Ṭhalaite

Kan ti nek nek a, October thla kan thleng leh ta reng mai. Boruak nawm hun lai tak a ni bawk a, mi tin mai kan hlimin kan phur viau ṭhin. Kan ṭhat ve hun lai kha chuan hmanpui tur, ar kanpui tur lam rilruah a awm ruih tawh ṭhin. A Kristian deuhte chuan ṭhalaiten tur sual rawng an bâwl lohna tur lam thilte an ngaihtuah a. Nia, tun ang hunah hi chuan kan rilru hi a phâwklêk kan ti dawn nge, a phûr sûrh tawh ṭhin. Ṭhalaitetan phei chuan kawng dik lo zawh te a awl duh khawp mai. Mahse, vawiinah chuan kan fing tawh a, ngaituahna fim tak hman nachang kan hre tawh a, a lawmawm hle.

Kan han tleirawl chho a, ṭhianten an tih ang kha chu tih ve zel kan duh ṭhin a, kawng ṭha lo kan zawh phah ṭhin. Kan khawsak kan tisang a, kan dinhmun phu loin kan awm ṭhin, chu chuan rilru lam piansualna a siam duh hle. Kan ṭawngte kan hmuhsit emaw tih mai turin sap ṭawng kan uar a, kan incheinate pawh a changin khawchhak lam style, a dangte pawh. Sapho tih danin, ‘Its my life,’ kan ti a, mahse, keini chu nu leh pa thawh chhuah ring kan la ni ṭhin. Aia upa zahnate pawh hi kan nei lo thin a, a chhan eng nge ni ang le? Gym-a kal hi chu kan phûr viau mai a, mahse, kea kal kan peih lo, thui lo tê pawh scooty-in kan ti zel mai.

Tun hma kha chuan matric pass kha harsa kan ti ṭhin a, vawiinah chuan graduate val kan ni fur tawh. PhD tih te kan ṭhalaite an ni fur tawh mai. Hna pawh an thawk nasa, ram pawnah te kalin kan inhlawh ve nasa, a ṭhente phei chuan an chhungte pawisa tam tak tak an rawn thawn ṭhin. Hnam dangte thawh tura kan ngaih deuh ṭhin cement mistiri, muṭia, etc. te pawh kan awm ve ta nual mai; a lawmawm hle. Lemchan lamah pawh hma kan sawn a, Mizo film star, hmelṭha leh zei tak tak, mipa lamah pawh thiam ve tak tak kan nei ta. Infiamna lamah pawh kan hming a thang ve ta a nih hi, India-ah na nâ nâ chuan.

Kan ṭhat ve tawh viau rual hian hmabak kan la ngah hle. Mipat hmeichhiatna lamah kan fimkhur em em a ngai, hri ṭha lo tak tak kai a awl si. MSACS data aṭang chuan ṭhalai lam an langsar ṭhin hle. Kan hunbi hman danah pawh hian kan harh a ngai. Men rei lutuk, mut rei lutuk, kan thil ei ṭhin leh ei hun te a dik chiah lo ṭhin a, nakinah kan la buai dawn a ni.

Kan nun dan inthlak mek–hmeichhia zawk eizawngtu, mipa in lamah; kan harh thuai a ngai. Hnam dangte chimral hlauhawm tihah pawh hian ṭhalaiten tharum ni loin, taimakna, ṭhatna, felna tein hna kan thawk thei. Ṭhalaite kan pawimawh em em, ram leh hnam future tur kan ni si a.

Aw le, ṭhalaite tih atana ṭha hi chu kan hre hlawm viau a, a tih tak tak lam hi a harsa ṭhin a ni. Hmun hrang hrangah kan vâk darh ve a, lehkha zir, hnathawk, etc. ten; chuvang chuan, tih dan ṭha zawk, hlawk zawk te kan hre thei ang. Ṭhalaite kan chak a, kan fin thiam viau chuan kan nu leh pa, rualute kan tihahdam thei ang. Nakin lawkah ram hruai hna, kohhran leh a dangte hruai hna kan kutah a la awm ve leh mai dawn, chumi atan chuan kan inbuatsaih deuh deuh a ṭha e.

- Lalchhandama Colney

Ph – 9862982321