City bus leh a behbâwm thu nawi
Aizawl khawpuia mipui tam zawkin inkalpawhna atana kan hman chu city bus a ni a, tlâwm têa thui tak tak thlen theihna a ni a, a ṭangkai hle. A hmasain city bus driver leh conductor te zahna chibai ka buk e. City bus-a ka chuan chânga ka rilrua awm ka'n sawi leh phawng phawng ang a, inhriatthiamah kan ti a ni ang chu.
1. Ṭum khat a rei leh deuh tawh nâ chu, Zarkawt bus stand-ah hian Bazar lam aṭanga rawn chho nufa hi kawng kânin hmanhmawh takin an lo kal a, conductor hnenah ‘Ramhlun nge Chaltlang’ tiin a zawt a, "Kan tár ve reng saw, en ve mai ta che u" tiin a lo chhâng a. Han chhang ṭha deuh se aw ka lo ti rilru vawng vawng a. Inhre sa infiam an ni ang a, tih ngaihdân ka nei leh tho a, mahse, a lo ni chiah si lo. Thingtlang aṭanga rawn zin an ni tih a hnua an thil sawi aṭangin ka hre thei. Nilenga mi chi hrang hrang hmachhawn an nih avangin an mood a lo off deuh pawh a ni thei a, dem theih pawh an ni lo. Mahse, dawhthei taka passenger-te lo chiauau hi tihmakmawh a ni ve. Passenger-te hau reng mai, hrâwk deuh hrep ṭhin hi an awm leh ṭhin a, sawi leh sawi hnu, dawhtheih te pawh a ṭulin a pawimawh hle mai.
2. Conductor-te'n passenger-te chhuk lai an lo en pui vek loh châng a awm ṭhin a, chutah chuan driver-te hian passenger-te chhuk tur hi nghak thiam hram hram se, taksa lama chak lote leh kum upa lam phei chu a bik takin hrethiam ila. Passenger-te thiam loh ni si lo, driver-te’n bus din chiantir loin, tlan paha chhuktir ṭhin an awm a, hei hian chetsualna a thlen ṭhin. Tin, passenger, mipuite pawhin rem leh rem loah, kan inkawtah kher chhuk tum lo ila, a remchan deuhna emaw, stand pangaiah emaw chhuk mai ila. Lirthei kal vel kan tibuai lo ang a, hmanhmawh deuha chhukte pawh a ngai lo ang a, driver-te’n hauh an tawk lo deuh ang. Passenger-te'n rem lo deuhna laia chhuk kan dil hian hnung lama lo tlante’n kan chuanna driver an hrâwk hrep zel a, passenger-te vangin driver-in an tuar ta ṭhin a ni. Duhna apiangah chhuk tum loin, a remchang deuh tur leh stand khera chhuk tum ila chu chu kan pumpelh thei deuh ngei ang.
3. Tin, stand khata rei tak ding lo a, passenger-te chhuk leh lâwn chhung bak a din loh lai khan zirlai te, hnathawkte pawhin an sâwtpui em em a, a ṭhatzia hahîpin an sawi ṭhin. Kha kha kal tlangpui zel thei se chuan a lawmawm ngawt ang. Ṭhenkhatah hian rei deuh deuh an la ding a, a ninawm bakah kan tum angah kan thleng thei lo a, hmanhmawh deuh phei chuan traffic jam thut nen rilru a hah ṭhin hle. Drop & pick system kha kalpui zel se a ṭha ngawt ang.
Heng ka han sawi tâkte hi indemna rawngkaia sawi a ni lo a, hmasawn duhna aṭanga lo chhuak a ni a, duhthusam a ni e. City bus driver, conductor leh passenger, mipui ten kan tih theih tâwk ṭheuhah ṭan i la teh ang u khai!
- P. Chhana