2026 BEIHRUAL BU THLIRNA

Kum 1918 aṭanga Beihrual kan lo hman tawh chu tluang takin kumin 2026 thlengin kan la hmang thei zel a, a lawmawm ngawt mai. Kum 1918-ah khan June thlaa hman niin, 1919 leh 1920-ah September thlaah hmang a ni a, 1921-ah January thlaah hmang a ni a, kum 1922-1924 chhung erawh chuan April thlaah hman a ni. Kum 1925 aṭangin mumal takin September thlaah kan hmang tawh a ni awm e.(1)

Chutianga kum tam tak liam tawh aṭanga kan lo hman Beihrual chu kuminah pawh tluang taka hmangin kohhran hrang hrangte chuan mahni kohhran remchan dan leh ṭha tih anga ruahmanna siamin kan hmang hlawm a. A ṭhenin zan tin an hmang a, kohhran ṭhenkhatte chuan zan khatah bung hnih kawpin zan 12 vel emaw lekah an hmang zo bawk. Chutianga kohhran hrang hrangin kan Beihrual bu zirte chu tun ṭumah hian thûk taka luhchilh loin han thlir thuak thuak ila.

Beihrual bu hi kohhran lian pali–Presbyterian (member 6,46,891 nei), Baptist Church of Mizoram (member 1,88,440 nei), United Pentecostal Church of North East India (member 1,23,199 nei) leh United Pentecostal Church of Mizoram (member 72,407 nei)(2) te zirlai kan thlir dawn a ni. A hmasa berin heng kohhran palite hian ‘beihrual’ tih an ziak dan pawh a inang lo a; UPC (M) hian Beih rual an ti a, BCM chuan Beirual an ti a, UPC (NEI) leh Presbyterian kohhran hian Beihrual an ti thung. Tin, an zirlai pawh hi hetiang hi a ni a; UPC (M) hian ‘Isua Zirtirte Chanchin’(3) an zir a, BCM hian ‘Kan Hmachhawn Khawvel’ (4) tih hmangin an zir a, UPC (NEI) hian ‘Pentecost mite Pathian fakna leh chawimawina’(5) tih chu an zirlai thupui hming a ni. Presbyterian Kohhran chuan Nilai zan thupui nena inkawp a nih vangin ‘Mizo Kristian hlate leh a phuahtute’(6) tih chu zirlai thupui atana hman a ni a, Beihrual bika zir turin Ramthar Hapta, Kristian Chhungkua, Pathian fak hla sak, titea ṭhen a ni.

Kohhran palite beihrual zirlai hi a ṭha hlawm vek mai a, beihrual a nih ang ngeiin chhiara ngaihthlak liam mai ni loin, sawihona hun a awm ṭhin hi a hlawkthlakna lai ber a tih theih awm e. Kohhran palite beihrual bu-ah hian kohhran pathum–Presbyterian, UPC (NEI) leh UPC (M) te chuan mimal ziak an zir a, BCM hian thupui hrang hranga ṭhen a nih angin mi hrang hrang pakua ziak an zir thung. BCM beihrual bu hi Pathian thu lam ni chiah loin, a bu hming ang hian post modernism, hmeichhia leh mipa ngaihdan danglam leh harsatna, social media, ruihhlo, mihring hmelma, ruihhlo do, chhungkuaah, ruihhlo do tura ṭanrual, environment humhalh, ram hmasawnna hmachhawn tura inbuatsaihna tih leh pian pun pawimawhna tihte an zir a. Presbyterian kohhran hian Pathian fakna hla lam hawi an zir a, UPC (NEI) hian Pathian fak leh chawimawina lam bawk an zir a, UPC (M) hian Isua zirtir 12-te chanchin an zir thung.

