MIZOIN FING KAN TIH, VANIN MI Â A TIH SI

Mizoramah hian MLA inthlanpui a lo thlen dawn hnaihah Political party tinte hian, an party zawm tharte an inlawm luh siak emaw tih mai turin an lawm lut sup sup ṭhin a. Heng an lawm luh party zawm tharte hi, a tam zawk hi chuan a tling tur nia an rin party kha an zuan mai niin a lang a, ram leh hnam an hmangaih vanga party-a lut pawh a ni lova. An zawm thar party kha an lo tlin hlauh chuan therhlo eng emaw an beisei vang a ni ber awm e. An luhna party an lo chak chuan zuan fuh an inti em em mai a, mite pawhin ‘a fingin a vannei hle mai’ tiin kan sawi mai zel a nih hi. Tin, party hruaitute pawh hian, an party zawm thar turin mi tin hi min sawm fo va, an duhsak deuhte phei chu “In chhungkaw dinhmun siam ṭhat nan kan party-ah rawn lut rawh u, kan tlin chuan dinhmun ṭha zawkah kan inhlangkai dawn nia,” tia sawm bik pawh an nei nual awm e. Kan ramah hian politics hi sumdawnna emaw ti kan tam a, heng ho hian kan ram leh hnam ṭhatna tur aiin an mahni hamṭhatna tur an ngaihtuah zawk a. In leh lo ṭha din nan te, an chhungkaw changkan nan te politics an khel ber a ni. Chuvangin, kan rama rorel lai party hruaitute hi chu Tunhmaa kan damloh changa lian tual tual kan hmuh ang mai khan, lian tual tual an ni ringawng mai ṭhin a nih hi.

Heti ang mi, thawhrim vanga hausa pawh ni lo, politics thila insiam lian hi kan ramah mi tam tak an awm a. Mizote hian, an han hausak takah chuan an vannei ka ti em em mai a, Pathian malsawmna an dawng tiin, kan awt ta ngawih ngawih mai ṭhin a ni. An mahniah tlaktlum loh hlauin kan intlawnsiak luih luih mai ṭhin a nih hi. Kohhran leh khawtlangah chanvo kan pe thuai mai a, mi lian chhungkua tiin kan zah em em a, an thlekna lam apiangah kan tle ta dual dual mai ṭhin a ni. Mite hi eng anga hausa nge an nih a, eng angin nge sum an lak luh tih pawh ngaihtuah lo hian, mi an hausak hi chuan fing hi kan ti em em vek tawh mai a. Danin a phal loh Smugling thilin emaw a ruka ruihhloa sumdawnga hausa te, khehpuama hausa pawh ni se la, mi hausa hrim hrim hi Pathian malsawmnaa ngaiin vannei kan ti mai niin a lang a ni.

Hausak hrim hrim hi thil sual a ni lo va, thawh rim avanga hausate phei hi fakawm tak an ni. Amaherawhchu, kan ramah hian sawrkar hnathawk an hlawn phu lova hausa te, sumdawng an sumdawnna mil lova hausate hriat tur an awm fo va. Mizote hian sum hrim hrim hi kan pathianin kan ngaina hle a, sum ngahte hi kan ngaisangin fing kan ti mai zel a nih hi. Lal Isua erawh chuan sum chungchangah hian, ringtute chu thurawn min pe a, “Fimkhur ula, awhna reng reng lakah chuan inveng rawh u, sum ngah hi mihring dam chhan a ni lo ve.” (Lk 12: 15) tiin. Chutichuan, Mi hausa pakhat pawhin a buh leh bal, a sum tam tak chu, dah khawm zai relin, “Thlarau kum tam tak chhung atan sum tam tak i khawl hi, chawl la, eiin bar la, hlim takin awm rawh, ka ti ang.” a ti a. Nimahsela, Pathianin a hnenah, Mi â, zanin hian i thlarau an laksak dawn che a ni, i thil deh chhuahte kha tu ta nge ni ta ang le? a ti a. (Lk 12:20) tih kan hmu a ni.

He mi hausa pa hi Mizorama awm chu ni sela fing kan va ti dawn em, kan awtin kan intlawnsiak nasa ngawt ang le. Khawtlangah leh kohhranah chanvo pawimawh tak tak a chelh ang a, Pathian ramte a pek ṭhat phei chuan Pathian pawhin a hausakna a pawmpui ngeiin kan ring ang a, fing kan tiin malsawmna dawng tlakah kan ngai ngei ang. Nimahsela, Mizoten fing kan tih leh vannei kan tih em em hi, van lam khi chuan mi â a ti a nih chu. Chuvangin, hawh teh u, Mizo Kristiante hi harhin sum ngainatna bawih ata chhuakin, thinlung leh tih tak zetin Lalpa kan Pathian rawng i bawl zawk ang u. Mi fing nia kan ngaihte hi van lam khian mi â min tihsak si a.

- Hausanga Hauzel