NEPALI NULATE SARI

Kum 1997 khan Nepal khawpui Katmandu-ah inkhawmpui palaiin ka kal a, ni 3 zet kan cham. Kan hre tlangpui ṭheuh ang a, Nepal chu khawvelah ram rethei a ni a, chutihlaia ram vannei a nih ve thona chu khawvela tlang sang ber, Himalaya tlang bulṭhuta awm a ni. Himalaya tlang avang khi a ni ber mai awm mang e, foreign aṭanga khualzin an tam em em a, Nepal ram sum hnar pui ber chu khualzin (tourist) ho an ni ti ila a sual lo ang.

Khualzin Sap ka hmuh tam em avang khan ka rilruah thil pakhat a lo lut a, chu tih laia kan Missionary, Upa P. Lalringa (L), Katmandu Valley-a Community Educator kha ti hian ka zawt a; Pu Ring, hei Nepal ramah hian Foreign aṭanga sap tourist te hi an tam hle mai a, Nepali te zingah Sap sâwn te hi an tam viau lo maw? ka ti a, chuta min chhanna chu, “Pu Biak, an awm vak lo, Nepali Nula te Sari hi a nget a nia,” tiin min chhang a.

9th September, 2026 khan, Zo hall Tourist Lodge, Chaltlang, Aizawlah Mizoram State Commission of Child Rights te buatsaih, Consultation on Promoting Chilh safe Tourism in Mizoram programme-ah CCM aiawhin mi pathum kan han tel ve a. He prog-ah hian Tourism Minister, Pu Lalnghinglova Hmar chu khual lian a ni a, thu ṭha leh bengvar thlak tak tak a sawi a, ani bakah MSCPR leh Tourism dept-a hotu ten kan rama Rail lo luh aṭanga Mikhual kan ngah takzia leh khual zin kan ngah a, malsawmna a nih rualin miṭhalo leh thilṭhalo hrang hrang, sex lama naupang te thlenga ven an ngaihdan te kan ngai thla a, a ṭhain a bengvar thlak a. Thingtlang thlengin Home stay-te kan ngah ta hian sual pawh a tihpun ve zel theih dan te thlengin.

Thu ṭha tak tak kan ngaihthlak lai chuan rilruah ‘Nepali Nula te Sari hi a nghet a nia’ tih ṭawngkam kha a lo ri nawn a. Kan Mizoramah hian hnam dang tourist an lo pung ta hle a, an pung zel dawn a, chung zingah chuan Sap kan tih mai, mingo te, Mingo ni kher lo, mi hang lian pui pui, mi hrang hrang, kan hmuh sup sup hun a lo thleng ṭan mek chu a ni a. Nepali nulate sari a nghet ang khan kan nulate leh kan nu hote puan bih leh an pawnfen/kekawr te hi a nghet ve ang em? tih zawhna a lo lut tlat mai.

Ti hian ka han chhang a, ‘a nghet ang, a nghet em em ang,’ ka ti rilru a ni. Pathian hian hmeichhiate hi a lo siam special em em mai a, tun dinhmunah tak phei hi chuan kan Mizo nula te hi an chhuanawm tak zet, tun hnai mai pawh hian kan nula te pahnih – Nl. Lalremsiami, Kolasib leh Nl. Lalthantluangi, Kanghmun S te chu India Hockey team, Asia Champion nihpui tu, Championship goal tiluttu ngei kan nei te hi kan chhuang takzet a ni.

Khawmpui lamah lo lut ila, Nepal Baptist Church Council a ni a, kan han palaina kha. Kei kha Pastor junior ka la ni a, kan hotute–Rev H. Chalbuanga (L), Mission Secretary (AGS-M) leh Pu LL Thuama (L), Finance officer te kha ka zui a. Upa P. Lalringa (L) kha Missionary a ni a, palaite zing aṭangin Speaker min man chawp a, Asian Baptist Federation Secretary, Rev Robin Phipon, North East India Harvest aṭangin Rev Dr PC Muanthanga (L) leh kei khan thu vawi khat ṭheuh kan sawi. Kan hotute Upa P. Lalringa, Rev H. Chalbuanga leh Rev Dr PC Muanthanga ten mual min liam san ta a, a lunglen thlak hle.

Kan ramah Khualzin, tourist chi tin hmel kan hmuh hun a thleng ṭan a, Nepali nulate ang bawkin kan nulate puan bih a nghet ang tih ka’n ring a, kan nula te chauh ni lovin, kan tlangval te pawh hi a thlirtu mai an ni lovang tih a rinawm.

- Rev. Lalbiaksanga Chinzah