PRANK VIDEO PAHNIH

Video pakhatna

Tleirawl, tlangval ve uaih tawh Reubena zu rui chu an sitting room ṭhutthlengah chuan a chatthla a, chhuata chawhtawlhah chuan a luak chu a kâwi deuh nuaih bawk a. A nu leh a nau hmeichhe naupang chu a bula ṭhutthlengseiah chuan an ṭhu ngawi rân a, a pa lo haw hun chu an nghak tawp mai a ni.

Rei vak loah a pa pawh chu a lo hawng ve mai a, a fapa zu rui chatthla leh chawhtawlha luak kawi deuh nuaih mai a han hmuh chuan a beisei loh lutuk thil a tawng tih hriat takin a hamhaih ve hmel hle mai. Ṭhutthlengseia a fapa let reng mai chu a han sawi deuh nawk nawk a, “Bawiha, tho teh, tho teh,” tih pahin dîm vak loin a fapa chu a han tung tho nawk nawk a. “Zu i in a ni maw? Khawia mi nge i in? Tute nen nge in inkawm?” a han ti a. Harh chiang vak loin a fapa chuan meng leh meng loin a chhang buh deuh nuaih a. A pa ngaihdan chu a nih loh hmel khawp mai. A han ngawi deuh vang vang a, chumi hnu chuan, “Bawiha, hetiang hi i tih duh ka lo ring ngai lo a, ka rilru a na khawp mai,” a han ti a. A fapa vawi khat zu ruih avang chuan a pa rilru chu a na vawng vawng mai a nih chu.

Kan ramah hian fate zu ruih avanga, “Bawiha, ka rilru a na khawp mai,” ti thei dinhmuna ding pa engzat tak awm ang maw? Hetianga fapate zilh ngam tur chuan pa hi ruih theih thil laka a fihlim a ngai tlat a ni. Kan ṭhalai tam tak hi hetiang kawnga entawn tur pa an neih loh vanga zu bâwiha tâng ve ta hi an ni deuh fur mai lo’ng maw? Pa ber zu in leh zu rui lai an hmuh fo chuan an in ve mai nâk loah. Mizo thufingah pawh, “Sunhlu kungah thei dang a rah ngai lo” tih a nih kha.

Zûk leh hmuamte pawh hi nu leh pain kan tihhmuh a ni zawk mai thei asin. A dik tak chuan pa berin chaw ei kham puar peng pawng laiin kuhva hring ṭhial sak sak pahin tui tih hmel takin cigarette a han hnarkhuchhuah ham ham a, naupang tan chuan tui hmel deuh asin. Kan ṭhiannu fapa pawhin tui tih hmel taka a pain cigarette a fâwp vang vang lai chu a lo en doh doh a, “A pa meizial zuk hi a nawm hmel e. Ka len hunah ka zu ve ang,” a ti mai a sin.

Zuk leh hmuam laka kan fate fihlim tura kan duh chuan nu leh pa hi kan fihlim hmasak a ngai a ni. Zu leh ruihhlo laka kan fate fihlim tura kan duh pawhin pa kan fihlim hmasak a ngai tho. Reubena pa hi chu ruihhlo lakah a fihlim a nih hmel khawp mai. Vawi khat chauh a fapa zu rui lai a hmuh pawhin a rilru a na vang vang em mai. Vanneihthlak takin intihderna (prank video) a lo ni hlauh mai pawh a!

Video pahnihna

Malsawma (Malsawm Photography) zu rui chu an in chhungah chuan a ri lûng lûng a, ṭingṭang a la a, a zai a, ring takin a fate chu a ko a, a bula ṭhu turin a au chûl a.

Chutianga a zu rui phûl hlut mai an hmuh chuan a fate pawhin mak an ti hle a, an hamhaih hial zawk a ni. A pain a bula ṭhu tura a auh lung lung pawhin an ṭhu ṭha duh lo. A pa chuan a han au leh lung lung ṭhin a, a bulah chuan an lo ṭhu zawk a, ṭhut reina tlakah an ngai lo pawh a ni mahna, an kal sawn leh zel a. A pa chuan a bula ṭhuttir vek chu a duh bawk si. “Lo ṭhu lawk teh u, thu ka sawi dawn,” tih pahin ṭhutthleng chu a han chûm vak vak a, a châng leh a tihngaihna hre lo chuan sap ṭawngin, “Come here” a han ti thûl. Sap ṭawnga kohna pawh ni raw sek sek, a fate chuan zu rui kohna chu an ngai pawimawh vak lo a ni. An pa mangang tihngaihna hre lo chuan, “Ka bula in lo ṭhut loh chuan ka chhuak ang a, a aia tam ka in leh ang,” tiin a han vau ngawt a. Chutah a fanu pakhat chuan, “I ngam chuan in leh la, ka tlanbo nghal a ni mai,” a ti a nih chu! A pain vawi khat lek zu a ruih pawhin a fanu chuan tlanbo a tum a nih chu. Tlai tin zu in ṭhin pa, a zu ruih pawha fate’n ngaia an neih mai mai tawh chhungkua nen chuan a kar a hla mang e maw!

A tawpah an pa chuan a bula ṭhu tur chuan a fate chu eng emaw ti tiin a hmin thei ta hram a. Chutah zaizir meuhin a fate hmaah chuan patling a insawifiah ta a, “Ka ṭhiante nen chaw kan ei ho a, ka thil in turah ka hriat lohin zu an lo pawlh a, eng nge a nih tiin ka in ve chhin a,” a han ti leh zut zut a. Chutah a fanu upa zawk chuan ṭap deuh pàr chungin, “Tih chhin a awm thei lo titu kha nangmah i ni lo’m ni?” a han ti leh ta kauh mai a. He ṭawngkam khat lek hian thu a sawi thui mang e. A pa hian a fate hi ruihhlo laka fihlim turin a fuih nasa ṭhin tih a chiang reng mai. “Tih chhin loh a him ber. Tih chhin a awm thei lo. Ruihhlo ngawl vei zawng zawng hi ngawl vei tum sa tu mah an awm lo. An tih chhin vanga ngawl vei vek an ni. Chuvangin, tih chhin loh tawp hi ruihhlo laka fihlimna awlsam ber chu a ni mai,” tiin a fate hi a zilh fo ṭhin tih a chiang reng mai.

A tawpah an pa chuan, “Chuvangin, zu in ngai lo pa, rawn rui der in hmuh hian lawm rawh u,” tih pahin a camera thuhruk chu a han kâwk a, a fanute lungchhia inhnih faih faih pawh an hamhaih zo ta a, an ṭahnuih vel ta mai mai a; prank video lo ni rengin. Comment pakhatah chuan nula pakhat chuan beidawn hmel deuhin, “Ka pa hian hetiang hian min prank ve se ka va ti em!” a ti vang vang mai. Ngaihtuah a tithui reuh mang e.

- Dr. K Lalrinchhana