Thil kan chîk hmasak a pawimawh

Social media hmang thiam tak Coachroach Janata Party hotute chuan kumin 2026 September ni 24 khan press conference an nei a. Chief Election Commissioner Gyanesh Kumar chu SIR kalpui danah leh vote nei nuai tel paih an nih danah dik lo taka thil ti ṭhinah an puh a, bâng turin an phût a, a bân loh chuan India ram pumpui huapin a bân theih nan an nawr dawn thu an puang a ni.

News report ka hmuhah CJP hian Chief Election Commissioner bâng tura an phûtnaa hun tiam an siam chu darkar 48 chhungin, tih niin ka hria a. Mahse, Gyanesh Kumar chu a la bâng ta lo va, CJP hmalakna thâwm thar pawh a awm rih lo a nih hmel.

CJP hian thla 2 vel kal ta khan India ram pumah thawm an nei na em em a, Mizoramah pawh a rawn thleng ve a. Sonam Wangchuk-a hmalakna thlâwpin, India sawrkar laipuia Education Minister bân phûtin nasa takin an nawr a, Mizoramah pawh mipui, a bikin ṭhalai tam tak an pungkhawm a nih kha.

Central Education Minister bân phût chhan te, NEET 2026 question leakout tih te, zirna siamṭhat tih velte kha CJP leh Sonam Wangchuk hmalakna thlawptu Aizawla ṭhalai pungkhawmte khan an ngaihven tak tak lo va, a phawvuakah an tâl vel mai mai a, social media-ah a lâr em avangin tlaikhawhnuah an ngaihven ve mai ni hian ka lo hmu pek a. Punkhawmnaa an chet dan leh ṭawng dan aṭang khan a hriat theih. A chhan han sawi ila.

Pakhatna: NEET zawhna leakout kha thla khat chuang a liam thlengin Mizo ṭhalaite tam zawkin an ngaihven lo, thla khat chuang a liam hnu, Sonam Wangchuk-a te hmalakna social media-a a darh nasat viau hnuah an ngaihven ve chauh. MZP leh MSU pawhin hmalak an tum lo, social media pressure zo lovin, chawpchilh takin an pungkhawm ve mai a ni.

Pahnihna: An punkhawm chhan pakhat 'Zirna siamṭhat' tih a ni a. India ram leh Mizoram zirna kalphungah englai chu nge siamṭhat an duh, khawi lai nge siamṭhat ngai tih an sawi miah lo–'Zirna siamṭhat' an ti ve tawp mai. Zirna siamṭhat ṭul titu chuan siamṭhat ngai lai a hre tur a ni dawn lo'm ni?

CJP-in Chief Election Commissioner bâng tura an nawr dawn thu an puang leh ta, ṭhalaite'n an thlâwp leh viau mai thei a, an nawr na leh viau maithei. State dangah an lo ri luih luih a nih pawhin, Mizo ṭhalaite chuan lo tâwngpâwng thlâwp ve mai lovin, thil nihna dik tak kan zir chian hmasak a ṭul. Vanglaini Editorial-ah pawh tun September ni 28 khan an rawn ziak nghe nghe a, a ṭha khawp mai–ka duh aiin an la ziak dîm mah mah zawk a ni.

Thil dik lo tak tia Chief Election Commissioner an puhna hi a dik a ni thei a, state tam takah chuan khua leh tui dik tak electoral roll aṭanga paih mi tam tak an awm pawh a ni maithei. Chumi avang chuan India ram khawpui lian leh state dangah te chuan lo pungkhawm hup hup se, a ṭha mahna.

Mahse, Mizoram mipui, ṭhalaite erawh chuan kan ram Mizoramah dik lo taka thil tih a awm em, dik lo taka voter paih an awm em tihte kan chîk hmasa tur a ni ang. SIR kalpui tawhah Mizoramah dik lo taka tih a awm kan hre si lo a nih chuan, CJP emaw, pawl dangte emaw pawhin lian tham taka hma an lak avang maia helaiah, Mizoramah mipui tan harsatna siam thei zawnga hma lo lak ve kher a ṭul ve lem lo tih kan hriat a pawimawh khawp mai.

- Lalthansanga