SAWRKAR HNATHAWK HLAWH THAWH KHAWM HMANGA MUHCS KALPUI ANGA INBEIHNA HI!

Mizoramah hian politics-a dinchan duhna avangin inbeihna hrang hrang a lo awm tawh ṭhin a. Sawrkar hmalakna leh flagship programme te phei chuan khawi sawrkarah pawh beih a hlawh nasa lehzual bik a, chung zinga beih tawk nasa ber chu Mizoram Universal Healthcare Scheme hi a ni awm e.

Sawrkar hmasa lamahte pawh mipuite hman tur Health Care Scheme a lo awm tawh ṭhin a, chung nena tehkhin chuan tuna MUHCS hi a ṭha ber mai awm mang e, a tih theih. A chhan chu hetiang taka opposition-in an beih rawn health care hi Mizoramah a la awm ngai lo; a chhawrtu mipui mimir erawh kan lawm rih hle niin a lang.

MUHCS chungchanga inbeihna hrang hrang zingah hian politics thianghlim vak lo, mi hruai kawi thei pakhat a awm a, chu chu tun ṭum Legislative Assembly ṭhutkhawm hnuhnung bera Serlui bialtu MLA Pu Lalrinsanga Ralte-in Health Minister hnena MUHCS atana sawrkar hnathawk hlawh cut zat chungchang a zawhna leh chhanna kha a ni. Zawhna leh chhana chu mi ṭhenkhatin an duh lai chauh la vâwngin, sawrkar hnathawkte hlawh thawh khawm hmanga MUHCS kalpui angin social media lamah thu an thantir a ni. He thu hi chawhma pawh daih lo dâwt a nih rual hian, mipui kan thuhmun loh avangin mi ṭhenkhat rilru a lo hruai kawi mai ang tih a hlauhawm hle.

August ni 28, 2026 thleng khan MUHCS atana sawrkar hnathawk hlawh cut/thawh belh khawm chu cheng vaibelchhe 5.71 a ni a, hetihlai hian sawrkar hnathawk leh an chhungte enkawlna atana sum sen zat chu August 28, 2026 thleng khan cheng vbc 34.87 a ni. An thawh khawm zat aṭanga sawrkarin sum a sen belh chu cheng vbc 29.16 a ni. Sawrkar hnathawkte hlawh cut/thawh khawm hmanga MUHCS kalpui ang leh sawrkar hnathawkte hlawh cut belh khawm chu MUHCS sum hnar leh rinrâwl anga social media lama inbeihna hi thu belhchiah dâwl lo tak a ni tih chiang takin a lang reng a ni.

MUHCS hi mipui mimir (contributory beneficiary)-te'n Rs 2,500, 5,000 leh 10,000-a zawm theih a ni a, hetah hian cheng nuai 5 hu thleng a inenkawl theih a. MUHCS zawm rau rauah sawrkar hnathawk leh an chhungteah erawh chuan chutiang a ni ve lo a, policy-in a huam chinah chuan bill theih zat bituk a awmve lo. Hei hi sawrkarin a hnathawkte a vohna a ni a, sawrkarin a hnathawkte a duat a, a duhsak hi tu thîk phak mah a ni lo thung.

MUHCS-ah hian mipui mimir bakah, sawrkar hnathawkte tan pawh famkim lohna lai leh hmasawnna tur a nei ngei ang tih a rinawm a. Hetihrual hian, sawrkar hnathawkte hlawh pek khawm hmanga sawrkarin MUHCS sum chalai kual ang hrima mi ṭhenkhatin an sawi ṭhin erawh hi chu dâwta inbeihna mai a ni.

He ka thuziak hi sawrkar hnathawkte rilru tihnat tumna emaw, sawrkar hnathawkte îtsîkna emaw avanga ziak ka ni lo a, mipuiin thu dik hria se, mipuiin mimirin kan thlamuanpui MUHCS hian hmasawn zel se tih duhna rilru aṭanga ziak ka ni tih sawrkar hnathawk leh mipui mimirin min hriatpui se ka duh hle mai.

- Dr. Lalrinenga Hlawndo, Agape Lodge.