KRISMAS CARD LEH WRITING PAD
Ka ṭhianpa hnen aṭanga Krismas Card ka dawn, phûr taka ka han hawn chuan, “He Krismas Card hi nikuma kan bialtu MLA Pu ….. a’n ka pa a thawn a ni a, i lo nei ve tawh dawn nia,” tih hi a lo inziak a. Chu card chu ka thianpain dâka min rawn thawn ve vang vang kha a ni. ‘Second hand Krismas card dawng hmasa ber leh dawng awm chhun ka ni mial mai thei em aw tiin ka ngaihtuah let a, ka lung lam lam a leng thar tlat.
Aw le, Kristiante mai nilo, Mizote’n kan ngahhlelh em em Krismas chu kan hma lawkah a lo awm leh ta reng mai. Thlasik rim a nam rual hian Krismas rim pawh a nam nghal a, chu rim chu tuma’n kan sawifiah thei azeng chu a ni lem hlei law!
Tunlai anga smart phone hmanga Merry Chirstmas han tih zeuhna tur a la awm hma kha chuan Krismas Ni hma ngeia an hmuh hman turin kan ṭhiante leh kan chhungte tan Krismas Card kan han thawn chhuak a. A thlen hma theih beiseiin Dak Inpui, Treasury Square aṭang ngeia thawn kan duh deuh kher ṭhin. Mizo ṭawnga chhut a nih ve hma kha chuan Sap ṭawnga inziak kha a ni mai ṭhin a. Ziahna tur hmun âwl awm ang angah Mizo ṭawngin kan duh ang kan ziah belh ve mai ṭhin. A card-in envelope a chhawm nghal zel avang khan a thawn pawh a awlsam a, ticket pawisa 25/50 man te belin a thlenna tur kha him takin a thleng ve mai thin kha a nia.
Ṭum khat chu kan ṭhianhoin Guwahati-ah Krimas kan hman a ngai tlat mai a. Archie dawrah kan han lut a, kan ṭhianpa pakhat khan Krismas Card a han lei hlai em em khawp a, ropui tham tak a ni. Love sign kha a chuang kalh mai bawk si! A dawngtu tan chuan vai pathian biaka lo biak tham tur ang hial a nih hmel a ni. A thawn manah pawh a chawi hnem ngawt ang kha, a rukin a lo va thawn a nih hmel leh nghal!
Mahni khua/veng chhunga mite chu an inah lut kualin kan han sem nghauh nghauh ṭhin a; a semtu tan a nuam, a lo dawngtu tan lah a lawmawm ṭhin bawk. A dawngtu mai ni loin, a thawntu nih ve ngei kan tum a, kan theih anga tam kan sem chhuak ṭhin a nih kha. Khatiang hun lai kha a va han ngaihawm tak em. Hawh u, i chíng thar leh teh ang u!
Mobile phone a lo chhuak a, SMS hmanga Krismas chibai inbûkna kan han hmang chho a, smart phone a rawn chhuak a, Whatsapp, Facebook, etc. hmangin Krismas chibai kan han inbûk chho ta a; a rangin duh anga tam pawh a thawn theih nangiang mai. Amaherawhchu, Krismas Card ngeia chibai kan han bûk ang kha chuan rilru a puar zo lo deuh chu a nih hi le. Chawhmeh tui tih zawng lem loh tak hmeha ‘Rilru a puar tel lo’ ang deuh hian, duhthu chu a sâm lo deuh chuan ka hre tlat mai.
Writing Pad pawh hi hman tur a awm ta lo, a lunglenthlak hle mai. Company hrang hrangin writing pad an rawn siam chhuak a, a ṭhenah phei chuan thlalak nalh tak takte an rawn chhu kai tel bawk a. ‘Onion Skin’ ngat phei kha chu sipisial taka lehkhathawn ziah nan kan duh zual ṭhin kha a nia!
Khang writing pad te kha khawvel hmun dangah la siam chhuak tak ang maw? Hmuh leh a va chakawm tak em. Kan note bua mi pawhthlak tawp a, love letter han fly ai kha chuan writing pad-a ziah ngei kha chu thupui leh khûnkhân bik riaua ngaihna kha zuk awm tlat a!
Chutah, a thawn chhuahna lamah pawh kan bei uluk nasa ṭhin teh e. Envelope, a tlang kual chhuaka a sena ṭial ngei maiah kan han thun a, a chungah ‘QMS’ tih kan han ziak kalh bawk a, a thleng hma turah kan dah hmiah mai a ni (QMS=Quick Mail Service). Dak pute khan engtin tak lo ngai ṭhin ang maw!
Ṭhian ṭhenkhat hawiharh deuhte khan a thlen ngei ngei theihna sang tak mai chu ‘due’ a thawn tur an han ti a. Tichuan, ticket bel loin dâkah kan han thlak a, dak pute’n ‘DUE’ tih an lo chhu kuau mai a, kan thawna te khan pawisa chawia an lo khul a ngai thung. Pawisa chawia kan lehkha an lo dawng duh kha kan lo va han vannei em em ka ti hnuhnawh ta. Khatihlai ang hunah kha chuan pawisa 25/50 (siki/duli) kha a la hlu em asin ni.
Thil hi a hun lai ang mil zel hian a lo awm ve mai zel chu a nih hi le, he khawvel ram zau takah hian.
- Hrangchhuana Sailo
Emai: hsailo_pg@yahoo.com
MB: 9436352280 / 8873095663