THU LEH HLA
Mihringte tana pawimawh leh ṭangkai zinga dinhmun luahtu pakhat chu ‘thu leh hla’ (literature) hi a ni awm e. Chung thu leh hla kan tih zingah chuan lehkhabu hian mihringteah pawimawhna a luah hnem hle mai a, lehkhabu tel lo hian mihringteah hian hmasawnna hi a zawiawiin, a tluantling thei meuh lo ṭhin a ni.
Khawchhak lama hnam pakhat chuan lehkhabu hi a ziahna tur puan an lo duang chhuak a. Hnam ṭhenkhat zinga kan hriat lar em em Phoenician an tih chuan a ziah dan tur hawrawp an lo chher chhuak ve thung a ni. Khawvela kohhran lar tak pakhat chuan lehkhabu hi a bu siam chhuah hna hi an lo thawk hmasa tawh a. German ho hian kum zabi 15-na lai velah khan lehkhabu chhutna khawl an siam thiam hnuah phei chuan khawvelah hian lehkhabu hi a mikhual ta lo hle niin an sawi.
Lehkhabu zial kan ti dawn nge, lehkha zial kan ti dawn zawk, Juda-te’n an hman ṭhin hi siam hautak zet mai a ni a, Alexandria khua an tih mai, chumi khuaa lehkhabu dahna hmunpuiah chuan lehkha zial 7,00,000 aia tlem lo an chhêk khawl hman a ni. Mihring chanchinah hian lehkhabu hian thil a ti thei ber niin an sawi a. Ram chungchangah pawh thil dang aiin lehkhabu hian ram a la zau a, mihring nunphung a tidanglam nasa hle niin an sawi bawk.
Hmanlaia kan mi hmasate khan lehkhabu hi lo siam chhuak lo ta se, Pathian lehkhabu thianghlim hi a bu pum leh, a phek tina lung pheka inziak chu missionary hmasate khan Mizoramah chanchin ṭha rawngbawl hna thawhna hmanrua atan an rawn thlen a rinawm loh an ti hial a ni.
Lehkhabu hian finna te, hriat zauna te leh, thiamna te min pe mai a ni lo va, rilu huaisen taka thil min tihtir ṭhintu a ni bawk. Kum 2,400 kal taah khan Plato-a’n a ziah pakhat nia an sawi chu, ‘The Republic’ tih hi a ni a, hei hian ram ṭhenkhatah chuan tun thleng hian an sawrkar hmingah hian an la vuah niin an sawi.
Lehkhabu ropui leh ṭha tak tak, khawvel mihringte khawthlir hrang hrang tihmasawn a, chawk lumlet thei hi khawvel a awm chhung chuan mihringte hian kan theihnghilh thei tawh dawn lo a ni.
- George L. Ralte
Member, Mizo Writers Association