Enchhin sorkar hian bihchian a dâwl lo

'Min enchhin rawh u' tiin mipui khawngaihna an ngén ngawih ngawih a, kum 2023 inthlan dawn leh a hma lam zawng khan Pu Lalduhoma kaihhruai ZPM party chuan an campaign auhlaah thiam takin, "Kalphung thar, party sorkar ni lo, mipui sorkar kan kan din ang; ZPM Chief Minister chuan portfolio a nei ve lo ang a, a Minister chak lo deuhte a dáwm káng ang; ZPM Chief Minister chuan party president a chelh kawp ve lo ang; VIP culture kan tibo ang; Designation plate kan tar ve lo ang; ZPM Chief Minister chuan Car pakhat bak a kawl ve lo vang; CBI kan ko lut ang; CM leh Minister-te motor a inzui duah duah tihtawp a ni ang; hnathawh ṭha lo a awm ve lo vang; ram dang leh state hrang hranga Zofate enkawltu tur Minister hran kan nei ang,".

"ZPM sorkar hunah chuan kum 15 daih kawngpui siam a ni tawh ang; Ṭhalaite tan Mizoram Development Bank kan din ang; Restricted Tender kan ti ve lo ang a, Contractor chauhin contract hna an thawk tawh ang; Keini chuan kan puk ve lo ang; Chhiah kan tipung ve lo ang; Ruihhlo ngaite enkawlna UNO hriat tham kan din ang; Khua/Veng tinah Development Committee kan din ang; Mizoram pawisa tel lovin State Capital thar kan siam ang a, Central-in min pek loh pawhin khawvel ram dangah kan dil ang a, Kristian Millionnaire rawngbawlna a ngaia a thlawna khawpui sa thei tur kan hria," tih leh thil dang tam tak, sawi sén loh a awm.

Heng kan sawi tak auhla hmang hian tuna kan Chief Minister ni mek hi campaign lai khan a au nasa ber a. Ṭawngkam a thiamin a thusawi a awihawm bawk a. Chu bakah 'kalphung thar'-a kal turin an inzuar nasa a, political party âwn lam nei lote pawhin 'kalphung thar' han 'enchhin' ve hrim hrim kha an duh avanga MLA pawh 27 lawih neia sorkar thei an ni.

Kal phung thar sorkar an tihah chuan sorkar term chanve ṭha zet Chief Minister leh Party President nih kawp loh min enchhintir hnuah chuan, kal hmasate ang thovin nih kawp an pawm leh ta tho a. Contractor hnathawk ṭha tam tak an awm ṭeuh laiin Empanel Firm kum hnih khat lek chhunga lo pung ta hluai te, heng ho tana restricted tender a hlawma pek chhuah (blanket approval) lo ni ta te, langtlang sorkar kan beisei lai a, RTI hmanga thil dil chhuah harsat avanga court hial thlen a ngaihna sorkar a lo ni ta bawk.

16th Finance Commission-a Mizoram sum dawn tur a pun chhoh mek laia leiba a pung tual tual mai leh, tualchhungah sum leng vak a tlem tial tial mai te, petrol leh diesel man aṭanga cess (chhiah) cheng vaibelchhe tam tak lirthei neitute aṭanga lak anih mek lai a, Mizoram hmun hrang hrang leh Mizoram chak lakluhna kawngpui chhe kum tluan reng maite leh, ration buhfai man a lèt thawka tihpun leh chhiah/bill chi hrang hrang rapthlak khawpa lo pung thur thur tate hian mipui phurrit min siam nasa hle mai.

ZPM hi kawng siam vil tura MLA/Minister-te duty tura a bika inruat sorkar Mizoramin kan neih hmasak ber a la ni a, nikum lawk khan Kawnpui to Khamrang kawng an zu invil chhawk tlut tlut a nih kha. Sorkar hmasaten an siam sa vek, Aizawl khawpui chhung kawng pawh AMC inthlan dawnah chawpchilh takin a siam ṭhat (repair) hna an thawk a, chu'ng kawngte chuan fur khat pawh a daih lo, tunah chuan namen lovin an kawng siamte chu a chhe leh deuh vek tawh a ni tih chu mipuiin kan hria.

Chief Minister te hi an hnaah an ṭul teh reng nen, Mizoram leilung pian tirh ata Chief Minister 'Lo zawh' buaipuia tel ka vawi khat hriatna a ni. Sorkar hnathawk leh Pensioner -te hrèk zawnga Health Care Scheme kalpui luih tlat mai te, khaw ṭhenkhat khawtlang nu leh pa bakah zirlaite rilru tina zawnga vantlang sikul dinhmun dah hniam te, research base-a kal inti si; a research finding leh data mipui hmuh tur awm tlat si lote hi thu mak ka sawi nin theih loh chu a ni bawk. Minister-te hna thawh dan tur road map siam sa vek nia sawi, vawiin thlenga a tak hmuh tur awm si lo pawh buhpâwl zinga hriau bo zawn ang vela hmuh tur awm lo a ni bawk.

Mipui sorkar kan din ang ti chung si a; mipui hnen thleng phak sum a van si zia te, mipui an ro tlawk tlawk laiin; Minister/MLA-te hamṭhatna hrang hrang a let thawk thawka a pun nasatziate hian sawi anga an awm lohzia leh mipui hmakhua an ngaih lohzia a tilang chiang a. A party ang pawhin hna awm zawng zawng General Headquarters level-ah an insem zawh deuh vek laiin; thingtlang lama an party hruaitute an khawrozia pawh an Unit-te mangang au aw a ni.

Campaign lai khan kawng engkimah ṭha ber leh a aia ṭha dang awm leh thei tawh lo tur khawpa Serafim tur angin an insawi a. An han sorkar ve meuh chuan sawi loh ang hlira awmin, sawi ang khan an awm ta reng reng lo. Enchhin sorkar hian bih thuak pawhin bihchian a dawl lo tak zet a nih hi.

- R. Lalhmangaiha, Bethlehem