NO VEHICLE ZONE

December 14th, 2018 Vanglaini chhuakah chuan heti hian a inziak a, “Mizoram sorkar chuan kumin Krismas leh kumthar vuakvetah bazara kal mipuite an lo him zawkna atan December 21, 24 leh 31-ahte No Vehicle Zone a siam leh dawn” tiin. 

No Vehicle Zone ní hian Chanmari (Lower Chanmari, Bazarpui panna kawng huam telin) leh Zodin Square inkarah chawhma dar 10 aṭanga tlai dar 4 chhungin lirthei (vehicle) reng reng tlan phal a ni dawn lo (thirsakawr leh nawrlirh huamin tlan phal a ni lo) a; thupek hian emergency duty bakah natna vanga damdawi-in pante a huam lo ang. 

Lirthei kal phal chin leh phal loh chin bakah passenger drop leh pick-up na tur bakah lirthei hunna tur leh hun phal lohna hmun chiang takin a inziak bawk a. (https://www.vanglaini.org/tualchhung/92403) Sorkar-in mipuite him zawkna tur a ngaihtuah hian thingtlang lam a ngaihtuah hmaih palh em aw tiin no vehicle zone hman ṭan anih kum aṭang khan kum tin rilruah a thar fo ṭhin. 

No vehicle zone hman hi a ṭhain a zawngchhang thlak tih chu a hretu leh hmutu kan ni ṭheuhin a rinawm, kum tin kan hman deuh ziah danah pawh hian a hriat mai awm e. Kuminah pawh he ni/ hun hi kan hman leh ngei a rinawm a, thuneituten an rel hmaa kan auchhuah loh chuan thingtlang min huam nep leh palh ang tih a hlauhawm. 

No vehicle zone hman a nih nachhan chu Krismas hunpui bawrah mipui nunau zalen leh him taka chakkhai mamawh an lam theihna tura buatsaih niin a lang. He hun hi kan nghakhlel a, a pui a nawiin chhuahkhawm ngei ngei tur emaw ti tawk pawh kan kat nukin a lang. 

Thingtlang mite hnenah Krismas leh Kumthar hmangin han zin teh mah u, i rin ai daihin thawmhnaw leh pheikhawk, adt., an nei ṭhain an lei to ngam tih i hre/ hmu thei ang. A chhan chu hunpui tih lohah chuan thawmhnaw thar leina tur an neih mai mai loh bakah kum tawp khawpui kal an nghah ṭhin vang a ni fo. 

Kumtluanin rim takin hna an thawk a, kum tawpah chakkhai lamin khawpuiah an kal a, an hmuh chhun kha a to leh tlawm emaw dawn leh dil tlawm emaw pawh ngaihtuah lovin an lei fo ṭhin. Hmun dang, dawr dang pan turin mipui leh lirthei veivak an tam si a, chet lak an harsat a; an khawr ṭuṭ ṭhin a ni. 

Khaw neiho chuan maxi cab/ bus service ticket hi ’ber thla a det dek dek aṭangin hian kan ngaihven nghal a, kan unaute thingtlang aṭanga lo kal nen hawna tur inchuhin kan buai dawn tih hi tu hrilh leh sawifiah sak ngai miah lovin a chiang a ni. Mahni khaw lamah ṭheuh Masi hman kan duh tlat a ni. 

Chutih laiin thingtlang lam aṭanga chakkhai mamawh lam mi nawlpui haw hnuah chauh (nikumah ni 21, 24 leh 31 December) no vehicle zone siam a ni kum tin ṭhin hi chu a fuh lo deuh a ni. A hmun nghak, kumtluana duh hun huna bazaar thei, lirthei leh pawisa nei zawk deuh chauh an awm tawh hnua bazaar panna leh a chhehvel tih thawl huau a ni hlauh thung hi chu a dik lo a ni. 

Thingtlang lam aṭanga khawpui pantute engthawl leh awlsam taka an bazaar zung zung theihna tura ruahmanna remchang siamsak hi thuneitute bat a ni ve tho lawm ni? Thingtlang lam aṭanga khawpui pantute hian no vehicle zone hi kan mamawh ber zawk niin a lang, kawng kân thu hlaah te, chakkhai lamna hmunhma thawl neihah te, adt.,. Lirthei veivak tam lutuk vangin kan thaw a ipik a, kan tlei lo va, haw hlan kan nghakhlel mawlh ṭhin. 

December thla tir lamah hian ni 2/1 tal Thingtlang mi khuaa kan haw hma ngei hian No Vehicle zone siam ṭhin ni se a duhawm hle, chumi mil chuan thingtlang aṭangin khawpui kan pan ṭhin ang a, kan mamawh chakkhai chi hrang hrang kan lam khawm ang a, chumi mil vek chuan hawna tur ticket ngaihtuah a awlsam dawn em em a ni. 

Ni 21 hnu lamah chauh no vehicle zone siam ṭhin a nih hi chuan Krismas a hnai tawh lutuk a, ticket a lo full fo tawh nen hawna hmuh loh mai pawh thil hlauhawm tak a ni ṭhin. Chakkhai lam mipui himna leh awlsamna tur kan ngaihtuah a nih chuan thingtlang leh khawpui huam zau thei ang bera hma lak ni ṭhin se tu tan pawh a nuamin a ṭha a ni. 

- Zonunmawia Fanai