I SAWI ZAWNGIN I NIHNA A LANG E

Tunlai khawvelah Mizote pawh hian Social media kan hmang ṭangkai ta hle mai a, Politic thilah te, eng pawl thil tihte emaw leh tualthi an awmte hian kan fawn (phone) aṭangin kan hre nghal thei zel tawh a. Heng kan thil hmuh leh hriatte hi kan ngaih dan sawi zui (comment) theihna pawh kan nei leh ta zel a, Rei lo teah kan thil sawi comment-te hian hmun hla tak tak a thleng zel tawh mai bawk si nen, kan changkang tawh tih loh rual chu a ni lo a ni. Hman laiahte kha chhuan khaw khat, pa fing ni-a an sawite khan, an khuaah thil eng emaw a lo awm changin an ngaih dan an sawite chu, an khua bak a pel ngai lo va, Tunah erawh chuan, social media-a kan thil hmuh leh hriatte kan Comment-na hian khawvel a deng chhuak ta zel mai a. Chuvangin, kan thil hmuh leh hriatte kan sawi zui danah hian kan fimkhur a ngai ta hle mai.

Zêp nâk emaw kan ramah hian eptu party hruaitute hian an thil sawite hi an fimkhur a ngai lehzualin ka hria, rorel lai an beih danahte hian an sapatal deuh em le?, a tih theih a ni, ṭawngkam uchuak tak tak hmanga an beih dante hi, Social midia-ah mi tinin kan lo hmu nghal vek tawh si a. An thusawi aṭangin ram leh hnam hmangaihtu thusawi dan a ni em? tiin kan lo teh ve zung zung a. Chutihrulin, kan rama rorel lai mekte thusawi kan comment danahte hian kan rilru puthmang a hriat theih hle tho bawk awm e. Mi tin mai hian kan han sawi tak tak hi chuan kan ram leh hnam hi kan hmangaih tlang hlawm hle a, Nimahsela, kan thil sawi duh dan aṭangte hi chuan, kan ram leh hnam hmangaihtu dik tak a hriat hle si a nih hi. Mi ṭhenkhat hi chuan kan ram leh hnam hi sum siam nan chauh, mahni inhaivur nan mai kan hmangaih a ni lo maw? a tih thei hial ṭhin a ni. Pu R. Vanlalzauva hlain, "A nia'ng i sawi mai, I sawi zawngin i nihna a lang e" a tih ang mai hian, Kan thil hmuh leh hriatte kan comment dan a, kan ṭawngkam hman duh dante hi kan mize tilangtu, kan rilru sukthlek puang chhuaktu darthlalang dik tak a ni.

Kan ram leh hnam hmangaihtu inti vekte hian, Kan ram leh hnam tana thil ṭha, miin an tih chuan, tu party pawh ni sela kan lawm em em tur a ni a, Nimahsela, mi ṭhenkhat hi chuan kan ṭan zawng ni lote thil tih ṭhat chu sawichhiat leh sawihnawm kan tum tlat maite hi, ram leh hnam hmangaihtu dik takte tih dan tur a ni dawn em ni? Hei hi a ram hmangaih lozia hle zawk lo maw? Heng ang tih chingte hi chuan ram leh hnam pawh kan hmangaih tak takin a rinawm loh a ni. Chuvangin, kan ram leh hnam tana ṭha tur miin an tih hi chuan lawm hle mai zel ila, Kan ram leh hnam kan tlang leh phaite kan luite hrim hrim hi chu kan comment danah pawh, fimkhur takin, duhawm takin ṭhangtharte tan pawha zah tlak tura kan chawi thiam pawh a ngai a ni. Pu Rokunga khan, kan Zoram hi a'n thlir vang vang a, "I mawi em e, kan zoram hmun sang fiara tui thiang kan dawnna" a ti vawng vawng mai a. Mi tam takin kan ram hi kham chhengchhe tak mai nia kan hmuh laiin Pu Rokunga'n a chawi dan hi a Pathian thu hle awm e. Mizoram pawh hi Siamtu Pathianin duh taka a siam, ṭha a tih em em a ni si a. Siamtu Pathian hmuh danin Pu Rokunga hian a thlirin a hmu ve tih loh rual a ni lo a ni. Kristiante hi rilru ṭha leh thinghlim tak pu tura beisei kan ni a, Mite thil tih ṭhat, lawmpui thiam mi nih hi kan Pathian thuin min zirtir dan pawh a ni si a. "Lawmte chu lawmpui ula, ṭapte chu ṭahpui rawh u" (Rom 12:15) min ti a ni.

Kan hriat ṭheuh angin Jerusalem khawpui chu Judate khawpui ngaihhlut em em a ni a. Khawvel khawpui dangte aia a chungnunna bik pawh a awm kher awm lo e. Nimahsela, Judate chuan, "Aw Jerusalem, ka theihnghilh che chuan ka kut dinglam hian a thil thiam theihnghilh ve rawh se; Ka hriat reng loh che chuan, ka lei hi ka dangah bet tlat rawh se; (Sam 137:5) an ti thei tlat mai a. Jerusalem hi a hlut hmel hliah hliah mai a ni. Juda-ten an Jerusalem an ngaihhlut ang chiah hian kan Aizawl khawpui hi Mizote hian ngaihlu ve thiam ila a va duhawm em. Chuvangin, kan ram thilte leh kan hnam ro hlute hi hmangaih thiam i zir ang u, Kan hmangaih leh hmangaih lo chu kan thusawi-ahte social mediaa kan thil comment dan aṭangin a hriat theih hle a ni. A bikin nangni, politician duh takte u, A nia'ng i sawi mai, i sawi zawngin i nihna a lang e.

- Hausanga Hauzel