RUSA Asst. Professor tana lak tharte posting-ah fair lo a tam?

Oct. 31, 2019 khan MNF sawrkar chuan July 12, 2019 daih tawha RUSA hnuaia Mizoram College hrang hranga thawk tur MPSC kaltlanga Asst. Professor mi 62 a lak tharte appointment tichhuakin, an thawhna hmun tur (place of posting) a siam fel nghal a. An thawhna hmun tur siamrem chungchangah induhsakna uchhuak a awm niin a lang. 

Pu Lal Thanhawla kaihhruai Congress ministry-ah khan merit list hmangin Gazette post atana lak te chu an thawhna hmun tur siam fel a ni tlangpui a. Merit list a an tihṭhat dan indawtin Aizawl khawpuiah an awm tlangpui a, candidate duhthlanna an dah pawimawh bawk. 

Merit list hmasa lama awmten Aizawl aia khawpui dang an thlang a nih pawhin an duhthlanna chu zah sak an ni ṭhin a. ‘Merit list a an tihṭhat dan indawt angin an thawhna hmun tur hi siam tur a ni’ tih ‘Dan dinglai’ (Gov’t Order) awm lo mah se he kalphung hi hnathawk tura lakte chanvo leh dinhmun zahawmna avangin Congress ministry khan ṭha takin a kalpui ṭhin. A thawk turte in­siamrem duh avanga hnathawhna hmun tur siam danglam thlengin a kalpui ṭhin. 

Hetiang kalphung ṭha tak hi MNF sawr­­kar hian hmang chhun­­zawm loin RUSA hnuaia Asst. Professor atana lak (appoint) te chu an duhsak zawng apiang kha khawpuiah an dah ni berin a lang - a pawi hle. A langsar zualte tarlang ila:

1. English Department-ah hian induhsakna a nasa ber awm e. Person with Disability (PWD) quota a lak Aizawla mi chu District dangah dah (post) a ni. Sorkar policy, Office Memorandum (OM) ang chuan heng PWD te hi an chenna aṭanga hnai ber post ruak awmna a dah (post) tura tih an ni. OM ang hian sawrkar hmasa khan PWD te tan an thawhna hmun tur atan an chenna aṭanga post ruak awmna hnai berah a dah ṭhin.

Aizawl khawpui a college pathumah English tan post 3 ruak a awm a. Merit list a 1-na hi district dangah dah (post) in, merit list a hnuhnung ber chu Aizawlah dah a ni thung. 

2. Commerce Depart­ment tan hian Mizoram pumah post 4 awmin, Aizawlah post 2 leh Aizawl khaw pawnah post 2 a ruak. Merit list a 1-na chu Gov’t Champhai College-ah dahin merit list tawp bera mi chu Aizawl khawpuiah post a ni. Merit list a 1-na leh a tawp bernaa mi te hi Aizawl khaw mi ve ve an ni. 

3. Economics-ah post thum ruakin, post 2 hi Aizawl khaw chhunga awm a ni. Aizawl mi vek mi 3 merit list-ah langin, merit list a 1-na chu Lunglei-ah post a ni. 

4. Geography merit list a 1-na chu district dangah dah a nih laiin, merit list a 2-na chu Ai­zawlah dah a ni. 

5. Political Science merit list a 2-na chu Kamalanagar College-ah dah (post) niin, merit list a 5-na chu Aizawlah post a ni thung. 

Hetihlai hian Eco­nomics, Educa­tion leh Mizo-ah te Congress ministry hunlai aṭanga kalphung awmsa, a chunga kan sawite khi, zawm a nih laiin Department engemaw zatah hna zahawm tak thawktu turte chanvo palzut a ni hi hriatthiam a har ngawt mai. MNF sawrkar hian sawifiah thei se a ṭha hle ang. 

- Zoramchhana