KAWNG LAIA DIN LEH KAWNG INKEN

Sual vang ni lo, mâwl vang hrim hrim pawh ni chuang lo, ngaihtuahna sen tam loh vanga rilru ṭha tak ni chung sia mite tana harsatna siamtu kan nih fona pakhat chu kawng laia din, mi kal vel dâla kan lo ding tlat ṭhin hi a ni.

Ke a kalna (footpath) kawng zim têah kan han kal a, kawng lai tak maiah van lam hawi chunga mi dang ngaichang lêk lova phone hmanga mi biaa lo ding tlat mai te, puipunna aṭangin kan han bâng a, chhuahna chêp taka kan inhnawh mur mur laia ṭhian dun dinga an lo inbe tlat te, Biak in inkhawm bâng kan chhuah mur mur laia kawng dâla mi dang ngaichâng miah lova lo titi dun mial mial...

Tunlai ṭhalai leh zirlai rual kawng dunga inzui ṭhin tam takte pawh hian mi dang kawng ken nachang an hre ta lo! Footpath khat mupin khawi sikul naupangte emaw chu an rawn inzui kawi duah duah mai a, a tâwk zawnga kal duh tan an kal rêm hun nghah a ngai hial ṭhin. Khat mup mupa kal lo hian inzui diah diahin kal se, a tâwk zawnga kalte tan kawng kian ve ṭhin se a duhawm hle. Zirtirtute'n in naupangte lo hrilh var teh u.

Mipui kal vel insûlpêl sup sup karah ṭhian ṭhate kan han inhmu a, a nih loh vêk leh thil pawimawh taka kan karah kan han hmu hlauh mai a; mi dang ngaihtuah lêk lovin mi kalna dâlin kan han ding sauh sauh a, kan han titi tui ta viau mai ṭhin a.

Sunday school inkhawm kan han bâng a, Biak in gate khat mup mup karah mi ṭhenkhat chuan hawihhâwm chhuahin hmelhriat apiang lo biak kan tum a, chibai lo sem ta mai te kan awm bawk! Hetiang nikhua hian kawng sirah inthiar fihlim hmasain inbiak ṭhin ni se, duh tawkin mite harsatna siam lovin kan inbe thei mai tur hi a ni a.

Hawh u, puipun nikhuaa kan kal hian, kawnglaia ding tlat lovin, mi dang kal velna kianin i ngaichâng ṭhin ang u.

- RK Nithanga