Val Upa Council leh Pu Bualhranga

Kan Home Minister ni mek Pu K Sapdanga hian kum 2009 khan lehkhabu 'Change' tih chu a tichhuak a, Mizo ṭawng mai bakah, English version pawh a awm nghe nghe a nih kha. A hun lai chuan a lar thawkhat viau a, mi pawhin an ngaihven viau a ni.

Kha 'Change' tih lehkhabua bung hmasa berah 'Politics ṭawngkam thar Val Upa Council' tih a awm nghal vâng mai a. A ziah dan chuan, Val Upa Council tih hi 2008 MLA inthlanpui dawn hnaia ri ṭan a ni a, Mizoram politics kalphung vei a, siamṭhat dan ngaihtuaha inhmu khawm ṭhin, Mizoram Democratic Movement (MDM) tih invuahte'n an phuah niin a lang.

'Change' lehkhabuah hian, "Val Upa Council hi a duang chhuaktu tak chu Pu Bualhranga a ni. MDM leh movement pawl dangte'n Mipui Ṭangrual Pawl (MṬP) an din hnu khan Val Upa Council hi sorkar venhimna atan rintlak ngei tura ngaiin hmatheh berah an nei zui a..." tiin a ziak a ni.

Tuna kan Home Minister lehkhabu aṭang chuan Val Upa Council hi ZPM Party a din hma kum sawm dawn lai kal tawha Pu Bualhranga'n a duan chhuah a ni tih a hriat a. Kan Chief Minister Pu Duha ten Val Upa Council an sawi ve tâk chhên hma fe, an ngaihtuahna kil sir têah pawh a la awm hma daihin Pu Bualhranga'n a lo duang daih tawh a, Pu Sapdanga te ho nen an lo buaipui nasa hle tawh tihna a ni. Mahse, a duang chhuaktu ber lah chuan ZPM Val Upa Council aṭangin bânna a thehlut leh ta si!

Val Upa Council aṭanga a duang chhuaktu ber Pu Bualhranga'n a bâng leh ta daih si hian ngaihtuah a ti thui hle. Media lam mite'n an kawmnaah a bân chhan eng eng emaw a sawi a, chung zingah chuan CM Pu Lalduhoma a duhkhawp lohna leh sawisep a kai chungchangte pawh a sawi tel a. CM Pu Duha chungchang hi Pu Buala bân chhan zingah a tel ngei chu ka ring tho nâin, a chhan bulpui ber erawh a nih ka ring ve lo. Val Upa Council hi mi dang, sawrkara thuneitute'n an duh angin an kaihruaiin an kaltir thei a, an thunun thei tawh nia a hriat vang a nih ka ring nghet tlat.

Social media-a Pu Bualhranga bân chungchang comment tu tam ber hi chuan Pu Bualhranga hi an hre chiang lo hle a nih a rinawm a. ZPM Danpui siamnaa mi pawimawh ber pakhat a nih dan te, ZPM-in an chhuan em em Val Upa Council nihna leh kalphung duang chhuaktu a nihna te hi an hre lo a ang. Tin, MNF sawrkar laia MLA hlawh leh MLA-te pension hlawh nasa taka an tihpun ṭha a tih loh em avanga a pension hlawh pung zawng la duh lo ngam ngat a ni tih te hi an hre lo lehzual âwm e.

ZPM Val Upa Council hi dik tak leh din a nih chhan ang taka kal tur chuan, member-te hi Pu Bualhranga anga mi dik leh huaisen, Chief Minister hlau lo leh CM-in a duhsak ni lo ngam an nih a ngai a ni.

- Lalchhandama