Police lak tur a fair leh ang em?

Mizoram sorkar Pu Lakduhoma kaihhruai chuan a thawhnihna atan Police - Constable Armed Branch 200 leh, Unarmed Branch 150 a la leh dawn a, a hma ang khan a fair leh ang em? Fair taka lak zawh tak khan sawisep a kai lo a, tuna lak tur pawh hi a fair leh viau beisei phawt mai teh ang.

Congress sorkar lai leh MNF sorkar lai khan an party mi an duhsak uchuak hle tih kan hre vek a, an phenah Police officer lian ho khan an vua leh vangte an thun nasa hle tih pawh kan hre vek awm e. Kha'ng an lak tam tak zingah khan hna thawk tlak lo khawpa fit lo, drugs addict leh zu ngawlvei te kha an tam em em a, tam tak chuan mual an liam tawh nghe nghe a ni. Eng emaw hun lai phei kha chuan zu leh drugs vangin an thi zawih zawih mai a nih kha, a pawi khawp mai.

ZPM sorkar hian Police a lak takah khan an party chhungah pawh lungawi lohna a siam nual a, mahse Home Minister khan fair taka a lak avang khan an mi lakte pawh sawisel an kai lo viau reng a. An party chhungah erawh Home Minister demna a ri ring viau a ni awm e.

ZPM Party Vice President Dr. Kenneth Chawngliana pawhin September 25 khan CM leh Home Minister inkarah khi a awm em? tia zawhna chu chhangin, an thawhdunna a ṭhat thu a sawi a. An sorkar chu fair takin a kal tih sawiin, Pu Sapdanga'n Police ṭhahnem tak a lak khan dik tak chuan an Party mi duhsak thun pawh an duh ve a, mahse Home Minister berin, "Mipui leh ram venghimtu tur an ni a, fair taka lak a ṭha a ti a, party pawh kan inrawlh thei lo a nih kha. Tunah pawh a la leh dawn a, a fair viau a rinawm a ni," a ti hial kha a ni a.

A thuhrimah tun hma anga Police thi tawh tu leh fate an luh ve theih nana composonate ground kha thil dik ber a ni lo. Rál hmaa thi Police-te chu an tu leh fate thun kha tu ma'n kan thik lo. Mahse rál hmaa thi pawh ni lo, an tu leh fate thun zel mai kha chu thil dik a ni thlawt lo. Sorkar hnathawk dang zawng zawng pawh an thih hnuah an tu leh fate an thun kher ngai lo. Police an nih vanga thih dan pangngaia thi pawh an la duhsak zel hi thil dik a ni lo.

Tuna an lak leh tur zingah pawh hian kan lo en ràn dawn a, ral hmaa thi emaw, duty-naa thi ngei tu leh fate an tel a, tehna hrang hranga an tling a nih chuan thun se kan thik lo ang. Ral hmaa thi pawh ni lo, anmahni pawh fit em em bik lo, duhsak uchuak hi chin tawh loh tawp chi a ni. Heng compsonate-a an lak tam tak hi laktlak vak loh an ni fur lehnghal. Home department lam hotute lu tihaitu mai an ni chawk.

Chuvangin he sorkar fair tak hian Police a lak leh tur pawh sawisel kai lo thei ang berin han la leh teh se. An lak thar takte en hian a lungawi thlak fu a ni. A thiam leh fel fel an lak mai hian tu ma'n sawisel tur an nei lo. Party leh vua leh vang induhsakna vanga tun hmaa lak vak vak ang kha kan kalsan ta a, a lawmawm. Kan lo thlir zel dawn a ni.

- Melissa Pa