THIL INHMEH LO

Vanglaini chanchinbu ni 11 & 12 Saturday & Monday, Oct. 26 chhuakah khan Lengpui YMA branch pahnihte lui sangha man khapna (closed season) puan thla khat leh a chanve chhung zet Dialdawk leh Lunghmul lui dunga an duty tur thu a lo lang a. Lengpui YMA-te hi an che ṭha hle dawn a. Chutihlaiin, han ngaihtuah chian chuan, Mizote kan nêp leh changkan loh zar zova heti taka an chet hah a lo la ngai ta hi an khawngaihthlak hle.

Lengpui YMA-te lui dunga an duty hun chhung hi a rei hle a. YMA member-te hi hlawm hrang hranga inṭhenin nileng leh zankhuain lui dung an veng dawn a ni. Lengpui YMA branch hniha member-te hi an hman em vang leh mahni in lamah ṭul engmah an neih loh vanga thla khat leh a chanve aia rei zet lui dunga duty tur an ni lo vang tih ring ila. Kan ramah sanghate tihbuai lohva a huna an inthlah pun theihna tura ṭhahnemngaia hma la an ni. An khawngaihthlakin an hah viau dawn laiin, 'Salute ' ka pe e.

Lengpui YMA branch hnihte kan fak viau lai erawh chuan a chunga thupui (caption) kan dah ang khian, inhmeh lo tih ka nei a, chulai tak chu inenfiah nan hman a ṭha hle ang. Kumin hi Mizoram tan hun chhinchhiah tlak tak a ni a, ziak leh chhiar thiam vekna (fully literate) state-a puan kan nih kum a ni. Kan CM pawh a lawm viau a nih kha, mi dangte pawh kan lawm ṭheuh a ni. Chutianga India rama ziak leh chhiar thiam vekna state-a sawrkar thupek, sangha man loh hun puan laia heti taka sawrkar thupek zawm lote ven YMA branch hnih chhun zan zawma duty ngaihna state kan ni leh si hi chu thil inhmeh lo tak a ni.

Lal Isua ring, Mizo Kristiante hi kan inenfiah ṭulna a tam hle mai, kawng hrang hrang aṭangin. HIV AIDS vei tamna state, cancer vei tamna, tun hnaiah tualthihna lungchhiatthlak tak tak kan hre leh ta fo mai te leh ruihhlo zuar kan la awm reng te hi a luhaithlak tak zet. Hengte hi chu khawvel awm chhungte chuan a awm ve reng tur a lawm a tih theih laiin, Kristian ram tia chhiar ngam kan nihna aṭanga thlir leh lehkha thiam state-a puan kan nihna te nen hi chuan a inhmeh lo deuh chu a ni.

Kan khawpui kawng dung trafic lamah kan fel fu a, thu kan awih a, khualzinte pawhin min fak hle niin sawi a ni. Chutihlaiin, lui dung lama kan khawsak zia, YMA-te ven la ngai tlat kan ni leh ang lawi si hi chu hriat thiam a har a ni. Chu bakah, Mizorama kohhran pawl hrang hrangte’n September thla beihrual/beirual kan hmang zo hlim hlawt a ni lehnghal nen.

Kristian, Isua ringtu kan nihna te, ziak leh chhiar thiam vekna state-a puan kan nihna leh kan changkanna, hmasawnna tam tak kan neih lai hian, dan leh thupek zawmna kawngah inenfiah kan ngaihna a la awm nual mai. India rama ziak leh chhiar thiam vekna state ni chunga sawrkarin sangha man loh hun a puan season chhunga sawrkar thupek pawisalote veng tura chhun zan zawma YMA-te lui dunga duty an awm a ngai leh si hi zawng thil inhmeh lo tak chu a ni e.

- Rev. Lalbiaksanga Chinzah