MIZORAM UNIVERSITY SOUTHERN CAMPUS, LUNGLEI

Ministry of Human Resources Development Department of Higher Education, Govt. of India chuan ni 17.01.2020 khan Dr. R. Lalthangliana, Minister of Higher Education, Government of Mizoram lehkha ni 15.10.2019 leh MZU Vice Chancellor Prof. KRS Sambasiva lehkha ni 19.07.2019 chhangin, ni 18.12.2019 khan Mizoram (Central) University (MZU) Southern Campus, Lungleia din a remti a, a lawmawm takzet a ni. Mizoram University hi April 25, 2000 khan Parliament-ah passed-in, July 2, 2001 khan Vice Chancellor hmasa ber Prof. A.K. Sharma hovin hawn (function) ṭan a ni.

 

MZU hawn a nih hma hian NEHU Campus, Aizawl tih a ni. Kum 1979 khan Pro-Vice Chancellor Prof. R. Lalthan­tluanga hovin hawn a ni. Economics leh English Department an awm hmasa ber a, 1980’s khan Education, Psychology leh Public Administration Department te a awm leh a,1990’s khan Forestry, Social Work leh Mizo Department te hawn belh lehin, Chaltlang-ah mi in luahin bul ṭan a ni. NEHU sawi takah chuan, May 26, 1973 khan Shillong-ah hawn a ni a, Vice Chancellor hmasa ber chu Dr. CDS Devanesan, kristian ṭha tak a ni. He tih hun lai hi St. Edmund’s College-ah B.Sc ka zir ṭan kuma ni ve a. Rev. Lalngurauva, NEICC Secretary Quarters-ah a lawman ruai kan ṭheh nghe nghe a ni. Shillong-ah chuan “A Hmangaihna Faktute” lar chhoh lai a ni a, an hruaitu Pu R. Vanlalzawma (RIP) chu solfa thiam tak a ni. Vawi khat chu an member atan min nominate ve a ni awm e. Mahse, ka ṭhianpa, a hming bula ‘R’ dah chu an la ta zawk niin ka hria. 

Mizoram Peace Accord 1986-ah Mizorama zirna sang (University) thu hi ziah tel a ni. Mizoram Assembly March 23, 1992-ah passed a ni a, a reh ta vang vang a. Independnce Day August 15, 1995-ah chuan Chief Minister Pu Hawla chuan State University-ah a puang ta rup mai a. Central lamah Shri Nahasimha Rao chuan cheng vbc.5 a sanctioned ve nghal bawk a. Mahse, mipui leh NGO hrang hrang chu lungawi lovin Central sorkarah Central University ni turin thu an thlen a. Central sorkar a inthlak a, Shri Dev Gowda leh Gujaral te chuan May 22, 1997 khan Central University chu Mizoram an rawn pe ta a ni. Central sorkar a inthlak leh a, India ram PM zinga ka ngaihsan, Shri Atal Behari Vajpayee kaihhruaina hnuaiah Parliament-ah passed-in, President-in April 25, 2000 khan a nemnghet a, Mizoram (Central) University chu a lo piang ta a. July 2, 2001 khan Vice Chancellor hmasa ber Prof. A.K. Sharma hovin hawn a ni ta a ni. 

Mizoram University din chhan leh thil tumte chu, a inziah danin, “To disseminate and advance knowledge by providing instructional and research facilities in such branches of learning as it may deem fit; to make provisions for integrated courses in humanities, natural and physical sciences, social sciences, forestry and other allied disciplines in the educational programmes of the University; to take appropriate measures for promoting innovations in teaching disciplinary studies and research; to educate and train man-power in the development of the State of Mizoram; and to pay special attention to the improvement of the social and economic conditions and welfare of the people of that State, their intellectual, academic and cultural development,” tih a ni. A awmzia tlangpui chu, Mizoram University-ah chuan mihring mamawh chi hrang hrang leh thing leh mau leh leilung zirna leh zirbingnate neih a, Mizoram State tana mi hmang tlak chher chhuah leh, Mizoram mipui tana hmasawnna chhenfakawm siam leh an hnam nun chawikan, tih te a ni. 

MZU Southern Campus, Lunglei rim a nam ṭan: MZU Vice Chancellor pahnihna Prof. A.N. Rai hun laiin Mizo Students Union (MSU) chuan MZU Campus, Lungleia din turin lehkha an theh lut a. An lehkha chu Academic Council-ah ngaihtuah a ni a, a thuphungin ṭha tih a ni. Lunglei Govt. College-ah lecturer-in kum 10 lai ka lo thawh ve tawh avangin Lungleia MZU Campus din chu ka support ve hle a ni. Mizoram University a ṭhang chho zel a, tin, a nau puak Constituent College, Pachhunga University College (PUC) enkawl ngai bawk nen, campus hawn lam chu thi lo a ruangin a la nung ve che che a. Rev. Dr. K. Thanzauva, BCM General Secretary a nih laiin, NGO dangte nen inrawnkhawmin, MZU Southern Campus tih hming chawia Lungleia dah turin Mizoram sorkarah an thlen a. Chief Minister Office aṭangin May 8, 2013 khan MZU Vice Chancellor hnenah Southern Campus, Lungleia dah tur leh,

Lunglei Govt. College chu Constituent College-a dah turin a thlen ve leh a. Academic Council ni 3.12.2013 meeting-ah ngaihtuah lehin University 12th Plan-ah dah luh a ni a; mahse, phalna hmuh a ni ta lo a ni. 

