TU NGE MISUAL CHU

Zan khat chu, "Misual, misual," tia auin, tlangval rual hian mi pakhat an rawn ûm a. Pawnah tlan chhuakin, "Tu nge ni? Eng nge a tih sual a?" tiin ka lo zawt a; pakhat hian, tlan pahin, "Mi dawr rawk a tum a, a rawk hmain an hmu hman a," tiin min chhang a. Tlangvalte chu au chûl chunga rawn tlan an nih avangin a en tura tlan chhuak pawh kan tam hle a ni. A lo entute zing aṭang chuan, "Man ula, vaw hlum rawh u," tia lo aute pawh an awm a ni.

Ni e, misualte hi an huatthlalaawm tak zet a, nimahsela, tuna misual tia an rawn ûm hi tu nge a nih a, eng dinhmuna ding nge a nih ang le? Dawr chu rawk a tum tak tak ang em? Rawk tum tak tak ni ta se, eng vanga rawk tum nge a nih ang? An tlan liam hnu chuan thil tam tak ka ngaihtuah phah a. Misual tia an rawn ûm khan nupui fanau a nei ang em le? An chhungkuain ei tur an tlachham pawh a ni mai thei asin. A nupui fanaute rilṭam hmu thei loin an ei tur a dapna lamah rûkrûk a ngai ta mai em ni dawn le? Hengte hi ka ngaihtuah zui neuh neuh a.

Mizote hi kan insawi danah hi chuan misual kan haw em em mai a, social media lamahte hian tualthattute pei hi chu khai hlum hial duhte pawh kan awm nawk ṭhin a nih hi. Hetihlai hian, Pathian hminga misual ngaidam nasa ber hnam kan ni hial maithei bawk. Thil sual titu chungah hremna an han lek lah hian kan inkhawngaihsiak leh sup sup bawk si nen; hriat thiam hi kan har khawpin ka hria. Misual kan tihte pawh hian an phu tawk hremna an hmu tak tak lova ngaihnate hi a lian hle mai bawk si nen. Misual hrem ngai nia kan hriatte hi eng angin nge hrem se kan tih? Hrem kan duh dante pawh hi a inang lo zung mai thei a ni.

Kan Baibulah hian mite’n misual an tih, lâr em em mai a awm a, amah chu Zakaia a ni. Baibula kan hmuh angin Zakaia hi chhiah khawn hotu a ni a, amah pawh a hausa hle a, tiin min hrilh a. Aizawl veng pakhat Dinthar Venga kohhran upa T. Sena chuan, "Baibul meuhin a hausa a tih chuan Zakaia hi a hausa hle ang," a ti a.

Zakaia hi tunlaia Mizote’n hlawh phu lova hausa kan tih ang hi a ni mai thei a ni. Mizorama awm chu ni se la, kan intlawnsiak hle mai thei asin. Kohhran leh khawtlangah chanvo pawimawh tak tak a chelh ngei ang a, mi zahawm tak a nih ngei a rinawm. Heti ang mi hausa hi eng vanga a khua leh tuite hian misual ti tlat nge maw an nih le? Lal Isua a ina thleng tura a luh khan, "Misual hnena thleng turin a luh tak saw," an ti a, an phunnawi a (Lk 19:7) tiin kan hmu a. An khaw pa hausa hi misual tiin an kawmserh a ang khawp mai. An kawmserh avanga khawharin Lal Isua pawh hi mamawh a ni mahna le. A chhan ni theia lang chu, a hlawh phu loin a hausa ang a, Israel-te hian mahni hlawh phu lova hausa te, kut tling lova hausate hi misual tiin an ngaisang lo hle a ni mai thei a ni.

Mizoramah hian hlawh phu lova hausa hi sawi tur an awm fo va, Mizote hian misual tiin kan kawmserh ve em le? Heng ang mite hi khawtlangah leh kohhranah an inkiltawih reng em? An inkiltawih lo va, zak hmel pawh an pu hek lo a nih hi. Kohhranah a phusa saah an ṭang a, a ring ṭha ber ang maiin an khawsa zawk a ni.

Chuvangin, hawh teh u, tun aṭang hi chuan Mizo Kristiante hian thawh rim vanga hausa ni lo, kut tling lova hausa te, mahni hlawh phu lova hausate leh dan loa pension hlawh late family pension late hi misual an ni tih hria ila, entleu nachang i hre ve tawh teh ang u. Kan Pathian thu pawhin, "Suahsualnaa lawm ṭhin Pathian i ni lo va, misual chu i hnenah a thleng lo vang," (Sam 5:4) tiin min hrilh a ni. Hei chauh pawh hi a ni lo, "Nangni thil tisualtu zawng zawngte u, mi kalsan vek rawh u, Seol-ah tuin nge lawmthu hrilh dawn che u," (Sam 6:8) a ti hmiah mai a nih hi.

Chuvangin, kut tling loa sum la lut ṭhinte hi Pathian thu aṭang chuan mi hausa pawh ni se la, misual an ni; an in ropui tak takte leh an thil neih hlu tak takte pawh hi i awt bawk lo ang u.

- Hausanga Hauzel