Republic Day lawmnaa Captain Tania Shergill-i kha!

Pathiannia neih zawh tak Delhi, Rajpath-a Republic Day vawi 71-naa khaki uni­form nena Corps of Signal Contingent-te rawn hruaitu kha Captain Tania Shergill a ni a, India hmeichhe zinga Army Day-a Parade contingent te rawn hruai hmasa bertu a ni. 

Kum 26 mi Captain Shergill hi India hmeichhe zinga India Army-te'n kumtina January 15-a an hman ṭhin, Army Day (2020) Parade Adjutant-a contingent mipate rawn hruai hmasa bertu a ni a, kumina neih zawh tak Republic Day-ah khan India hmeichhe zinga Army contingent te rawn hruaitu pahnihna a ni bawk. 

Nikum Republic Day khan India hmeichhe zinga mipa contingent-te rawn hruai hmasa bertu chu Captain Bhavna Kasturi kha a ni. Republic Day hmannaa a tel hma hian, Captain Shergill chuan kum dangah a tel ngai loh thu sawiin, naupang a nih lai aṭanga tel a chak tawh thu amah interview-tute hmaah a sawi. Captain Shergill hi Nagpur University aṭangin B.Tech a zirchhuak a, Chennai-a Officers Training Academy (OTA) aṭang sipai a training chhuak bawk. Kum 2017 khan Corps of Signal-ah lutin Jabalpur-a 1-Signal Training Centre-ah a thawk mek a ni. 

Captain Shergill-i hi sipai chhungkua aṭanga seilian a ni a, a pa hi 101 Medium Regiment (Artillery)-ah sipai a ni ṭhin a, a pu hi 14th Armed Regiment (Scinde Horse)-ah a awm ṭhin bawk. Republic Day ni khan Captain Shergill chuan India hmeichhe tleirawl tam tak mit a la hle a ni ngei ang. Delhi Public School-a lut class 12 zirlai kum 16 mi Aarushi Goyal chuan Captain Shergill-i parade a hmuh khan a nunah nasa taka thu a sawi tih sawiin, ka idol chu ka hmu ta tiin a sawi chhuak hial a ni. 

Republic Day hman zawh takah khan Parade neihnaah tableaux 22 pholan a ni a, state leh UT 16 bakah central ministry, department leh National Reponse Force (NDRF) ten an pholang. Khang zinga mipui mit la leh em emtu dang leh chu, Royal Enfield motorcycles chunga chuang Central Reserve Police Force (CRPF) hmeichhe rualte kha an ni bawk. Kum 19 mi Diksha Chau­dhary chuan chair-ah ding meuha a en thu sawiin, hetiang hian ka la tih theih ve ka ring tiin a ṭhiante bulah a sawi. Chaudhary hian Haryana Police-a luh tuma hma a la mek thu sawiin, kha thil a hmuh khan a rilru a thlak danglam thu a sawi a, CRPF a luh a tum phah ta a ni. Kum 1950, January 26 khan hnam pasalṭhate duan chhuah Constitution of India chu hman ṭan a ni a, hemi vang hian Republic Day January 26-ah ram pum huapa chawlh (holiday) hman a ni ṭhin. Kum 1929, January 26 khan British awpna hnuaia mahnia inrelbawl theihna (dominion status) British lamin an tawk­tarh chu Indian National Cong­ress (INC) chuan duh lovin Independence a puang zui a. Hemi ni hriatreng nan hian Republic Day chu kum tin ram pum huapa hman ziah a lo ni ta. 

- Crpuitea