Aizawl landmark tur Kraws Lian

Tlanga Isua lim lianpui mai, kawr var ha phar duai mai kan hmuh chuan Rio de Janeiro khawpui a ni tih leh, Brazil ram a ni tih mi pangngai chuan kan hre mai a. Mual dung, tlang leh ruam vela bang ropui deuh, a chunga mi eng emaw zat kal theihna kan hmuh chuan Great Wall of China a ni rih kan hre nghal a, China ram a ni tih kan hre nghal ṭhin.

Khawpui khawlaia thîr ni awm taka sak ding zuih chho sang tak kan hmuh chuan Paris khawpui a ni tih kan hre mai a; hmeichhe pakhat lim, lallukhum ni âwm tak khum, kut pakhata khawnvar kenga chung lama phar vá kan hmuh chuan New York khawpui a ni tih leh Statue of Liberty a ni tih kan hre mai ṭhin. Chutiang zelin ram dangah leh khawpui dangah pawh han hmuh phata an ram leh khua a ni tih tichiang nghal em em thei thil a awm nual mai a; India ramah pawh khawi khawiah emaw chuan khawpui tichiang nghal em em thei thil a awm nual bawk.

Hman deuh aṭang tawh khan Mizoramah, a bik takin Aizawlah hian Aizawl leh Mizoram a ni tih tichiang nghal em emtu thil, landmark eng emaw, langsar tak awm se tih ka lo ngaihtuah ve ṭhin a. Kan suangtuah dan berah chuan, Kristian ram kan nih angin Laipuitlangah emaw, Durtlangah emaw hian Kraws emaw, Krawsa Isua khenbeh lai lem/lim erawh lian tawk tak ding luah mai se, chu chu Mizoram leh Aizawl landmark atan a ṭha ber ang tih a ni a. Sorkar hian bultumin hma la se, tiin ka suangtuah deuh bawk.

Ka suangtuah ṭhin chu Mizoram Synod-in a rawn tipuitling titih dawn ta niin a lang a. Kum 2020 aṭang khan niin ka hria, Aizawl Theological College ram chhung, Aizawl khawpui aṭanga langsar lai takah kraws lian tur an siam ṭan ta a. Ka lo suangtuah ve ṭhin a nih avangin a lawmawm ka ti hle. Ka duhthu a sam tawk lohna erawh chu - kraws ringawt a ni tur hi a ni a; ka duhthusamah chuan, Isua khenbeh lai lem ni se, tih hi a ni.

ATC hmunah kraws lian phun leh sak hna thawh mek a ni a, ruahman dan chuan ft. 101 (metre 30.8)-a sang, a bán sei zawng ft. 30 (metre 9.2) a ni dawn a, cheng nuai 200 vel sènna tur a ni. A san zawng leh len zawng hi a ṭha tâwk viauin ka hria.

Kraws lianpui mai siamna atana cheng nuai 200 vel lai mai sen a ni tur hi mi ṭhenkhat chuan an sawisel a. An sawisel chhan ber chu - mipuiin an chhawr ṭangkai em em tur ni si loa cheng nuai 200 lai sên a ni tur hi a nih hmel. Kraws lian siamna atana hman ai chuan, mite ṭanpuina tura hman atan lo awt deuhte pawh an awm a ni âwm e.

Mimal leh chhungkuate hian kan sum neihte hi thil ṭangkai takah kan hmang vek lo va, nuam kan tih zawng atan te, kan intihhlimna atan te, kan intuituahna atante kan hmang ve ṭhin.

Vaihlo zûk leh hmuam tihna atana sum kan hman zawng zawng hi a tam tham hle; ṭul hauh lo chu sawi loh, min tichhetu ni mah se, nuam kan tih vangin kan hmang a ni mai. Krismas laia kan in leh a vel te, kan in chhungte sum tam tak sêngin kan chei a, sum tam tak sengin kâwn/khawlai kan chei a; thil ṭangkai tak ni lo mah se, a ṭha em em. Heng atana sum kan hmante hi miretheite ṭanpuina atan hmang zawk tura inphût kher tur a ni lo.

Mizoram Synod-in kraws lian a siam pawh hi a ṭha alawm, lo ti ve mai ila; mirethei leh khawsak harsate ṭanpuina pawh cheng nuai têlin Synod hian a pe chhuak reng tho a ni tih i hre teh ang u.

- Zoramchhana