Tuna Vice Chancellor, Prof. KRS Sambasiva Rao hian ṭan khawh thar ve lehin central-ah a nawr zui ve reng a. Tichuan, MZU din tirh aṭanga a kum 19 na (2000-2019) ah Ministry of Human Resource Department, GOI chuan hun rei tak kan lo nghahhlelh em em ṭheuh, Mizoram (Central) University Southern Campus, Lungleia din chu a lo remti ta a ni. MZU Southern Campus, Lunglei chu ni 18.12.2019 khan a lo piang ta a ni. 

A hmunhma: Southern Campus din tur hian tih tur tam tak a awm a ang. A hmasa berin Southern Campus Managing Board emaw, Lunglei High Power Committee-in a hmunhma tur a ngaihtuah a ngai ang. A hmun hma chu Mizoram sorkarin a pe tur a ni. Hmunhma zau ṭha tawk tak nei turin survey neih a ngai ngei ang. Ṭhangthar lo awm zel tur tana rotling tur leh University puitlinga hlankai a nih hun thlenga daihzai tur ruahman lawk a ngai ngei ang. Tin, Myanmar leh Bangladesh ramri hnaiha a awm dawn avang leh, South East Asian Nations luhka (gate-way) a nih dawn avangin, International level tura ngaihtuahna sen chi a ni bawk ang. 

Bulṭanna: A bul ṭan turin Pro-Vice Chancellor awm a ngai. University Schedule-ah chuan Pro-Vice Chancellor chu Vice Chancellor ruat tur a ni a, Central sorkar a rawn inrawlh ang em tih erawh chu ngaihtuah theih a ni ang. A bulṭantu atan chuan a ram mi ni thei se, a ṭha hle awm e. Detailed Project Report: University awm dan tur zawng zawng leh a inrel­bawlna, staff, building infrastructure ṭha leh tlo, roads, bus, water supply, power supply, boys & girls hostel, research scholars hostel, library, auditorium, computer centre, health centre, resources centre, playground etc ngaihtuahin, consultancy firm rawih a ngai hial ang. 

Faculty: Zirtirtu lak aṭang hian fet hle a ngai ang. Subject tinah a thiam thiam, a ṭha ṭha lak hmiah mai tur a ni. Thiam dan inang rau rau-ah leh hman tlak turah chuan a ram mi duhsak chu a sual lo ang. Quality/ standard education nei tur chuan politics thila induhsak emaw, chhungkaw thil avanga induhsak emaw chu  tih chi a ni lo. Kum 2022 aṭang phei chuan Doctorate Degree neih tel a ngai dawn lehnghal awm e. Subject: Subject/ discipline thlan hi uluk a ngai viau. Mizoram University leh PUC Post Graduate subject-a awm lo ngaih pawimawh hmasak a ṭul awm e. Kan ram leh hnamin a mamawh leh khawvel ram dang mamawh khung leng thei tura ngaihtuahna sen a ngai. Entir nan, ṭawng zirna lam (Languages & Culture)-ah Assam University-ah chuan English, Arabic leh French; Manipur University-ah part time-in Korean. MZU Southern Campus-ah chuan Hebrai or Arabic/ China or Japanese/ Korean/ Burmese or Thai or Philipino/ French etc ṭawngte hi kan hnaivai deuhte leh Chanchin Ṭha hrilh nan pawha ṭangkai turte an ni thei ang. 

Science, Technology & Professionals-ah: MZU, ICFAI leh NIT-a subject awm lo lam ngaihpawimawh a ṭha awm e. Entir nan, Rural leh Agriculture lamah - Rural Development & Agrobusiness/ Agricuulture Engineering/ Rural Devel­opment Engineering/ Urban Agriculture & Growth Centre. Engineering lamah- Environmental Engineering/ Industrial Engineering/ Petroleum Engineering Tech­nology/ Manufacturing Engineering/ Bio­engineering & Bomedical Engineering/ Surveying & Geomatics Engineering/ Food & Agriculture Engineering etc. leh, Act East Policy hmachhawn turin Interna­tional development policies leh Business management lamte uar a ṭha awm mang e. 

A pawimawh ber chu zirna leh zir­bingna quality ṭha leh, mi thiam leh hmanlak chher chhuah a ni ang. 

- Prof. H. Lalramnghinglova