Zoram hmathlir: 5G khawvel leh ṭhalaite political consciousness

Mizo ṭhalaite zinga khawtlang leh politics thlir dan (political consciousness) lo danglam ta hian Zoram hma lam hun tur thui tak a hril mek a. Hun liam ta kan thlir let chuan, politics hi kum upa lam ho chauhte zinga up beh, inbeihna leh intihhmingchhiatna hmanrua anga ngaitu kan tam ṭhin hle. Ṭhalai tam tak tan phei chuan politics kha hlat tur satliah ni lo, kalsan tur, inremsiamna thianghlim lo (compromised) anga ngaihna a lian zawk hial a nih kha.

Chutihlai mek chuan, he 5G khawvel, digitalization leh technology sang tak hian kan ṭhalaite rilru (mindset) a rawn thlak hlak thung ta. Social media leh information technology zarah thu dik leh hriat duh zawng zawn chhuah zung zung a lo awlsam a, ṭhalaite rilru a rawn harh chhuak ta. Politics hi inbeihna mai ni lovin, kan ni tin nun leh hmasawnna kaihhruaitu khawl pawimawh ber a ni tih an rawn hrethiam ta a ni.

Parliament inpui lumlettu:

MP candidate kan thlir dan

Chu hmasawnna zungzam chuan ram rorelna inpui, Parliament thlenga Zoram aiawh tur MP (Member of Parliament) thlan chungchangah pawh ṭhalaite rilru a kai tho hneh hle. Hman deuh kha chuan MP thlan hian ṭhalaite sukthlek a khawih pha lo emaw tih tur khan kan hlat deuh ṭhin a. Mahse, tunah chuan rampui darthlalanga kan hmel tarlangtu tur, Parliament-a kan 'aw' (voice) rintlak leh ṭangkai taka va au chhuahpui thei tur kha ṭhalaite hian an ngaihven tawh hle.

A bikin, Rajya Sabha MP inbuatsaihnaah phei chuan candidate-te zinga ṭhalai lam ngaihzawn riau, rintlak leh rual u deuhte tan pawha beiseina kan neih rawn a awm nia hriatna a nasa hle. Kan ram hruaitute'n eng kawng nge an hawi dawn hre mah suh i la, social media (ṭhalaite khawvel)-ah erawh 'mi pakhat' a langsar! Ram tana an rawngbawl hna leh an hlawhtlinpuite chhui zui a, an hmathlir ngun taka lo zir chian hi ṭhalaite chin ṭhan a ni fo tawh tur hi hmasawnna nasa tak a ni.

Social media-a political influencer-te chona

Tuna kan ram politics darthlalang pawimawh em em chu social media a ni. He hmunah hian mi nawlpui leh ṭhalai tam tak kaihruai thei khawpa hming langsar leh political influencer rintlak tak tak an rawn chhuak hlawl hlawl mai. Hêng tlangval leh pathlawi, nula leh nuthlawi, patling nutling rilru fing leh thuziak thiam tak takte hian thil kalphung an thlir kual zung zung a, sorkar policy leh hmasawnna kawng hrang hrangte an rawn sawi fiah hian ṭhalai sang tam tak rilruah meichher an chhem alh ṭhin a ni.

An thuziak leh video clip te hian rual u lam thlengin ngaihtuahna thar a pe a, politics titi phung hrim hrim kha inhmuh hniamna leh inbeihna mai mai ni tawh lovin, intellectual debate (fing taka inhnialna leh sawihona) puitling takah an rawn hnuk lut ta zawk a ni.

College & university campus:

Zirlaite zawhna danglam ta chu!

Political consciousness thar hian kan institution hrang hrang, college leh university campus-te a rawn fawnpui mek a. Hman deuha politician-te'n campus an tlawh a, zirlaite'n fapa thlawp taka an lo bawr hut hut ṭhin hun kha a liam tawh. Tunah chuan institution hrang hranga zirlaite'n kan politician ho zawhna an zawh dan a danglam tawh hle.

A hma anga thil diltu (petitioner) lek ni tawh lovin, ram hruaitute chhanna fiah tâwk lo lakah zirlaite an ngawi mai mai tawh lo. Data leh fiahna nena sorkar hnathawh dan zawt dawt dawt ngam zirlai an tam ta hle a, hei hian Zoram khawvel thar a hril chiang hle a ni.

Assembly session: Digital live-stream kan ngaihven tâkzia

Chutihrual chuan, hman ni lawka kan thlir Assembly session khan Mizo ṭhalaite ngaihven a hlawh tawh hle. Screen hmaah ṭhalai tam tak an ṭhu khawm a, an bial MLA ten ram tana an 'aw' an chhuah dan leh sorkar hmachhawp an sawifiah dan te uluk takin an thlir a ni!

Assembly session kan ngaihven tâkzia hi chhiatna ni lovin, ram hmasawnna tura mipuite'n kan mawhphurhna kan hriat chian ṭanna a ni. Kan House ropui chhunga inhnialnate hi 5G network hmanga tlangzarh zung zung a nih takah chuan, tu MLA nge thawk rim a, tu nge mutthlu tih thlengin ṭhalaite hian an thliar hrang thiam tawh.

Meritocracy check: 5G khawvel mamawh mi ṭangkai

5G network kan hman tak tak hnu hian engkim a rang zung zung a, a hma ang a, "Ani hi chu kan biakpawh ngam tur a ni a, vote ve tawp mai ang," tih kha a lak tlak tawh lo. Zoram khawvel thar hian ‘mi ṭangkai’ leh ram tana ṭangkai tak tak turte chauh a mamawh (meritocracy) tawh a nia! Kan CM Lalduhoma kha Serchhipah ka vote lo; a CM theih nan Dr. Vanlalthlana ka lo vote daih asin–kan bialah!

Ṭhalaite hian technology zarah ram/state dangte thawh dan leh khawvel hmasawn dante an hmu zung zung a. Chuvangin, ram hruaitu atana an mi duh pawh hmasawnna hna thawk thei tur, khawvel hriatna changkang tak tak hrethiam pha, rilru zau leh thluak fing — dâwt ual-au hmanga mipuite bum kual tawh lo tur mi ṭangkai an zawng tlat tawh a ni. 5G khawvelah chuan a tling ber leh ram tana ṭangkai ber tur chauh kha ram hruaitu nihna chelh tlak an ni tawh.

- Thangtea Thawmte