Infrastructure development leh quality vawnhimna Tender kalphung thlirna

Ram leh hnam hmasawnna tak tak hi Infrastructure lian—hydel project, kawngpui ṭha, leilawn nghet leh sorkar hmunhma tlo leh quality sang leh enkawl zui a nih dan ah a innghat thuk hle. Heng ram hmasawnna lian tham te hi thawh a nih dawn hian, a lungphum pawimawh hmasa ber chu Technical Wing (Engineer) hna a ni. Engineer-te'n uluk tak leh fimkhur tawk takin Detailed Estimate an siam hmasa ṭhin a, chu chuan hmanrua (materials), thawktu lawmman leh technical standard mamawh zawng zawng a huam tel vek a ni.

'Abnormally Low Tender' Leh 5% Below System

Hna ṭha leh tlo a chhuah theih nan, tender chhânna ah 'Abnormally Low Tender' (estimate aia hniam lutuk) hnar a, 5% below chin chauh pawm tura inkaihhruaina kalpui a nih khan, hna quality vawnhimna kawngah rah ṭha tak a chhuah hman viau a. Mawhphurhna latu contractor-te tân sorkar estimate pangngai phu tawka hnathawh kha a hlawk tho a; sorkar tân pawh project chhia leh hna ruangam tling lo tûr venna kawngah hmangchang rintlak tak a ni.

High Court Stay Order Leh Suangtuahna

Hetih lai hian, heng 5% (percent) below inkaihhruaina chu tute-emaw in High Court ah an khing 'khanglang' pek a. An nin an tih tur diktak lo tinghalin 'stayed order' an chhuah tak si avangin, sorkar leh department-te tan 'a chhâng hniam ber' (lowest bidder) pek mai loh chu dàn tlawhchhan tur a awm ta lo a ni. Pawi thui tak a khawih a, ngawng ṭha lo a la nei dawn chauh ni te pawhin a hriat!

Entirnan leh a fiah zawkna'n, tihian ngaihtuah chhin ta ila. 30% zetzawta hniam (30% below)-a hna chhâng ten hna an hmuh phah lo thei ta lo a. Engineer-ten Nuai 100 senga thawh tura technical estimate leh design an chhut fel thlap kha, Nuai 70 chauh seng a thawh zawh an inhuam tihna a lo ni ta a ni. Nuai 100 man hu tawka technical design siam a nih lai a, Nuai 70 chauh hmanga hna thawh a nih si chuan, hmun hrang hrangah 'harsh compromise' a awm lo thei lo, tih erawh a chiang nghal pang! Kha mah aw;

Hydel Project:

Tuirial hydel project hi vawi engzat nge an 'revise' tawh a, a taka thawh zawh tawh hi eng zat percent chiah nge? Thawh hma hauhin 'jail' bang zut te an awm mial em? A hming chuan kan siam ve ta 'luklak' a, a takin kan ṭangkai puiin 'bulb' engzatchiah nge min chhit-en sak tak?

Contractor te'n tender an chhan hniam lutuk avanga, a tawpa zawh hleih theih loh leh hna hlanchhawn (terminate & retender) a ngai leh ṭhin hi — hun a heh bakah hmasawnna tipawlawhtu lian tak a ni tih kan hria.

A bik takin, SASCI loan hmanga hna thawhte hi bituk hun chhunga zawh a nih loh chuan sum lo kal leh tur thlengin a tikhaihlak ṭhin a. 'Lapse' tih ṭawngkam pawh, kan pianpui ṭawng ni awm takin kan hman tak fo hi! Heng zawng zawng hi tu bùl ṭan nge? SASCI kha investment a nih laiin, infrastructure ti deuh tlat kha kan awm a. Campaign nan te kan hmang a, kan tling leh si lo. Sorkar thar ah 'lapse' a tam phah a ni lo'm ni?

Kawngpui leh Leilawn:

Reilote chhungin a chhia a, a khuar hma a, vawi duai lo ngaihven zui tur dinhmunah a din phah ṭhin. A tir phat aṭangin, Sairang-Buichal-Kawnpui kawng te hian fûr khat a daih meuh lo chu anih hi. Bairabi a tlawng lei dawh te pawh, zawh tura ruahman aṭanga kum tamtak hnu ah, a chim avanga kut beng ta dur dur te pawh kan awm tawh tak kha maw!

Public Buildings: Standard tling lo hmanrua hmanga sak a nih chuan, rei tak a daih thei lova a him tawk lo bawk! Economics & Statistic building te kha, sak zawh anih hnu ah Vbc 2+ a thuam ṭhaṭ leh nghal ngai a ni em? Chuvangin, sak zawh hnu lawka siam ṭhat leh a ngaih fo chuan, "eng nge kan sum/chhiahin a lei tak tak?" tih zawhna a piang lo thei lo ṭhin. Entirna chauh a ni. A dang a tam mai.

Contractor Dynamic: Rate pangngai ai-a hniam fe in tender an la, material man leh thawktu hlawh te a san chhoh zel lai hian, quality vawnhim chu a harsa hle in a rinawm. Chutiang dinhmunah chuan, contractor chu hlawkna siam tum, engineer chu specification vawn tum, sorkar chu budget tlem hman tum, mipui erawh quality ṭha beisei — mi tinin hna kan neih vek chu! Mahse, mathematics hian diplomacy a hre lo.

Kan system-in, 30% zeta hniam pawh a pawm a, contractor-in a chhanna chu 30% zeta hniam a nih bawk chuan, khawi hmunah emaw 30% chu a bo dawn, tihna a ni. Chu 'khawi hmunah emaw' chu a lo awm tak tak loh nân, quality control leh accountability chak zawk a ngai a. A nih loh chuan, contractor-te thiam loh vâng emaw, engineer-te vâng emaw ni lovin, a system zawkin quality compromise tûrin a thlem zawk tih kan pawm mai a ngai.

Hmachhawp leh Kalphung Thlirlawkna

Ram hmasawnna tluantling (sustainable development) kan neih theih nân chuan, dan leh kalphung (legal framework) zawm hi a pawimawh ang bawkin, infrastructure quality leh technical standard-te vawnhim hi pawh a pawimawh hle. Hna man tlêm ringawt ngaihtuah lovin, Quality Control, Value for Money leh long-term durability te hi ngaihpawimawh zual a ngai hle a ni.

A tawp berah chuan, infrastructure hna ropui ber berte hi a man a tlêm nge tam tih aiin, a daih rei ang èm, a him ang èm, mipuite chhiah tlingkhawmin a man a phu tawk èm ti zawnga kan teh hian a hlutna dik tak a lang fiah ṭhîn. Chuvângin, technical standard leh quality control-te hi hna kalpui danin a ngaih pawimawh tûr ringawt ni satliah lovin, mipuite sum leh pai humhalhna leh ram hmasawnna tluantling siamtu lungphûm pawimawh tak a ni.

Court-in thutlukna a siam dan emaw, sorkarin kalpui a duh dan ah emaw, a hmasa bera quality leh public interest (mipui ṭhatna leh a hlawkna) vawnhim a nih phawt chuan, chu ngei chu ram hmasawnna nghet leh tluantling siamtu lungphûm dik tak chu a ni ang.

- Thangtea Thawmte