Pathian leh Lal Isua sawi bawrhbânna a ni em?

A chhan chi hrang hrang avangin ngawih chuh mai ka rilrûk deuh a. Amaherawhchu, ram leh hnam, sakhuana nasa tak nghawng thei a nih avangin ka insûm zo ta ngang lo a ni. Ni 21 September, 2026 (Thawhṭanni)-a ZPM chhung inkhawma Mizoram Chief Minister zahawm tak thusawi aṭangin thil pahnih chuan ka rilru a luah reng a, pehhêl lem loin tawitein ka rilru kaptu ka rawn ziak ve a ni. Eng tin tak ngai ve ang che u maw?

ZPM-in kum thum pawh tling lo sawrkarna an chelh tak hnua an Policy leh Danpui an ṭhiat sawimawi nan, “Kan Pathian pawh hi a ngaihtuahna a danglam ṭhin. Thuthlung a thlakthleng a ni. Thuthlung Hlui a awm a, thlakthleng a ngai tawh a ti a ni ang; Thuthlung Thar min pe a ni. Pathian meuh pawhin a hun lai ang zelin a mite khawsak dan tur, a kaihhruai dan hi a thlakthleng,” tiin Pu Lalduhoma’n a sawi a.

Pathian chu mihring ang leka ngaihtuahna tidanglam mai mai ṭhin angin a sawi a. Thuthlung meuh pawh a thlak a ti a ni. Pathian chu a ngaihtuahna tidanglam ṭhin leh a thuthlunga ding nghet lo a, thlakthleng mai mai ṭhin anga a puh ta mai hi ngaihzam mai theih niin ka hre lo. Chumi piah lamah chuan duhthawh takin Pathian chu a hun lai ang zela a mite khawsak dan tur leh a kaihhruai dan thlak thleng ṭhin angin a la sawi zui ta deuh deuh a.

Kan CM sawi dan ang hi chuan Pathian chu lêlo tak, ngaihdan bulfûk pawh nei lo leh din nghehna nei lo a, luang thli chhêm nghîn ang mai maia thle vel a ni. Heti tak maia kan biak Pathian a sawi hnâwm ta chiam mai hi kohhran upa min leh Mizoram sawrkar hruaitu lu ber a nih avangin a huatthlala lehzual a ni.

Pathian chungchangah duhtawk mai lovin, “Lal Isua ngei pawh khan Chanchin ṭha Johana ziak bung 7:8-10 kan en chuan Jerusalem-ah Bâwkte Kût a awm dawn a, a unaute’n lo kal ve la an ti a; a kei chu ka kal ve dawn lo tun ṭumah chuan, nangni han kal rawh u a ti a ni. Second thought a nei ve a ni ang, a han kal ve leh tho a ni. Bâwkte Kûtah khan a han kal a, a lailum lai ber Jerusalem Temple-ah te khan thu a han sawi a nih chu maw le! Kan Lal Isua ngei pawhin a ngaihdan a thlakthleng hun a awm ṭhin,” tiin a sawi.

An party thil tih sawi mawi nan Isua pawh a thu anga khawsa lo leh rinawm lo anga a sawi ta mai hi ngaihtuah chian zawh poh leh a huatthlala a ni. Mahni dik lohna leh thiam lohna sawi mâm nana Lal Isua demawm taka chhuah hi hriatthiam harsa lai chu a ni.

A unaute’n Bâwkte Kûta kal tura an ti chu Lal Isua’n, ‘Kei chu tun ṭumah chuan ka kal dawn lo, a ti a. Second thought a nei ve a ni ang, a han kal ve leh tho a ni,’ tiin a sawi a. Pathian lehkhabu kan en chuan, “... Kei zawng tun Kûtah hian ka han kal dawn rih lo ve, ka hun a la thlen loh avangin,” a ti a. A hun a la thlen loh avanga kal rih lo a ni.

Second thought neia Lal Isua’n a ngaihdan sawhsawn anga a chhuah hi Pathian lehkhabua kan hmuh dan nen chuan inpersan tak a ni. “Bâwkte Kûtah khan a han kal a, a lailum lai ber Jerusalem Temple-ah te khan thu a han sawi a nih chu maw le!” tiin Lal Isua chu demawm takin a chhuah a. ‘Kan Lal Isua ngei pawhin a ngaihdan a thlakthleng hun a awm ṭhin,’ tiin Lal Isua’n ngaihdan a thlakthleng anga a puh hi ngaihtuah chiang lo chung pawhin Lal Isua hmuhsitna leh ngaihnêpna a ni.

ZPM-in an ngaihdan an thlakthleng ang leka Lal Isua’n a ngaihdan thlakthleng hun a nei, a ti hi chu a uchuak lam deuh chu a ni. Pathian leh Lal Isua chungchang a sawi danah hian thîkthu ka tichhe lu deuh em aw? Nge, thu ka khuh mah mah zawk? Kohhran hruaitute leh Pathian rawngbawl tute’n engtin tak ngai ve hlawm che u maw?

- V.L. Zaikima