CM, MUHCS, MSP, LR&S ZPM tân sorkar lehna tham!
A thupui ang khian, opposition tan chuan a thim a vâr thlu lova beih reng ngai; tlin nawn leh sakna tham a ni. Nula hmelṭha, sil loh pawha chhum tlâk nia mawi te pawh, a kâwmkâr tin kan keu dên dên chuan uluk taka sil ngai a awm ve tho ṭhin. Opposition-te chuan mipuiin kan ṭhatpui leh innghahna tlâk nia kan ngaihte pawh social media leh mainstream media hrang hrangah te, police thuneitute leh court thleng pawhin an kêu dên dên a ngai ta.
Chief Minister hi sorkar lû ber a nihna anga beih hi thiang lo a ni lo. A mimal nun thlênga kan beihna erawh defamation case ziah luh theihna a tam. Sorkar lû berin ram kaihhruaina hna rit tak a thawk a, a famkim vek hauh lo ang. Khalh ngil lam kan hawi loh pawhin, tihchhiat tumna hmanrua ang maia hman theih thu ṭhenkhat hi chu Kristian pachal (a ṭhente phei chu politics zawlnei nia mawi) kan nihna nen pawh a inmil lo viau ṭhin. Mipui tam zâwk erawh chuan a ṭha ber rih tih hi kan pawm dân a ni.
MUHCS chungchangah ZPM sorkar kan lo pawngtawng rin loh ve ngawt a. A tirah kan inziak lût ṭha duh lo a, inziak lût hmasate'n an han hmang ṭangkai tak tak a, inziah luh loh hlauin chhuanlam fahrah tê tê kan siam zûr zut ta a ni! Healthcare infrastructure leh cover ṭha lutuk hian mipui natna leh harsatna tawh huna innghahna tlak a nihzia a tarlang chho zêl a. A hmasa nen a inthlauh lutuk avangin 'cashless' duh lote thlengin a 'rate' azirin kan duh leh ang lawi a; keu dên dên a ngaih phah ta zawk a nih hi!
Sawhthing phei chu kan ringhlel lehzual emaw tih mai tur! Kum 1994-a Congress sorkarin ‘The Mizoram Agricultural Produces Marketing (Regulation) Act, 1994’ hmangin thali chi 5 khapna dan a siam leh kum 1998-a "In kawtkaiah kg khat Rs. 10-in kan lei ang," tih thawm kan hriat tawh vang chauh pawh a ni lo, a ṭawih rim kha kan hnârah a la châm ni hmiang, primary collection centre leh secondary collection centre-ah te member kan ni duh lo vêl hmasa kha a nia.
Sorkar a che tak tak a, member ni duh lo ho khan inziah luh leh hnuhnawh an inthlahrung tawh si a, an chhûngte member nihna hmangin an hralh ve ta ham ham a. A ṭha tho e! Direct market support leh maximum support price pêk kha sorkar tum ber a ni. Kum thum hmel kan hmu chho dawn a, sawhthing kan hralh tawh zat hi kilogram-a chhiar phei chuan number ziah tlar a ngai nasa tawh ngawt ang. Quintal-a chhiar pawhin mi nazawng chuan kan chhiar sual nawk nawk a nih tâk hi!
Land Revenue & Settlement hlawhtlinnate hi sawi hmaih palh neih a hlauhawm zawk! Maumual, Ramhlun Sport Complex, Chêkbâwk leh Risk Mual (Zemabawk West ni ta) chinfel a ni ringawt pawh hi, sorkar liamtate kum hman ral aṭanga teh phei chuan a 'lutuk' mah zawk a ni. Land registration leh administrative rule chinfelsak an nih avangin ram neitute tan innghahna nghet, document fiah leh political favoritism bo hlen tawh turin kalphung fiah tak a ding chho ta zawk a ni. Patling chem sen lek mai huamte kha lawmin an nui leh thei zu nia!
Social media leh mainstream media-a mimal nun beihna te, police leh court thleng pawha beih ṭhinna te hian sorkar policy chakna a tichhe zo lo. ‘Thu dik leh a taka hmasawnna’ hi ZPM sorkar shield leh opposition-te tana barricade sâng ber a ni zêl dawn a ni.
- Thangtea Thawmte