Naupangte nunna thâptu Ram hmelma
India sawrkar laipui hian hnam hnuaihnung zawkte leh hnam tlem zawkte hmasawnna tur a ngaihtuah ṭhin a. Tribal-te hi hnam hnuaihnung an/kan ni a, a bik taka chawi kân ngaia ngaih an ni. Chutiang a nih avang chuan tribal-te hamṭhatna leh hmasawnna tur ngaihtuahtu tur bik ministry–Ministry of Tribal Affairs a din hial a ni.
Ministry of Tribal Affairs chuan India rama tribal-te hmasawnna leh an dinhmun chawi kanna turin kawng hrang hrangin hma a la a. Hmun kilkhawr zawka tribal naupangte'n a thlâwna zirna ṭha an dawn theih nan Eklavya Model Residential School (EMRS) hmun tam takah a din a, Mizoramah pawh EMRS eng emaw zat a awm tawh a, la din belh mek zel a ni bawk.
Tlungvel khuaa EMRS building sak mekte leh sak zawh tawh, chhe em em site chu tun hnaiah (October ni 3, 2026 a ni âwm e) khan Mizorama hnathawhte enfiahtu atana sawrkarin a din Mizoram State Project Monitoring Committee chuan an endik a, press mite'n an zui nia sawi a ni.
Monitoring Committee-te'n Tlungvel EMRS an tlawhna kha ZONET lamin an cover a, TV-ah ka lo en ve a. Khati tak maia chhiaa building an sa kha a thinrimthlak ngei mai; a châng leh ka nuih lam lam a zâ a. In satute khan ram leh hnam tana thawkah an inngai ve ang em tihte ka ngaihtuah a; chutiang chuan an lo inngai ve ngam a nih pawhin, mipui chuan kan ngaih ka ring lo. Kei phei chuan naupangte chungah chhiatna pawh thleng se pawiti miah lo, ram leh hnam hmelmaah ka ngai zawk!
In an la sak zawh hauh lohte kha sa zo tawh angin an in report a, chu chu a enkawltu engineer pawhin a lo pawmpui mai a nih hmel a; mak tak a ni, mak tak!! Bathroom-te kha engtin nge khati taka chhiaa an siam thiam zawk le? Sak dan tur ni loa an sa lui tlat duhte kha hlêp tam an tum lutuk vang a nih a rinawm a, chu bakah, 'sual vang' a ni tel bawk ang.
ZONET-in an kawmnaah khan, sawrkar aṭanga hna viltu engineer khan contractor, hnathawktute kha an thawh ṭhat lohte pawh a sawi mâmsak char char mai niin a hriat. Hna ṭha lo vengtu turin ṭha lo taka hna thawktute hnathawh a pawmpui ni mai loin, an hna chhia a sawi mâmsak char char kha, contractor aṭangin 'share' a nei ve em ni chu aw, tih mai awl tak a ni–kei phei chuan a neih ka ring deuh roh nia!
Tlungvel EMRS la sak mek zel hi MNF sawrkar hun laia bul ṭan a nih thu sawi a ni. Bul ṭan laia a nodal department changtu minister lamhnaite hnenah contractor-in cheng nuai za tél a pe hmasa phawta sawite a awm. Hei hi a dik a nih ngai chuan a pawi hle ang. Criminal case awm theihna thil a nih a rinawm. Sawrkara thuneitute'n Tlungvel EMRS sak dan hi ngun takin ngaihven se la, thil dik lo, eirukna, hlemhletna leh inthamna thil a awm leh awm loh te chhui se a ṭha viau lo maw?
Mizoram chhung hmun danga EMRS dang sak mekte pawh sawrkar hian tun aia nasaa a ngaihvena a vil a ṭul em em bawk.
- Zothansanga