CHIEF MINISTER LEH PARTY PRESIDENT NIH KAWP
Ruling party ZPM chuan an sorkar hmaa an lo auhla pakhat, ‘Chief Minister leh Party President nih kawp loh‘ chu tlin reng bik ta loin, CM ni lai Pu Lalduhoma chu kum 2026–2029 ZPM Party President atan Val Upa Council chuan an ruat ta a. Hemi chungchang hian titi a titam a, a ṭhen phei chuan puhmawh tur an zawng ruai mai. VUC member pahnih chuan VUC aṭangin bânna an thehlut hial a ni. An bân chhanah thil dang puh tel ve bawk mah se, a bul ber chu he thu hi a ni tih a lang reng mai.
ZPM pian hmain Exodus Movement pawlin ‘CM leh Party President chelh kawp loh’ an tum thu Pu K. Sapdanga’n a sawi a; CM Pu Lalduhoma pawhin ZPM an sorkar hunah chuan collective leadership-in an kal ang a, CM-in Party President a chelh kawp lo vang a ti ṭhin ngei a ni.
Chuti ni si tuna taka chelh kawp tura VUC-in an ruat leh tak le? An party-ah harsatna lian tak a awm em ni? Nge, CM leh Pu Sapa inkar khi awm anga sawi hi thu tak tak a ni a, chuvanga CM leh Party President chu chelh kawp ngai ta em ni zawk?
Hemi chungchangah hian party hruaitute pawh an lu a hai hle ni awm a ni. Ka hriat sual loh chuan, party rorelna sang Executive Commitee Meeting pawh vawi thum/li lai an inhmukhawm a, an Constitution-a chelh kawp theih loh pawh siamṭhat hial ngai ta niin a lang. Amendment an siam (Pu Sapdanga rawt)-ah chuan Minister dang tel loin CM chauh nih kawp theih an ti ta a nih kha.
ZPM party hruaitu ṭha an tam a, mahse, filawr bik, mi zawng zawngin leader ena an en theih an awm vak lo. CM Pu Duha erawh an sorkar hma rênga Leader nih leh Chief Ministerial Candidate ni sa kha a nia. Kum 40 dawn lai ram tana lo vâkvai tawh a ni bawk a, a experience chu a ṭha a ni. Mi zawng zawngin leader ena kan en tlan a nih avangin CM ni chunga party hruaitu nihtir ta mai a niin a lang. Ruling party ve lem leadership quality nei ṭha, miin an chungen ngei neih mamawh an inti bawk ni ngei tur a ni.
Company/organisation lian tak pahniha Managing Director leh CEO ni chelh kawp tura a inchan a ngai ang. Sorkar lama CM a nihna kan hria a, kum 3 hmel kan hmu ta a. Engkim mai a chalah phûng a tawp tih pawh a hre tawh turah ngai ila. Vanneihthlak takin work department a chang lo hlauh. Chuvang chuan a rilru leh a ngaihtuahna tam tak party organisation lam a hawi a ngai ngei ang le. Chuti chung pawhin party-a a thawhpui senior vice president te, vice president te, GS te leh adt a hui khawm thiam hle a ngai dawn a ni. CM a nih ang bawkin Mizoram pum a bial a ni dawn tlat. A hmaa party organisation chhunga neuh neuh sawi awm thin ang chi thlenga solve thiam hle a ngai dawn. Hunin a hril ang a, a êng zawngin i lo thlir teh phawt ang. Organisation lian tak 2 enkawl tur a ni a, râla khata enkawl ngawt lova party office lam pawh a tlawh fo a tul dawn a ni. Thu zaizâp thiam tak nih pawh a ngai hle ang le.
- Zika, Falkland Veng