MIZOTE HI KAN VA’N CHAPO TAK EM!
Pathian hnam thlan Juda-te hian khawvel pumah mite ṭanpuina (chadaka) an uarin an che nasa a, mahse, an uangin an chapopui ngai lo. Hei hi Juda nuna entawn tlak em em a ni. Mite ṭanpui hi mi tinte mawhphurhnaah an ngai. Hebrai ṭawngin chadaka ṭanpuina hi Tzedakah an ti a, a awmzia chu dikna (righteousness) a ni. Thilphalna anga ngaih a ni lo, Pathianin mihring tih tur ve renga a dahah an ngai zawk. Chuvangin, chapopui chiah an ngai lo.
Mite an ṭanpuina chu a rûka tih tur a ni. Maimonides, Rabbi ropui ber pakhat chuan ṭanpuina hi chi riatin a thliar hrang. Chung zinga chungnung ber chu, tuin nge, tu nge a ṭanpui tih inhre miah lova ṭanpuina a ni. A petuin a dawngtu a hre lo, a dawngtuin a petu a hre hek lo. An inpho lang chiam chiam ve ngai lo.
Mite ṭanpui hi Tikkun Olam–khawvel siamṭhatna hnaah an ngai a, Tikkun Olam hi an mawhphurhnaah an ngai. Chadaka mite ṭanpui, damdawi in sak, sikul sak, hripui dote hi Pathian rawngbawlna anga ngaih a ni a, fak hlawh nan leh chapopui nan an ti ngai lo. Israel emaw, Juda pawl hrang hrang emawin ram hrang hrangah ram kâng, lirnghing, tuilianah te doctor an tir a, pawisa an pe ṭhin a; mahse, Israel flag nen va inlan vak ai chuan NGO hming hmangtein an ṭanpui mai thin. Chapopui loh hi an hnam ziaah zahawmna zawk a ni. Mimal, pawl, khawtlang, chhiatna hrang hrangah ṭanpuina an pek pawhin an chapopui ve ngai lo; an tih tur dik tak an hlenah an ngai mai.
Mizote chapozia hi sawiin a siak lo. Miretheite ṭanpuitu tura pawl din YMA aṭanga a tê ber thleng hian mite tana kan thil ṭha tih chhun apiang pho lan tum rêng rêngin kan hmanhlelin kan sanhmawh a. Sadukai leh Pharisai vervêkte ai pawh khan kan chapo tawh zawk ti ila kan tisual tampui àwm lo ve.
Covid-19 len lai khan khawvel hmun dang leh Central India lamah mi hausa tam takin ṭanpuina pein mite tan an luang chhuak nasa hle; kan mihausate erawh an tawmin tlat. CM Relief Fund pe leh ṭanpuina pe awm hlek erawh social media platform hrang hrangah chapopui takin an pho lang chàmchî a, cheng 500 lek donate a nih pawhin an hmaih ngai lo. Kan va’n chapo tehlul em! Ṭhenkhat ṭanpuina petu hming lan duh lote lah ‘hming thup’ tiin an la puan chhuahsak ṭâwk ṭâwk bawk nen. Kan hnam rilru chapozia hi sawiin a siak lo a ni ber mai.
Tunlaiin social media platform hrang hrangah mite ṭanpuina chi hrang hrang, ho tê tê thlengin kan pho lang chuai chuai reng a. Chutih karah politic tuinua inchirhthehna leh indeusawh tawnna ṭawngkam rapthlak pui pui an pholang chuai leh lawi bawk. Bible tlawhchhana inti-Israel em em si, kan nunah Pathian hnam thlan Israel fate nun kan entawn duh leh chuang hauh si lo. Kan thil tih ṭha awm chhunte lah mi zawng zawngin hria se kan ti em em a, chapona tlangsangah bak kan chuang lo.
Kohhran pawl hrang hrang, NGO hrang hrangte leh pisa hnathawktu te, politician te, rethei hausa, a lian a tein lansarh loh hlau rêng rêngin kan hmanhlel a, takna nun erawh keimahniah hmuh tur a awm si lo. Mizote hi kan inenfiah a va’n ṭul tawh tehlul em! Pathian nung bia kan nih chuan kan zavai hian takna, dikna, rinawmna leh inngaihtlawmna nen kan nun hi kan hman a hun tawh hle a ni.
- Dr. C. Lalrampana