm a, an candidate K. Laltluangkima a tling. Vote 40-ah vote 26 a hmu. MNF MLA 10 an awm; BJP MLA 2 leh Congress MLA 1 an awm a? Congress 1 leh Ruling MLA 1-in vote an thlak lo. Cross-voting a awm lo tlat. Tichuan, Upa Lalchhandama Ralte-a’n, “Cross-voting a awm dawn,” tia a sawi lawk kha a thleng dik ta lo. ZPM MLA-te an ding nghet vek a, vote a darh lo. Opposition beiseina ang a ni ta lo a nih kha!

CM lo ni tawh Pu Zoramthanga leh Upa Lalduhawma [Current CM] pawh “Dâwt dum” sawi uar niin mipuiin an deuhsawh dun hle ṭhin niin a lang. Chutih lai meka LOP Kohhran Upa ni bawkin tîmna nei lek lo va, “Dâwt dum” a sawi veleh piap piap mai nia lang kha chu a zialo tak zet a ni. CM & LOP “Dâwt dum” sawi hreh miah lo kan nei ta mek niin a lang. Hetianga dâwt sawi pawisa lo nia ngaih theih hi kan ram rorelna in khaipa ve ve an nih chhung chuan, “Ram ropui” kan thleng har viau âwm e. Rinna lamah lah Kohhhran Upa bial nei ve ve an nih mek hmel si a, “Mitdelin mitdel vek a hruai chuan khuarkhurumah an tla dun ṭhin,” tih chu kan hlat vak lo vang.

Eng kohhran pawh ni ila, Kohhran Upa chin hi chuan Dâwt an sawi ngai lo turah kan ngai ṭheuh a, kan ring êm êm ṭhin. Political party/NGO lama nihna an neih kawp tak avanga “Dâwt vâr/Dâwt dum/Dâwt paw dal” an ha'n sawi hreh ta miah lo mai ṭhin hi chu, a pawiin an kaihhruai kohhran mipuite thlarau nun a ngaihtuahawm ṭhin hle. An bial fan changin tihtakzetin ṭawngṭaiin an fuih ve chamchi âwm bawk si a? Lalpa mit hmuhah engtin tak ni ang maw? Pathian rel fel atan dah tawh mai teh ang u.

- Dr. C. Lalrampana