ELECTION COMMISSION OF INDIA SIR (Ref–Vanglaini Editorial 28.09.2026)

Vanglaini chuan a op/ed phekah Election Commission of India in Special Intensive Revision (SIR) a kalpui dànah thil dik lo a awm avanga ECI Chief Election Commissioner Gyanesh Kumar bâng tura opposition party Congress in an nawr chungchang chu 28/09/2026-a editorial-ah rawn ziakin hetah hian Mizote chu lo phur ve hurh lo tur zawngin mipui min chah a. Vanglaini thlirna zâwn aṭang chuan thil tihawm tak a nih laiin, ECI thil tih danah hian India Danpui leh dân (law) hrim hrim palzutna a awm ngeia a lan avangin dân ngainatu tan chuan phûr lo tura lo inchah ringawt hi chu thil dik niin a lang lo.

Hemi chungchanga lungàwi lohna lantir hi Mizo mipui tan fimkhur ṭhaa Vanglaini chanchinbu hian a hriat chhan ni pakhata lang chu India khua leh tui dik tak ni lo, Mizorama vote lo nei ve ringawtte laka inven a ngai nia a hriat vang a nih hmel a. Hei hi Mizoram bik tân liau liau zimtea kan ngaihtuah chuan thil tihawm tak a ni reng a ni. Ama'rawhchu dàn palzutna chungchangah hi chuan thil dik lo leh ṭha lo do ngam tura infuih hi a ṭul zawk hlein a lang a, SIR ECI-in a kalpui dan chungchang hi kan hriat chian tawk loh vang pawh a ni mahna.

Tun hma chuan Election Commission of India hian Chief Election Commissioner chauh a nei ṭhin a. A hnuaiah hian state tina Chief Election Officer-te chu an awm leh a. ECI CEC hi thu hle mah se, India Danpuite ṭha taka zàwma inthlannate a kalpui ṭhin a nih chuan mipuiin anmahni aiawha rorel tura duhthlanna an neih chu palzutna a awm lo a ni. Kum 1990-a Congress sawrkarin T.N. Seshan CEC-a a ruat kha mi ṭha tak, thil dik leh kalphung dik ngaina mi a ni a. Ani khan ECI kalphung hi a ṭha zawnga thlak danglamin voter lem awm theihnate leh inthlan tih chingpen theihna awm theite chu a siam ṭha hmak hmak mai a. Inthlan tihchingpen theih lohna tura hmalakna kha awm chu khatih hunlaia Central-a Congress sawrkar khan a ngai thei ta vak lo nge, mi pakhat hnena inthlan chungchanga thuneihna pek vek mai kha ṭha lo a ti a, tichuan CEC bakah hian Election Commissioner pahnih dang awm ve turin Dan a siam ta a, heng mi pathumte thuneihna pawh inang vék turin a khairual bawk a ni. Hemi awmzia chu ECI-a Commissioner pathumte chu an thutluknaah kawikawm anga an rik rual ṭhap ṭhap loh chuan thutlukna kalpui theih an nei lo tihna a ni. Tichuan, ECI-a Chief Election Commissioner chuan làl hrawt theihna a neih ṭhin chu tihtawpsak a ni ta a. Heti a nih tawh lai hian tuna CEC hian lal a hrawt tho niin a lang a, hei hi mipui leh opposition party lama lungawi lohna chhuah chhan chu niin a lang.

India rama inthlan kalpui chungchangah hian ECI hian thuneihna sang tak a neih laiin voter chungchangahte, vote thlak hun chungchangah te chuan State tina State Election Office-te hian thuneihna/thurawn pek theihna nasa tak an nei ve tho a. A kipkawia kan sawi dawn chuan he article hi a sei lutuk dawn a, kai tawi ta mai ila. Heng State Election Office thuneihna thleng hian tuna ECI hian a pum hmawm niin a lang a. Sawisel hlawh tak, Bihar leh West Bengal-a an Assembly election neih hma lawka SIR kalpuite kha tunah hian a kalpui danah leh a siamṭhat leh dan turah ECI hian dan a palzut nasa hle niin, Indian Express-in he thil a chhuina a rawn puanzar aṭang hian a lo lang ta a ni.