Hetianga Mizorama kohhran lian palite beihrual bu han thlir hian, kohhrante pawhin kan ṭangkaipui tur tak a nih ngei a rinawm a, hlawk taka beihrual pawh kan hman ṭheuh a rinawm. Tunlai huna Mizoram mipui boruak thlir erawh chuan BCM zirlai hi kan mamawh tak em ni tih tur a ni a, an zirlai bu chhungah pawh environment humhalh leh ruihhlo do chungchang a tel hi tunlai huna kan mamawh tak a ni thei awm e. Chutihrual chuan, kohhran dangte beihrual zirlai pawh hi hnualsuat theih a ni bik chuang hauh lo a. UPC (NEI) leh Presbyterian kohhrante zirlai hi engtik lai pawha kan mamawh leh ṭul reng a nih mai bakah, kohhran mite fuihna leh tih thar lehna atana thil pawimawh em emte an ni.

Literature lam aṭanga thlir chuan UPC (M) beihrual zirlai bu hi a ṭha berin a rinawm a, phek 94 thleng awmin Rs. 50 man chauh a ni lehnghal a, mi dang tan pawh lei ngei chi a ni. Isua zirtirte, an mimal chanchin leh Isua an zui ṭan dan leh an rawngbawl zel dante ziakin mi pakhat chanchin pawh hian phek 7 laite a awh hlawm a, a ngaihnawm a, a bengvarthlak hle. UPC (NEI) beihrual buah hian mak tak maiin a chhunga Bible bung leh chang awmte hi Ephe. 5:18, 19 tih tur angah hian hmun 132-ah Ephe. 5.18,19 tih hlirin a dah a, colon dah turah full stop a dah vek hi chin dan thar a ni em ka hre lo nain a danglam bik hle mai.

Beihrual nawmna deuh pakhat chu, tlar hnung bera ṭhu tan pawh mahni ngaihdan a sawi ve theih ṭhin a, pulpit tlanga thusawi ngaihthlak ang ngawt a ni lo deuh ṭhin hi a nawmna a ni. Kohhran upate leh hruaitute chauhin hun hmang loa inkhawm kal zawng zawngin hun a hman theihna hi a hlawkna pakhat a ni kan ti thei bawk ang. Tin, inkhawm chhung a rei lo tlangpui hi a nawmna pakhat dang leh chu a ni a, thupui chhiartuin a chhiar a, a chhiar zawhah sawihona hun kan hmang leh a, chu chu hun hmangtu awm chhun a nih mai avangin darkar khat emaw lekah beihrual kan zo mai thei ṭhin hi a hahdamthlak viau. Pulpit tlang aṭanga mi malin rei tak tak thu a sawi ṭhin hi chu a chang chuan mut a chhuak duh ṭhin a, tlar hnung lama ṭhu tan phei chuan a ninawm hma duh ṭhin.

Hetianga kohhran inkhawm zawng zawngte tana hun hman theih vek a nihna hi inkhawm pangngai aia beihrual danglamna a nih avangin kan hlawkpui viau ṭhin bawk a. Kan beihrual thupui azirin ngaihtuah zui tur tam tak kan zir chhuak bawk a, a lawmawm. Heng kohhran palite beihrual bu hi a ṭhat hlawm em em rualin, lehkhabu zawrhna dawrah zuar ta hlawm ila UPC (M) beihrual bu hi hralh a kal ber ngeiin a rinawm. Isua zirtirte chanchin ziakna hi Rev. B. Lalhluna ziak leh mi pakhat ziak ka chhiar tawh a, an ziak ṭha viau nain, tuna UPC (M) beihrual bu erawh an tluk lo hle thung. Hei hi chu kawl reng tlak a niin a hlu hle mai ka ti a, ka fak viau a ni.

Kan beihrual zirlai ang deuh hian kohhran hrang hrangte vei zawng leh ngaimawh zawng pawh a hriat tiin sawi ila a dik theihna a awm bawk awm e. UPC (M) kohhran chuan Pathian thu tak leh kohhran mite tana hriat makmawh Isua zirtirte chanchin chipchiar takin an zir a, Presbyterian leh UPC (NEI) kohhran te chuan kohhran chhungkuaa thil pawimawh tak leh Pathian rawngbawlna atan pawha thil ṭul tak an zir a, BCM erawh chuan kohhran mite tana thil ṭangkai leh mamawh tur kan chhehvel thilte an zir thung. Heti maia han sawi chuan BCM kohhran beihrual zirlai bu hi a huam chin a zau thei berin a rinawm a, kan tunlai Mizoram boruak thlir pawhin kan mamawh ber a ni thei awm e.

