MUHCS an zawm dawn em?
Tun hnaia sawi hlawh tak pakhat chu Mizoram Universal Health Care Scheme (MUHCS)-a Synod Hospital, Durtlang leh Mizoram sorkar inremna chungchang hi a ni awm e.
Non Government Hospital Association of Mizoram (NGHAM) member zinga MUCHS la zawm lo zinga damdawi in lian pathum–Aizawl Hospital, Ebenezer Medical Center leh Trinity Hospital te chuan sorkarin Synod Hospital inremna a siampui ang rate a nih chuan zawmve an hnial loh thu an sawi.
Hospital pathum enkawltute sorkar leh Synod Hospital ten inremna an ziah ang hi chuan MUHCS zawm an duh a, an inremnate hi anni pawhin an kalpui theih ve tho thu an sawi a ni.
Hemi hnu hian Health Secretary chuan notice tichhuakin, Mizorama damdawi-in MUHCS la zawm lo, Synod Hospital facility neih ang neite chu Synod Hospital inremna a ziahpuina rate angin Mizoram sorkarin inremna a ziahpui theih reng thu a tarlang bawk.
Vanglaini chanchinbua ka lo hmuh danin, Health Minister Pi Lalrinpuii chuan Aizawl Hospital, Ebenezer Medical Center leh Trinity Hospital te chuan Synod Hospital facility ang an neih thu leh Synod Hospital inremna rate anga inremna an ziahpui theih reng thu a sawi a ni.
Hetiang a nih chuan sorkar leh private hospital lam tan buaina tur a awm ta lo niin a lang. Heti chung chunga private hospital pathumte hian MUHCS an zawm lo a nih chuan mipuiin MUHCS zawm duh lo hrim hrim, mipui hmakhaw ngai loah pawh puh ni se, a puhtute an demawmin a rinawm tawh lo. Sorkar demtute pawhin sorkar an dem zui tawh lo maithei a ni.
Engpawhnise, mipuiin heng private damdawi in lian pathumte'n MUHCS an zawm hi kan mamawh tak zet zet a, zawm ngei thei se a duhawm hle. Hetia a lan dan mai chuan harsatna awm ṭhin nia kan lo hriatte chinfelin a awm ta a. Mipuite hmakhua ngaiin sorkar leh damdawi in neitute hi inrem thuai teh se.
Private hospital lian pathum kan tihte hi hmanraw nei ṭha zual leh khum pawh nei tam zualte an ni mai thei a, chute chungchang an dinhmun a la inang lo cheuin a rinawm. Dinhmun inang lo na na na chu rate chungchangah an inang vek thei kher lo ang. Tin, doctor-te thiamna hrim hrim pawh a inang vek thei lo va, mipuiin an rin dan pawh a inang thei lo. Private hospital ṭhenkhat chu Synod Hospital rate aia sang pawh beisei ngam tur an ni maithei a, ṭhenkhat chu Synod Hospital rate anga tih ngawt phu pha lo te pawh an ni thei. Hengte hi private hospital-te hian an hriat thiam a ngai a ni – anmahni an inhre chiang a, an hriat thiam ngei ka ring bawk e.
- Lalrinthanga