Driver-te dinhmun

Driver-te tih hian a huam zau a, mahse, vawiina kan sawi tur hi chu eizawn nana hmangtute an ni. Ka tawng tu huatthusuhah High school pawh rap mumal lote an ni duh hlawm khawp mai. Chhungkaw rawn seilenna pawh then khat chu ho ve tak tak te an ni. Tun hma phei kha chuan zu leh nula duh ve tak tak an ni hlawm bawk. An zingah mi fel ve tak tak, milian/ hausa rawn ni ta te pawh an awm. 

Khawpui chhunga motor khalhtute hi- officer lian leh mi zahawm etc. an awm nawk. Mahse, driver tam zawk hi chu mi motor khalh, hlawh tlem te a rawih an ni. Hetih lai hian sawrkar motor khalhtute erawh an hlawh a ṭha hle. Motor a accident palh chuan sum tam tak leh nunna hial pawh chan theihna a ni. Accident 78% hi driver fimkhur tawk loh vang a ni an ti (Traffic report). Zu, drugs etc. leh tlan chak lutuk, mobile phone hmang chunga khalh vang a ni deuh ber ṭhin. 

Driver ṭhenkhat chu mahni thiamlohnaah pawh vin riau mai an awm. Vawi khat chu taxi hian mi rawn thawi thuak a, tun ṭum chu kan hau ve reng reng teh ang, kan ti a. Kawngkhar tukverha kan dak chu chiang tak mai hian mi en kal a. “A va hlauhawm ṭhin ve,” kan ti chu “ka su lo che,” tiin zahpah lo tak mai hian mi en reng a, kan boruak chu a ṭang ta hle mai a. Ka tihpalh lutuk te han ti ve mai mai sela kan ṭha tlang ni mai tur, mah se a ti ta mang si lo! 

Danah chuan acci­dent a awm reng rengin police station hnai berah register tur a ni. Thihna a thleng a nih phei chuan IPC-section 304A, angin criminal case siam tur a ni a, police-te lo thlen nghah hi driver-te (duty) tih ngei ngei tur a ni. Chak lutuka motor khalh hi dan bawhchhiatna a ni a, 6 months jail/ Rs 1000 chawi theih a ni. 

Mi sut hlum palh emaw-ah chuan, an in ngaidam a nih pawn, case chu a kal zel tho a, mah se hetiang inremna ang chi-ah hi chuan tlemin a case a ziaawm deuh ṭhin. Ngaihhnathiamna a awm ṭhin. Chuti a nih loh chuan dan hi a khawng hle. Hman deuh pawh khan bolly­wood film star-Salman Khan chu hit & run case avangin kum 5 jail tang tura hrem a ni. Hei hian tumah dan chunga leng kan awm lo tih a tilang. 

Mizorama motor lo luh kum hi 1949 niin ka hria. Kan kawng­puite a chhiain a hlauhawm ṭhin hle a, mah se kan driver-te an thiam ṭhin khawp a, eng em em chu kan tawk ngai lo. Tunah hrih chuan mi kan intih palhin emaw thihna a thlen pawn kan in bawihsawm liam liam ṭhin. Hnam dangte tih dan - tlanbo san mai, tlan chhiat san mai hi kan ching ve mai ang tih a hlauhawm hle. 

Mahni sahim nana leh nunna tura loh theih loha kan ti a nih loh chuan i tum ve lo hram ang u, motor khalh nuam vek ule. 

- Lalchhandama Colney