ZPM VAL UPA COUNCIL (VUC) BÂNG HI (A disinterested comment)

Dt 24.8.2026 khan ZPM VUC aṭangin Pu Bualhranga leh Pu Rin Sanga, IAS (Rtd) te an ban chungchanga ngaihdan sawi hrang hrang social media-a mi ka hmu a; tlem ka'n sawi ve ang e.

ZPM hian a din tirh, kum 2017 aṭang khan President an nei ṭha viau a, an leader nen pawh an thawhhona a ṭha a ni. 2023-a an chak chhan pawh an leader Pu Lalduhona leh Pu Sawta te thawh hona ṭhat vang a ni. Pu Duhoma rihna hi ni bawk mah se, an President Upa Lalliansawtaa mipuiin rinna an nghah vang a ni thui hle ang.

Pu Sawta hi a sawrkar hna thawh Assistant Grade bânsana hun puma Pathian rawngbawl tura inpe, mi ti mai mai lo, piangthar ṭha, pension ṭhak thlenga Synod hnuaia thawk a ni a. London-ah pawh kum 1 Synod tirha finance training nei tawh a ni. Presbyterian Kohhran Synod Ramthar Board Secretary-ah pawh amah chauh hi kohhran upa niin, a hmasa ber leh hnuhnung ber a ni. Ro rel a thiam a, leadership quality a nei ṭha a, dik taka thawk mi, ama chhungkua pawh duhsak bik chuang lo ngam a ni. A duh ber chu ro relna ṭha leh dik a ni ringawt mai; hei hi party-a a awm chhan pawh niin a ngaih theih.

Amaherawhchu, mihringte thu ni hek suh le, hrisel ṭha chu ni se party hruai nana upa lutuk pawh a la ni lo nachungin, a hrisel ta lo em em mai hi a pawi ta ber chu a ni; ZPM tan vanpui a chim a ni ringawt mai.

CM bak, mi phanchang leh tawnhriat ngah bawk si Pu Sawta han têr pha tu mah dang an awm hmel si lo a, CM-in President nihna a chelh ngawt loh chuan ZPM hian a tlakhniam phah ngeia ringtu an ṭhahnem hle a. Chuvangin, CM Lalduhoma hian President nihna a chelh a lo ngai ta niin a lang.

A tira an principle kha one man one post ni mah se, Pu Sawta berin a theih lohsan tak si-ah chuan CM-in leader nihna nena a kawp hi a ṭul ta hle niin a lang; hriat thiam loh tur a awm lo. Chutihlaiin, mi principle nei ṭha, mi ti mai mai lo, tuna dam laiah chuan diknaah te, mahni inthunun theihnaah te, hnam hmangaihnaah te, mahni thawhrim rah hmanga a taka mi harsate chhawmdawlna lama luan chhuahna kawngah te, a taka corruption fo ngamnaah te, mahni awmna kohhran bakah kohhran dangte pawh a taka ṭanpuina kawngah leh mi retheite tawrhna thlen thei nia a hriat avang leh mahni inhai vur bikna lam rawng kai nia a hriat avanga kum 1999-a MLA pension tihsan pawh la lo ngam khawpa huaisenna kawngah amah ang hi Zoram khawvelah awm awm tak ang maw tih hial tura ngaih Pu Bualhranga leh, direct recruit IAS nihna anga service laia hna thawk ṭha, chhuanawm leh hlemhle lo Pu Rin Sanga ten ZPM VUC aṭanga bânna an thehlut pawh demna tur an awm chuang lo. Thil hre chiang mang lo leh upate zah lohna rawngkaia thil sawi zui vak vak hi chîn tam loh a ṭha hle.

Pu Lalliansawta'n party a kaihhruai dan anga ZPM President hian a kaihhruai chuan 2028 inthlanpuiah pawh an ngaihtuahawm lo vang. Pu Sawta kal dan phung aṭanga an per hlat erawh chuan ngaihtuahawm tak an ni thei thung.

- Dr. J.T.V.L. Ngheta