Lirthei aṭanga bawlhhlawh paih chhuah

Kum tam vak lo kal ta khan India rama state lian vak lo pakhatah hian ṭhian hoin kan zin a. Keini ho kha 'mithiam' tia sawi tur ni lo mah ila, 'lehkhathiam' tia han sawi ve mai theih tur, graduate leh master degree neite kan ni vek a. Kan zinna state khawpui chu a fai thawkhat a, mahse, duhthusama fai erawh a ni bik lo. Chu state khawpui chhungah leh a chhehvelah te, tlema han kal thui deuh ngaiah te pawh kan kal ve nual a ni.

Ṭum khat chu tourist taxi-ah hian kan chuang a, kan ṭhian pakhat chuan lirthei aṭang chuan a thil eina káwr lian vak lo chu a paih chhuak a. Kan driver chuan a lo hmu fuh hlauh mai a, taxi chu a tiding a, lirthei aṭangin bawlhhlawh an paih ngai loh thu sawiin, kan ṭhianpa chu a thil eina káwr paih tawh chhar leh turin a ti a, kan ṭhianpa pawh chuan a chhar leh a, a ak ṭha ta a.

Kan tourist taxi khalhtu chuan kan ṭhianpa chu zirna lama a thlen chin a zawt a, kan ṭhianpa chuan master degree a zawh thu a sawi a. Driver chuan zirna lama sang tak ni si, lirthei aṭanga bawlhhlawh a paih chhuak ringawt mai chu mak a tih thu a sawi a ni. Kan ṭhianpa chu a zak khawp mai a, lirthei aṭanga bawlhhlawh paih chhuah a chíng zui tawh lo chiang hle.

Aizawla taxi pú (driver) pakhat chuan a taxi chhung aṭangin páwn lamah, khawlai leh kawngpui dungah bawlhhlawh paih chhuah a phal lo a, chu chu a passenger-te ṭha takin a hrilh ṭhin. He taxi driver hi a chhuanawm a, a entawn tlak hle; driver dangte leh mipui hian entawn ila a duhawm.

Aizawl khawpui chhungah hian lirthei aṭanga bawlhhlawh paih chhuak ta hmun tur a la tam hle a, chil chhak chhuak ta mai te pawh hmuh tur an la tam; district khawpui dangah pawh a la nih a rinawm. Mihring phur chi sumdawnna lirthei (commercial vehicle) aṭangin bawlhhlawh paih chhuak hmuh tur an la awm fo a, car chângkang, man to tak tak aṭanga paih chhuak pawh hmuh tur an la awm ṭhin a ni.

City bus-a chuang ṭhinte hi a tlangpuiah chuan khawsak harsa zawk, lirthei nei ve lote an ni fo a. Chutihlaiin, mahni car khalh pha chin leh chuang thei chinte chu hausa zawk deuh an ni tlangpui a, kawng hrang hrangah changkang deuh zawk tura ngaihna a awm. Car changkang tak aṭanga bawlhhlawh paih chhuak an awm ṭhin hi chu a zialo lehzual a; car changkang si, a neitu rilru puthmang changkang tel si lo an ni ber. Sum leh pai leh an thil neihte an rilruin a ûm pha lo a ni ber àwm e.

Khawlai leh kawngpuia bawlhhlawh paih chhuah hi a changkang lo ni mai loin, a ṭhing; sim hmak tur chi a ni. Kan thawmhnaw hâk leh incheina te, kan hawiher te, kan in leh lo leh bungrua te, kan lirthei te changkang viau mah se, khaw chhung khawlaiah lirthei aṭanga bawlhhlawh kan la paih chhuah chut chut tlat si chuan, kan changkan dan a khingbai hle tihna a ni.

Zirnaa kan thlen chin hi kan nun danah a lang chhuak tur a ni. Zirlai thiam viau ringawt te, exam-naa tih ṭhat ngawr ngawr te, degree sang tak tak neih ringawt te chauh hi zirnain a tum a ni lo. Zirna chuan zirlai thiamna piah lamah, nun dan thiamna min pe tel tur a ni. Zirnaa kan thlen chin azirin mi hian min teh ṭhin a, zirnaa kan thlen chin milin kan nun dan leh khawsak dan pawh a changkang tel tur a ni. Hei hian sum leh pai neih tam leh tlem a kâwk lo.

Rawtna tlem azawng

Kan khawpui hi a lo fai lehzual theih nan kawng hrang hranga hmalak a ngai a, lirthei aṭangin khawlaiah bawlhhlawh paih chhuah a nih loh nan tun aia awmze nei zawka hmalak a ṭul. Rawtna tlem azawng han tarlang ve ila; hengte hi tihhlawhtlin a nih phawt chuan hma kan sâwn phah ngei ngei ang. Thuneitute leh a kaihhnawih mimal leh pawlte'n an lo bawhzui theih chuan a lawmawm hle ang.

* Kan rama mihring phur chi sumdawnna lirthei - bus, taxi, maxicab leh auto rickshaw khalhtu leh enkawltute hi state pawn aṭanga khualzinte laka kan ram leh hnam hmel lanna an ni a; faina lama hmasawn tur pawhin an pawimawm em em. Faina lamah tun aia hma an sawn lehzual theih nan awareness neihpui ni se; faina thuchah kengtu (cleanliness ambassador) atan hman theih an ni ang.

* Bus, taxi, maxicab leh auto rickshaw aṭangin pawn lama bawlhhlawh paih chhuah khap ni se. Khap tih hian, dan tlawhchhan tur remchang a awm em ka hre lo; a awm lo a nih pawhin ngenna ang tal pawhin tih ni se.

* Commercial vehicle chhungah bawlhhlawh báwm dah vek ni se, chutah chauh chuan passenger zinga paih tur neite pawh paihtir ni se.

* Bus, taxi, maxicab leh auto rickshaw aṭangin bawlhhlawh paih chhuak lo tura hriattirna thuziak lirthei chhungah târ vek ni thei se. Hemi atan hian city bus neitu pawl te, taxi/auto rickshaw pawl te nen hmalakho theih a nih a rinawm.

- Kezo