Sawi hlawh lar tak pathum a awm a. Pakhatna chu ECI-in thil a kalpui danah hian Election Commissioner-te hi an lungrual lo a. Election Commissioner Sukhbir Singh Sandhu leh Vivek Joshi te hian CEC Gyanesh Kumar chuan anmahni ráwn lovin leh, an hriatpui lohin thil a ti nasa tiin Cabinet Secretary Dr. T. V. Somanathan hnenah an zualko hial a ni.

A pahnihna chu voter nih dilna, Form 6 an tihah hian a diltu chhan tur, an thlahtu pi leh pute chungchang dah belh a ni a. He form hi ECI hian ama thuin a tidanglam emaw, a tihbelh emaw, a paih ṭhen emaw thei ngawt lo a, Form 6 tihdanglam hi India sawrkar thuneihna a ni. Hei ringawt pawh hi ṭhenkhat ngaihdanah chuan dan bawhchhiatna lian tak a ni.

A pathumnaah chuan voter-te e-roll-a thunna, computer software chungchang a ni a. Tun hma chuan State Election Officer/Electoral Registration Officer te hi voter paih emaw, dah belh emaw, eng emaw thila siamṭhat emaw a ṭul chuan ECI computer-ah hian lutin an khawih mai ṭhin a. Tunah erawh chuan State eng emaw zat a SEO/ERO te chuan ECI computer-ah hian engmah an khawih thei tawh lo niin an sawi. Hmanni maia SIR avanga complaint lut Goa sawrkara SEO/ERO chuan a endiknaah mi 92 e-roll a thun leh an ngai tih a hmuchhuak a. Heng mite hi thun an han tum chu, ECI-in computer-a a kawl ṭhat e-roll chu an khawih danglam thei ta miah lo a, heng mi 92 hi e-roll-ah thun theih an ni ta lo a, tun dinhmunah chuan an vote hlu tak kha an chân a ni ta ringawt mai.

West Bengal CM ni ṭhin, Mamta Banerjee "Didi" pawhin April 23 leh 29, 2026-a Assembly inthlanah khan voter hming dik lo taka paih a tam avangin kan chak lo tiin Supreme Court-ah a zualko mek a, inthlan neih ṭhat a duh a. West Bengal-ah hian e-roll aṭangin mi nuai 27 bawr vel paih an ni a, heng zinga mi nuai 22 vel chuan complaint an thehlut a ni. West Bengal-ah hian an inthlan lai la la khan e-roll chungchangah harsatna tam tak a thleng a, election buaipuitute pawh an buai hle a ni.

BJP sawrkar hian ECI hi a thunun tlata ngai pawl tam tak an awm a. Ngaih ti ṭha lo tur hian Bihar leh West Bengal-ah inthlan hun hnai tawh takah hnawhsarum takin Special Intensive Revision hi kalpui a ni a. Voter nuai tel teh meuh paih a nih hnu leh, complaint awmte pawh chinfel hleih theih a nih tawh loh hnuah inthlan hi buatsaih a ni a, BJP an chak ta rêng a ni. Hemi bakah hian BJP sawrkar hian Chief Election Commissioner and Other Election Commissioners Act, 2023 chu kum 2024 kum tir khan a hmang ṭan a. He Act-a Section 16-na chuan ECI Commissioner ni lai emaw, ni tawh emaw te chu official-a an thuneihna an hmanna emaw, an thil sawi emaw leh thil dangah dan bawhchhia anga court-ah khin theih an ni lo ang, a ti a. He Dan hian sawisel a hlawh hle bawk a, he Section 16-na hi Supreme Court-ah khin mek a ni.

Inthlang ram kan nih avangin India khua leh tuite hian kan aiawha roreltu tur kan thlan theihna, Electoral Roll (e-roll) hi a pawimawh em em a. He roll-a kan tel loh chuan tu mah kan aiawh tur kan thlang thei lo tihna a ni a. Politics taka chak duh vanga thil palzama, palzut theite'n he thuneihna kan neih ve an nawm an maka min paihsak hi a huatthla awm a. Chuvangin, India khua leh tui dik takte chu vote paihsak kan nih loh nan ECI leh SIR chungchang hi kan ngaihven a ngai hle a. Hetianga titu political party hi an lo awm a nih chuan chu political party chu kan hnungchhawn a, kan zawm ve loh a ṭha hle ang.

- David M. Thangliana