WHAT THE BIBLE SAYS!

Tun lai chu kan Zoram khawvelah Sabbat leh Sunday serh chungchang kan ngaihtuah viau a ni ang, evangelist te pawh an inchhang ni âwm tak a ni. First hand a dawng leh hria ka nih loh avangin Sabbat leh Sunday thu hi Bible sawi dan han pho chhuah mai ka tum a ni. A tu amah kâwk bik lovin What the Bible Says kan ngaithla mai ang. A hmasa berin Bible-ah hian thuthlung pahnih a inziak a. Pakhat chu Sinai tlanga Pathianin Mosia A pêk Dân kha a ni a. Pakhat chu Kalvari tlanga Lal Isua thisena siam Thuthlung Thar a ni. Kha Dan thuthlung kha chu Chithlah (Lal Isuan) thu A thlun thar hma (before)a hman tur a ni Paulan a ti (Gal 3:19). Chu Chithlah, Lal Isua chuan krawsa thia tho lehin keini misualte tan Pathian mit hmuha felna, vanram kai theihna kan hmuh theih nan Dan A tihbân thu kan hmu bawk (Rom 10:4). Chu Dan, kan zawm theih loh avanga min dodâltu lo ni tlat kha kraws-ah khengbetin A la kiang ta tiin Kolosa kohhran mite a hrilh bawk (Kol 2:14). Dan hi chuan kraws a pêl ve thei lo kraws-ah khan a tawp e!

Sabbat ni serh tur thu hi Dan zinga mi a ni a, krawsa khenbeha lâk kian tâk kha a ni (Kol 2:14). Chuvangin Dan zâwm tur zawng chuan tu ma'n kan aw kan chhuah a thiang tawh lo! Dan hi a la awm reng chuan Pathian khawngaihna avanga Krista felna kan hâk tur kha kan ha thei lo vang. Dan leh Grace hi chu mei leh tui ang an ni. Dan a awm chuan khawngaihna (Grace) a awm thei lo.

Dan tam tak a awm a, mahse an zavaiin inzawm vek (united) an ni a, Dan 100 awm se, 99 zawm ta la, Pakhat chiah kha zawm thei lo ta la, Dan zawng zawng zâwm lova ngaih i ni a, a zavai bawhchhe veka ngaih i ni. Chu chu Jacoba sawi dan a ni (Jacob 2:10). Paula chuan he thu ang tho hi heti hian a sawi "serh in tantir chuan...Dan thu zawng zawng zâwm tura batu in ni" a ti (Gal 5:2,3). Chutiang chuan Sabbat hi serh tur a ni titu chuan a serh a tantir a ṭûl ang! Sabbat serh hi Dan zinga mi a nih avangin Dan pakhat va zawm kha Dan dang zawng zawng zâwm tûra batu an ni tiin Paula leh Jacob-a chuan an sawi a ni.

Sabbat hi thil hlim (shadow) a ni, a tak chu Krista a ni (Kol 2:17). TEV (Todays English Version) chuan sabbat chu "a shadow of things...the reality is Christ" a ti. Dana awm ve sabbat kha thuthlung thara lo lang Lal Isua "hlim", shadow a ni a. A tak tak, sabbat chhungmu chu Krista hi a ni. A tak A lo kala krawsa thia tho leha khawngaihna avanga vanram kai theihna min pek tawh hnu kum 2000 aia tam a liam hnua a hlim thla (shadow) lo serha lo buaipuite hi chu a va han khawtlaithlâk lutuk deuh em! Sabbat ai hian Pathianin Sunday hi A ngai pawimawh zawk a ni ang, Israelte Lal Messia A nih Juda mipuite hnena A inpuanna nî atân Sunday hi A thlang a, Hosanna tiin kan au rual ṭhin kha. Sual thihna hnehna Nî atan Pathianin Sunday hi A thlang leh tlat! Chu mai ni nâng, Thlarau Thianghlim rawn tirh thlakna nî atân Sunday hi Pathianin A thlang leh tlat! Sabbat chu Lal Isua hlim thla (shadow) a ni a, Amah tak A lo kala, A thi a, A tho leh tawh a, vanah a lawn chho tawh a, chuvângin lei sabbat hi a zâm ral tawh. Pathianin A ngawih bopui tawh, sawi sawi te hi a zahthlak lam zawk a ni. Pathian hunbi ropui hmanna nî (day) chu ni sarih ni hmasa ber, Sunday zel hi a ni tawh a, a tak (the Reality) Krista A lo kal tawh avangin Sabbat serhna tur chhan reng reng a awm tawh lo! Rom bung 14 kha han chhiar chhuak teh. Ni serh bik te, ei leh in tur bikte a awm tawh lo, a eitu leh intu azira zalenna hun a ni tawh a. Ni serh thuah pawh mahni remchan dan dan a ni mai. Amaherawhchu, kohhrante hi awmho tur leh rawngbawlho tur kan nih avangin kâr khata eng ni ber emaw hman chu Pathian duh dan a ni ang, ringtu hmasate pawhin zirtir ngai lovin Lal Isua thawhlehna Nî an lo hman ṭan daih tawh kha (I Kor 16:2).

Sabbat hi kan khawvel nî (day) hi ni lovin, thlarau lam thil kawk a ni zawk. A hmasa berin Krista a kawk a, a dawtah Amaha chawlhna a entir leh a. Zirtawp zawha lo chhuak nî (day) mai ni lovin Amaha thlarau lam hahchawlhna kâwkin Hebrai ziaktu pawhin a sawi kha (Heb 4:6-10). Tichuan sabbat chawlhna chu kar khata vawi khat ni lovin ni tin chawlhna a ni e! Hetianga châwl i nih chuan i hahdam ngei ang.

Ka rin dan ka han share teh ang che u. Messia A nih puanna ni ropui atân, Sual thihna hnehna nî atân, Tinungtu Thlarau pekna nî atân Sunday hi Pathianin A hman zel avang hian Mi Thianghlim Lawr te, Lal Isua lo kal lehna nî atân pawh hian Sunday hi A rawn hman leh ngei ka ring hle a ni! Ring ve tak che maw!

- F. Lal Thanzuala. 9436141242