Hriselna atan taksa insawizawi

Ram a changkang zel a, hriselna kan ngai pawimawh zel. Tun hma chuan a hausa chinin thil mawm an ei tam a, tunah erawh a nei chin deuhte pawhin ei tur mawm aiin ei tur hrisel an thang tawh zawk.

Thil ei dan hmang a inthlak a, nun dan phung a inthlak. Kawng laia meizial bung tam din thlirin meizial zu an la tam reng a, zu in pawh an la tam reng. Mahse, mi nawlpuiin taksa hriselna an ngai pawimawh tawh a, zu ngawlvei leh ruihhlo ngai tam bawk mah se ruihhloa fihlim leh ṭhian kawm tinuam tawka zu in an tam zawk ngei ang.

Hetah hian a tawp mai lo a, tunlai ṭhalaite hian insawizawina an ngai pawimawh. Ṭhalaite chauh ni loin kum 40 chunglam pawh an insawizawi nasa hle. Veng hrang hrangah gym a awm a, uluk taka enkawlte chu a lun deuh vek tiin a sawi theih.

Badminton khel an ṭhahnem a, sum thehchhuah tur a tam deuh avangin naupang awm bawk mah se kum upa lam an ṭhahnem. Table tennis, cricket leh basketball khel pawh an ṭhahnem a, Aizawl khaw chhungah hian infiamna hrang hrang hi an khel chikim hle.

Chung zingah chuan Mizote ngaihnat ber football hi an khelh tam ber a ni a, football nena inang thuak futsal khel pawh an ṭhahnem hle. Aizawl khaw chhungah futsal ground ṭhahnem tak a awm tawh a, heti chung hian zan lamah duh lai thlan theih a la ni hlawm lo.

Hetia insawizawi uar thar em emna chhan lian ber chu taksa hriselna atan a ni a, tun hma thlir chuan mi nawlpui pawh an hrisel zawk niin a lang. Infiamna hrang hrangah veteran inelna siam a ni a, kum 40 chung lamah pawh chak tak tak tlan thei an ṭhahnem ta hle.

Mizoram Football Association lamin veteran football/futsal a kalpui ṭha a, hei vang han inkhel tur pawh an ṭhahnem. Aizawlah artificial grass phahna ground ṭhahnem tak a awm tawh chung pawhin an la indaih lo a; tun hnaia grass phah zawh hlim Hlimen Playground, Durtlang Football Stadium leh Mizo High School Field te pawh a lun hle.

Hriselna atana insawizawi hi a ṭha a, mah se kum 40 chung lam tawha inelna lak urhsun lutuk erawh taksain a tuar thei thung. Inelna hminga veteran a nih tawh chinah chuan inelna (comepetion) aiin intihhlimna leh hriselna dah len a pawimawh tawh zawk.

Chutihrualin ngaihtuah tel ngai a awm. Veteran football khel zingah sorkara hnathawk lian tak tak te, thil ti thei tak tak te leh sum nei tak tak te an awm a, heng a nih avang hian an duh hun takah ground an chang thei a. Veteran football vangin MFA leh ADFA hnuaia club-ten ground an duh ang chang theih loh phah tih sawi thawm a awm a, a dik ngei pawh a rinawm.

Kum upa lam tana inelna siam hi a ṭha a, chutihrualin tih lutuk a awm thei a, hriselna tana ṭha lo chin pawh a awm thei dawn. Hei chauh hi a ni lo a, football-a Mizoram ṭhanna tur daltu a nih theih dan a awm a, MFA lam pawhin enfiah thei se a duhawm hle.

- Lalhriatzuala