Mahni tui zawng thlan thiam

Mi tinte hi kan duh zawng leh tui zawng a inang vek lo a, kan eizawnna kawngah kan tui zawng kan thlan thiam a pawimawh hle. A ṭha leh hlâwk nia hriat vanga mi dangte thlan ang thlan ve ngawt hi a fuh ber lo.

Mi ṭhenkhat chu zirtirna lama tui tak an ni a; sumdawnna, kut hnathawh, thil siam chhuah leh thil dang dang tuipuite an awm bawk. Kan thiamna, kan duh zawng leh kan thil tumte hre thiam a, ngaihtuahna fim tak hmanga kan hna tur kan thlan thiam a pawimawh em em a ni.

Eizawnna atana kan tuina tak kan thlan chuan kan hah leh buai pawhin kan ning lo ang. Eng hna pawh ni se, phûr takin kan thawk a, hmasawnna leh hlimna min thlen a, keimahni chauh ni loin min dawrtute tan pawh a nuam ṭhin.

Chutiang ni lo a, a hlâwkna leh dinhmun ṭha zawk nia ngaih vang ngawta kan tuipui lem loh kan thlan chuan kan hnaah phurna tak tak nei loin kan thawk a, mi dangte thlengin a nghawng thei. Tuina ni lo thlan ve ngawt chu teirei peih loa bànsan leh mai a awlsam a, office leh sumdawnna hmuna dawr hrehawm takte pawh hi hlawh leh hlawkna duh, an hnaa tui tak tak lote an ni deuh zel mai.

Mi dangte nena kan inang vek lo tih hria a; mahni thiamna leh tui zawng kan hman thiam chuan kan nunah hmasawnna leh hlawhtlinna a thlen ngei ang. Hna sang leh hlâwk nia kan hriatte hi zahawmna kengtu a ni lem lo; zahawmna chu a mihringah zawk a awm ṭhin. Eng hna pawh, hna hniam leh hnuaihnung zawk nia mite'n an ngaih pawh ni se, tui tak leh nuam ti taka kan thawh theih a hlu ber.

Tun hma deuh chuan sorkar hna bak kan thlir pha lo a, lehkha zir lai aṭangin sorkar hnaa luh kha kan tum ber a ni nghal vek ṭhin. Tunah erawh chuan khawvel changkang zelah eizawnna kawng hrang hrang a inhawng zau zel a, ṭhalai zingah mahni kutkawih ngeia an tuina lam hmanga eizawng tam tak an awm tawh a, chutiang tum chu tam tak an awm bawk.

Tui zawng tak thawkte chu an hnaah an chiang a, an hlimpui a, hmasawn zel tumin an rilru an seng a, buaiin hah deuh mah se, nuam ti takin an thawk thei zel a, rah ṭha a chhuah bawk ṭhin. Harsatna leh buaina a thlen pawhin an hmachhawnin an bei zui ngam zel ṭhin a ni.

Chuvangin, kan hna thawh tui zawng tak, hlim taka kan thawh zui zel theih tur kan hriat chian a, kan thlan thiam a pawimawh tak zet a ni.

- Lungen Mami