ZPM CONSTITUTION ARTICLE-21 SIAM DANGLAMNA LEH MIZORAM POLITICS DYNAMIC

Mizoram political history kan thlîr chuan party hruaitu hlunte leh party chhunga leadership kalphung hi ngun zawka ngaihtuah tham a ni. Congress leh MNF, party lian tak pahnihte hian sorkarna an lo chelh fo tawh a; nimahsela, hruaitu thlak chungchangah chuan structural change leh organizational reform aiin, party dinhmun leh hruaitu hmasate vawnhim an thlang fo ṭhin niin a lang. Pu Laldenga (L), Pu Lal Thanhawla leh Pu Zoramthanga te ang hruaitu langsar tak takte hi party chhùnga an dinhmun leh an hnathawh avangin mipuite hmaah leh political field-ah an hming an hmang nasa hle.

Hruaitu lawkte thlak vanga party chhùng chhiatna leh pawl hran siam hlauhnate hian hruaitu thar chher chhuah kha risk lian tak a nih an hlauh avangin hum tlat an duh zâwk ṭhin a ni hial ang em? Hruaitu hlunte vawnhim tlatna hian ṭhangthar leh hruaitu tharte tan party top tier thleng chho turin kal tlang theih loh bang (glass ceiling) a siam tlat bawk ni te pawhin a ngaih theih. Chuvangin, hruaitu thar pian chhuah theihna turin party insiamremna thuk zawk neih a awlsam lo fo. Hei hian Mizoram politics-a party zê humhalhna (party culture) leh hruaitu ngai ngawr ngawr neih (leadership continuity) hi thil ṭha ber a ni em, tih min ngaihtuahtir a ni.

Hetihlai tak hian Zoram People’s Movement (ZPM) erawh chuan an political philosophy-a pawimawh ber pakhat 'Kalphung Thar' tih chu thu mai ni lovin, party chhùngah pawh an lantir ngei an tum tih a lang. Dawrpui Multipurpose Hall-a ZPM Executive Meeting-in Party Constitution Article 21, Point No. 1 siam danglamna lo awm ta hian party Constitution chu a hun leh hmun, mamawhna ang zêla siamrem theih a ni tih lantirtu pawimawh tak a ni. He siam danglamna hmang hian Chief Minister nihna chelh mêk chu party elected office-bearer nihna chelh kawp thei turin exception siam a ni ta a ni.

Politics hi thil nghet char mai ni lovin, hun, mipui ngaihdàn leh political environment mil zêla insiamrem fo tur a ni a. Mizoram kKohhran lian ber Synod phei chuan hun rei tak chhung a bulbàlte leh inkaihhruaina vawng reng chungin, hun tharin a mamawh dàn ang zêlin a kalphung pawh a siamrem mai ṭhin. Chutiang bawkin political party pawhin a kalphung leh innghahna pawimawh (principles) vawng reng chungin pawl kalphung siamrem ngamna a mamawh fo a ni.

He Constitution amended hnuaiah hian Chief Minister Pu Lalduhoma’n party President nihna chelh nghal tur anga ngaihna a awm mai thei. Nihna duh avanga tuihâlna emaw, mimal hmakhua ngaih (personal ambition) emaw avanga thleng ang zawnga hrilhfiah erawh a dik ber lo ang. He thutlukna hi Executive Committee thutlukna leh party hmakhua thlir vàng zawka lo awm a ni.

Kum 2028 General Election a hnaih zêl avangin sorkar leh party inrelbawlna inkawp remna leh party chhùnga lungrualna hi a pawimawh tak zet a. He thil ngaihtuahnaah hian Minister of State Pu B. Lalchhanzova leh Home Minister Pu K. Sapdanga te ang party hruaitu pawimawhte’n party inrelbawlna dinhmun leh pawl rinawmna (party integrity) humhalh dàn turah an ngaihdàn huaisen taka an lantir ngam hi kan political history-a chuang reng tlak a ni.

A bik takin Pu K. Sapdanga hi opposition lam mi ṭhenkhatin internal rival anga an sawi ṭhin lai takin he ṭhutlukna siam a ni ta leh a nawr kal ngamtu langsar ber a ni hian, party hmakhua thlirna puitling tak a nei tih hmuh hmaih rual a ni lo. Hei hi political maturity entirna pawimawh tak pawh a ni. Politics-ah chuan mi pakhatin a duh ber chu a dinhmun vawn him reng a ni mai thei; amaherawhchu, Pu Sapdanga thlirna zau tak hian leadership dik tak a nihna zawk a lan chhuahtir a ni. He ṭhutlukna hi senior politician nazawngin an ngam loh leh an tlin loh, political courage sang tak entirna a ni hial ang.

Hei hian 'Pu Duha vs Pu Sapa' tih political narrative chu belhchian a dâwl lo tih a lantir nghal a. Party chhùnga inelna emaw, hruaitu inelna (leadership rivalry) emaw zawnga ZPM organization thlir aiin, pawl chhùnga internal differences chu dân kalphung (constitutional mechanism) leh political dialogue hmanga siamrem theih a ni tih min hriattir zawk a ni.

A pawimawh ber chu, he article thlak danglamna hi rigid centralization ni lovin, organization-in hun thar a mamawh dàn ang zêla insiamrem theihna (organizational adaptability) a kawk zawk a ni.

ZPM tan he step thar hian political advantage eng chen nge a thlen dawn tih hi opposition hian an thlir thleng ngam ang em? Political party pakhatin a thutiam tawh Kalphung Thar chu party pawnah chauh ni lovin, a chhùnga inrelbawlna, hruaitu ruahmanna leh ṭhutlukna siam dànah pawh practice a tum tih he thil thleng hian a tichiang tawk viau a ni.

Politics chuan engtik hunah pawh chona thar a mamawh a, hruaitute pawhin hun tharin a mamawh dàn ang zêla an kalphung an siamrem a ngai ṭhin. Chuvangin, Constitution amendment hi ZPM chuan 'Kalphung thar' tih chu campaign slogan mai ni lovin, party governance leh organizational practice-ah pawh an lan chhuahtir ngam tih hi lûngsi taka kan pawm a ngai ta a ni.

A tawp berah chuan, Article 21 siam danglamna hi mi pakhat nihna vawnhim nan siam mai ni lovin, party hma lam pan zêlna tura constitutional flexibility mamawhna avanga siam a ni zawk tih hriat chhuah phah party-te hi awm se, chu tluka ram tana lawmawm chu a awm kher hian ka ring lo!

— Thangtea Thawmte