Thailand Prime Minister pawisa chawitir kha

Kum nga lai liam tawha Covid hripui len lai khan Thailand khawpui Bangkok-ah chuan pawn chhuah an khap mai bakah, mi dangte nena awmhona reng rengah mask vuah vek turin thupek tihchhuah a ni a. Hetihlai hian Thawhṭanni mai khan Prime Minister ber Gen. Prayut Chan-o-cha chu mask a lo vuah loh avangin baht 6,000 (Rs 14,270) an chawitir a ni. Bangkok Governor Aswin Kwanmuang chuan police hnenah complaint a thehlut a, mi dang zawngin mask an vuah vek laia vuah ve lo Prime Minister chu Bangkok Metropolitan Administration chuan pawisa a chawitir ta a ni.

Thailand hi chuan keini nghahhlelh em em Zoram khawvar hi a takin an lo thleng der tawh a nih hi maw le aw ka tih phah hial a. Hetianga dan ngaih pawimawhna lian tak an nei a, an ram hruaitu ber pawh ngaihhnathiamna awm hauh loa pawisa an chawitir hi an va fakawm tak em. Assembly House chhunga an member-pui pakhat, amah thlang tlingtute ngei pawhin min phatsan a, min bialtu atan pawh kan duh tawh lo tia an hêk pawh ni hauh loa House chhunga a ṭhutpuite zawkin a phatsan a ni an tih hram hram avanga bân duh khawpa dan ngai pawimawh ram hruaitu 12 kan neihte hian hetiang hian ram an hruaina kawngah dan han ngai pawimawh ta chiah se la, he ram hian a va ṭhatpui dawn nasa rua em.

A hmutu tur hre saa tender chhuah tih te, mipui lamin electric bill kan pek reng laia cheng vaibelchhe 2.49 lai mai NEEPCO lamin bâ anga min ngaih a, April thla chhunga pek a nih loh chuan tia min rawn vauna te kha, anni dan ngaih pawimawhtute hian a chìn chhuakin min han hrilhfiah vek thei se la a lawmawm ngawt ang le. Thailand ramah chuan dan chu dan a ni an ti mai a, an ram hruaitu ber pawh chu ngaihhnathiamna engmah nei bik chuang hauh loin pawisa an chawitir hmak mai a. Dawr chhunga mahnia awm mask hrêng lem lote pawisa chawitir leh nghathu rim hnim chhung zawk mask phelh pawh kan inchawitir ang hi chuan a chawitirtute hi chuan rilru an neih ka zuk ring chiah lem lo thung a. Opposition lamin an nawr chak tak thut vanga pawisa hi chawitir an nih pawh ka ring lem chuang lo.

A ni, Prime Minister ber pawh chuan a pawisa chawi chu ṭha takin a pe mai turah han ngai ila. Keini angin tu emaw khabea mask hrêng lai lem an thehdarh vanga FIR thehluh ang ngawt chuan a lo thinrim lo ni awm tak a ni. Kristian a ni em tih lam phei chu ka hre hauh lo nâin, Kristian zawkte hian entawn tur kan ngah mang e aw ka ti bawk a. Kan ram hruaitu ni phei se la chuan tiin, a ṭhat viau te hi ka han ring tel bawk a. Thailand Prime Minister hi meeting satliaha awm mai mai a ni hauh lo lehnghal a, vaccine dap dan tur zawnga meeting an neihna hmunah a ni lehnghal a; meeting pawimawh tak a ni a, an ram mipuite tana Covid laka himna tur damdawi chungchang an ngaihtuah laiin a ni.

Amah ni kher lo, officer dangte pawh hian hrethiam rih lawk mai turin ngen ta se la, an hriatthiam theih mai te ka han ring bawk a. Nimahsela, ani chuan ngawi rengin a chawitur ang chu a chawi ai ni awm tak a niin a hnu lamah pawh hian amah hêktu Bangkok Governor Aswin Kwanmuang chungah hian thungrulhna a thlentir kherin a rinawm loh a. A pawisa chawi hi cheng 100 lek ni loin, a sing tel lehnghal ni mah se la, a pek thlap hmel.

Kan Ex-Minister pakhatin minister a nih laiin motor hmaa ‘MINISTER’ tih ziak tar chunga no parking hmuna motor park nuam a tih thu nui chunga a sawi ang ngawt chu a ni loh hmel. Parking fee khawntu, ni sat vanga lukhum parh khum a, thlan tui tla hluam leh ipte tharlâm lo tak ak chunga parking fee khawn tan chuan ‘MINISTER’ tih intar motor chu hnawk hle mah se la, a hauh ngam kher a rinawm si loh a. A hûn hnawk man pawh anmahni awm reng mah se la, a khawn ngam kher chuang lo maithei bawk.

Thialand Prime Minister hêktu (complaint tu) Bangkok Governor hi ka ngaihtuahin hremna a tawh phah ang em aw ka ti a. Kan ram ang chu ni se la chuan suspend emaw, transfer a tawh loh vek leh, Officer on Special Duty-a dah ngei ngei tur a nih hmel. Nimahsela, ani pawh hian chung zawng zawng ngaihtuah fel vek hnua hetia complaint ta hi a ni maithei bawk. Ram hruaitu ber mah ni se la, hetia dan ang taka ka tih hi a ṭul a, nakin zel atan pawh a ṭha zawk ang tih rilru a nei pawh a ni thei. Amah ngei pawh chuan tuar dawn pawh ni se, dikna vanga tuar a ni dawn tlat avangin a hlau lem lo a ni thei bawk. Direct takin Prime Minister Office aṭanga Governor chunga action la tur thuchhuak a awm ve hauh lo te hi an ropui bik ngawtin a hriat a, sawiselna nei miah loa Rs 14,270 a chawi mai hi fakawm deuh a ni.

An party mi leh sa a nih leh nih loh pawh ka hre hauh lo nâin, duhsakna vanga Governor ni thei pawh chu a lo ni maithei nâin, hetiang taka an ram hruaitu ber chunga dan a chelek ngam hi hriat reng tlak a va han ni chiang em. Thailand hi sakhuana lamah phei chuan 94.50 % Buddhism an ni a, Christian phei chu 1% vel lek an awm a ni. Nimahsela, chuti chung chuan an ram hruaitu berin thil ho tak (ti mai ila) mask vuah leh vuah loh mai mai vanga pawisa tam tham tak mualphothlak tak mai a han chawi ta mai hi thup bo tum ta se la, a kawng chu an hre ngeiin a rinawm si a; an thup bo duh ta tlat lo hi keini aia an ropui bikna a ni.

Keini ramah chuan mask vuah leh vuah loh mai mai pawh ni loin, bank account freeze sak ngai hial khawp te pawh kan awm ni awm tak a ni a; chungte pawh chuan thiam an chan theihna turin cheng sang tam tak sengin danhremi an ruai fo an ti a. E, kei hi ka lo thiam lo tawp mai tih lah chu a tu amah chuan tih an tum der chuang lo a, thiam an chan theihna turin an theih tawp an chhuah zawk thin si a. Thailand Prime Minister ang hian an dik lo a, an thiam lohzia hi zêp lo ve mai se la chuan kan ram hian kan ṭhatpui ngei zawk dawn ni te hian ka zuk hre bawk a.

~ Mahmuaka Chhakchhuak