Pathian thu pawh hian khawtlang rawngbawlna hi ngaih pawimawh a hlawh ṭhin reng a. Hmeithai, nu leh pa nei lote leh mi rethei enkawl (TT. 6:1-7), tang leh dam lo tlawh (Mat. 25:36) tihte pawh Pathian thuah kan hmu. Rawngbawltu hmasate ngei pawh khan Pathian thua kan hmuh ang hian khawtlangah rawngbawlna an lo nei tawh ṭhin a. Martin Luther, John Calvin leh rawngbawltu dangte pawh khan nasa takin khawtlang tan rawngbawlna an lo nei tawh ṭhin. A bik takin Salvation Army pawh hi khawtlang rawngbawlna avanga din a tih theih hial ang a, Catholic Charities pawh kum 1910-ah din niin, World Vision pawh kum 1950-ah din a ni bawk. Mizoramah pawh hetiang hian rawngbawlna neih a ni a, vawiin thleng hian kohhran hrang hrangte pawhin kan la kalpui reng bawk.

Kum zabi 19-naah pawh Evangelical kohhran chuan thlarau bo chhandamna leh khawtlang nun siamṭhatna chu intluk rialin an ngai pawimawh a. Chutianga rawngbawlna an neihnaah chuan a bik takin William Wilberforce (1759-1833) leh a ṭhiante chu hriat an hlawh hle a. Amah hi politician niin, Parliament member a ni a, mi hausa tak an nih bawk avangin sal chungchangah te, misual hremna te, parliament reform te, education siamṭhatna lamah te, Bible Society lamah leh chanchin ṭha hrilhna lamahte an thawh hlawk hle. An rawngbawlna (hnathawh) avang hian kum 1807-ah chuan Slave Trade Act siam a nih phah a, hmun tinah Kristian nunphung an thehdarh bawk a, kum 28 chhung parliament member nia MP hna a thawh chhung khan a platform chu Pathian rawngbawl nan a hmang ṭangkai hle.

Mizoramah pawh kohhrante hian khawtlang rawngbawlna lam kan hawi deuh deuh a hun ta hle mai a, ram rawngbawlnaah pawh Pathian hriak thih ngeiin ram an hruai theihna turin kan duhtui deuh deuh a ṭul bawk awm e.

References:

(1) Beihrual hman ṭan dan – Laldawnkimi Archivist, Synod Office June 1, 2017

(2) Kohhran member zat hi google aṭanga lak chhawn mai a ni a, a dik tak a ni e tih ngam a ni kher lo ang

(3) United Pentecostal Church of Mizoram kohhran hian Beih rual bu an zir hi Isua Zirtirte Chanchin a niin a ziaktu chu Rev. T. Laldingliana a ni a, copies 4000 an buatsaih a, a man hi Rs. 50/- a ni

(4) Baptist Church of Mizoram Beirual bu an zir hi Kan Hmachhawn Khawvel tih a niin mithiam pakua-in an ziak a ni a, zan sawm chhung atana zir tura buatsaih a ni. Copies 23500 an buatsaih a, a man hi Rs. 40/- a ni

(5) United Pentecostal Church of North East India beihrual bu zir hi Pentecost mite Pathian fakna leh chawimawina tih a niin a ziaktu chu Rev. K. Lalṭhazuala a ni a, copies 10000 an buatsaih a, Rs. 30/- man a ni

(6) Presbyterian kohhran beihrual bu hi Nilai zan thupui nena kawp a ni a, a thupui chu Mizo Kristian hlate leh a phuahtute tih a niin a ziaktu chu Rev. Lalfakzuala a ni a, copies 85000 buatsaihin Rs. 120/- man a ni. Kumin beihrual zir tur hi hetiang hian ṭhen a ni: Ni 1-6: Beihrual hawnna leh Ramthar hapta, Ni 7-20: Nilai Thupui kal zel chhunzawmna, Ni 21-27: Kristian Chhungkaw hapta leh Ni 28-30: Pathian fak hla sak leh Beihrual kharna tiin.

- Mahmuaka Chhakchhuak